ដើមខែថ្មី ថ្ងៃទី ១​ មីនា ឆ្នាំ ២០២៣ ក្រសួងសាធារណការ និងដឹកជញ្ជូន បានចូលរួមក្នុងកម្មវិធីសម្ភោធដាក់ឲ្យប្រើប្រាស់ជាផ្លូវការនូវស្ថានីយ៍បញ្ចូលថាមពលយានយន្ដអគ្គិសនីថ្មី EV STATION PLUZ ចំនួន ៣ ទីតាំង បន្ថែមទៀត ពីក្រុមហ៊ុន PTT ។ 

ក្នុងឱកាសនេះ ឯកឧត្តមទេសរដ្ឋមន្ត្រី ស៊ុន ចាន់ថុល បាន ថ្លែងអំណរគុណដល់ក្រុមហ៊ុន PTT និងបន្ថែមថា ក្រសួងក៏បានសហការជាមួយនឹងដៃគូអភិវឌ្ឍផ្សេងៗទាក់ទងនឹងគម្រោង បង្កើនការប្រើប្រាស់រថយន្ដអគ្គិសនីនៅកម្ពុជា ដូចជា UNDP បានផ្ដល់ ស្ថានីយ៍សាកឡានអគ្គិសនីចំនួន ៤ គ្រឿង ដើម្បីជាទុនជម្រុញឲ្យក្រុមហ៊ុនឯកជន ជួយសហការបន្ថែម ជាក់ស្ដែង ដូចជាក្រុមហ៊ុន PTT ពេលនេះ បានសម្រេចការដំឡើង និងសម្ភោធស្ថានីយ៍សាកឡានអគ្គិសនី ចំនួន ៣ កន្លែង នេះឡើង ។ លើសពីនេះទៅទៀត ឯកឧត្តមក៏បាន លើកឡើងពីគម្រោងសហការជាមួយក្រុមហ៊ុនរថយន្ដអគ្គិសនី BYD លើគម្រោងដាក់ស្ថានីយ៍បញ្ចូលថាមពលឡានអគ្គិសនីនេះ ចំនួន ២០០​ គ្រឿង នៅកម្ពុជា ផងដែរ។ 

ឆ្លៀតក្នុងឱកាសនេះ ឯកឧត្តម ក៏បានបញ្ជាក់ថា មកទល់ពេលបច្ចុប្បន្ន ការចុះបញ្ចីប្រើប្រាស់រថយន្ដអគ្គិសនី ក្នុងប្រទេសកម្ពុជា កើនឡើងជាលំដាប់ ដោយបច្ចុប្បន្ន (មករា ២០២៣) មានដល់ជិត ៨០០ គ្រឿងហើយ ដែលធៀបនឹងឆ្នាំ ២០២១ មានត្រឹមតែ ៦៦ គ្រឿងប៉ុណ្ណោះ។ 

សូមជម្រាបជូនដែរថា មកទល់ពេលនេះ កម្ពុជា មានស្ថានីយ៍សាកឡានអគ្គិសនីសរុបចំនួន ១៣ ទីតាំង ដែល ៤ ទីតាំងស្ថិតនៅក្រសួងសាធារការ និងដឹកជញ្ជូន រាជធានីភ្នំពេញ, សៀមរាប ១ កន្លែង, ព្រះសីហនុ ១ កន្លែង​, បាត់ដំបង ១ កន្លែង (សម្ភោធឆាប់ៗនេះ), ១ ទៀត របស់ក្រុមហ៊ុន Caltex នៅព្រៃ សរ, ១ ទៀត នៅ AEON MALL សែន សុខ, ១ នៅមណ្ឌលគីរី, និង ៣ របស់ក្រុមហ៊ុន PTT នេះ ដែលមានទីតាំងស្ថិតនៅក្នុង (១) ស្ថានីយប្រេងឥន្ធនៈ PTT ច្បារអំពៅ ផ្លូវជាតិលេខ១ (២) ស្ថានីយប្រេងឥន្ធនៈ PTT ព្រែកព្នៅ ផ្លូវជាតិលេខ៥ និង (៣) ស្ថានីយប្រេងឥន្ធនៈ PTT ជ្រោយចង្វារ ផ្លូវជាតិលេខ៦។ 

គួរបញ្ជាក់ផងដែរថា រាជរដ្ឋាភិបាលកម្ពុជា បានដាក់ផែនការឲ្យមានការប្រើប្រាស់ម៉ូតូអគ្គិសនី ៧០% នៅឆ្នាំ ២០៥០ ដើម្បីឆ្ពោះទៅរកគោលនយោបាយ អគ្គិសនីភាវូបនីយកម្មយានយន្ដដើម្បីអនាគតបៃតងសម្រាប់កម្ពុជា និងយុទ្ធសាស្រ្ដផ្សេងៗ ដូចជា ការកាត់បន្ថយពន្ធសម្រាប់ឡានអគ្គិសនី ការរៀបចំហេដ្ឋារចនាសម្ព័ន្ធ រួមមានពង្រាយស្ថានីយសាកអាគុយឡានអគ្កិសនីទូទាំងប្រទេស ការនាំចូលឡានអគ្គិសនីគុណភាព មានកន្លែងផ្ដល់សេវា គ្រឿងបន្លាស់ និងកន្លែងចោលអាគុយត្រឹមត្រូវ ធានាសុវត្ថិភាពសម្រាប់ប្រជាពលរដ្ឋអ្នកប្រើប្រាស់ផ្សេងៗ។  

ប្រភព៖ ក្រសួងសាធារណការ និងដឹកជញ្ជូន​

អត្ថបទ៖ Andra