កាលពីថ្ងៃទី ២២ កន្លងទៅនេះ ក្នុងកិច្ចប្រជុំពិភាក្សា រវាង លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង និង គណៈប្រតិភូនៃក្រុមហ៊ុនវិនិយោគចិន​ តំណាងដោយលោក លីវ ឈាន់ហ្វុ អគ្គនាយកក្រុមហ៊ុន China Matrix Technology Group-Horche Intelligent Automotbile បានបង្ហាញពីបំណង នៃក្រុមហ៊ុនវិនិយោគចិន ក្នុងការបោះទុនមកបង្កើតរោងចក្រដំឡើងរថយន្ដអគ្គិសនី ក្នុងខេត្ត កោះកុង។ 

យោងតាមការចុះផ្សាយពី រដ្ឋបាលខេត្ត កោះកុង បានឲ្យដឹងថា​ នៅក្នុងកិច្ចប្រជុំនេះ លោកជំទាវ បានថ្លែងពីសេចក្ដីសោមនស្សរីករាយ និងស្វាគមន៍ ក្រុមគណប្រតិភូក្រុមហ៊ុនវិយោគចិន ដែលបានមានចំណាប់អារម្មណ៍ ចង់បោះទុនវិនិយោគលើវិស័យបច្ចេកវិទ្យា ឧស្សហកម្មកម្ពុជា ដោយការបង្កើតរោងចក្រដំឡើងរថយន្ដ អគ្គិសនី នៅក្នុងខេត្ត កោះកុង នេះ និងបានបន្ថែមទៀតថា នេះ គឺជាឱកាសមួយសម្រាប់រដ្ឋបាលខេត្តកោះកុង ក្នុងការកសាងទំនាក់ទំនងល្អប្រសើរ ដើម្បីឲ្យក្រុមហ៊ុន វិនិយោគចិន បានឈ្វេងយល់ពីគោលនយោបាយ កិច្ចសហប្រតិបត្តិការណ៍ដីធ្លី ធនធានមនុស្ស និងសក្ដានុពលផ្សេងៗពាក់ពន្ធ័ នឹងវិស័យបច្ចេកវិទ្យា ឧស្សាហកម្ម រថយន្ដអគ្គិសនីក្នុងខេត្តកោះកុង ដែលជាការរួមចំណែក សម្រេចយុទ្ធសាស្រ្ដចតុកោណ របស់រាជរដ្ឋាភិបាលកម្ពុជា​ ក្នុងការប្រើក្លាយទៅជាប្រទេសមានចំណូលខ្ពស់ ត្រឹមឆ្នាំ ២០៥០ ព្រមទាំងរួមចំណែកក្នុងគោលនយោបាយ “ខ្សែក្រវ៉ាត់មួយ ផ្លូវមួយ” របស់ រដ្ឋាភិបាលចិនផងដែរ។ 

ឆ្លៀតក្នុងឱកាសនោះ លោកជំទាវ ក៏បានគូសបញ្ចាក់ពី សក្ដានុពលសំខាន់ៗរបស់ខេត្ត កោះកុង ដោយ ក្នុងឆ្នាំ ២០២១ ខេត្តមានឧស្សាកម្មធុនធ្ងន់ចំនួន ៧ រោងចក្រ និងសហគ្រាស រួមមាន រោងចក្រដំឡើងរថយន្ដ, បង្គុំខ្សែភ្លើង, គ្រឿងអេឡិចត្រូនិច, វេយនភណ្ឌ័កាត់ដេរ, សម្លៀកបំពាក់ និងសម្ភារៈកីឡា ហើយក្នុងនោះ វិស័យរ៉ែ និងថាមពល សំដៅដល់ការផ្គត់ផ្គង់ចរន្ដ អគ្គិសនី ពី វារីអគ្គិសនី ទាំង ៣ ទីតាំង ដូចជា វារីអគ្គិសនី ស្ទឹងឬស្សីជ្រុំក្រោម មានអានុភាព ៣៣៨ មេហ្កាវ៉ាត់, វារីអគ្គិសនីគីរីរម្យ ៣ មានអានុភាព ១៨ មេហ្កាវ៉ាត់ និង វារីអគ្គិសនី ស្ទឹងតាត មានអានុភាព ២៤៦ មេហ្កាវ៉ាត់ ក៏មានសក្ដានុពលគួរឲ្យកត់សម្គាល់ ដែលបានជម្រុញការអភិវឌ្ឍ ប្រកបដោយគុណភាព ស្របតាមស្ថង់ដារអន្ដរជាតិ មានតម្លៃថោកសមរម្យ និងគ្របដណ្ដប់បានទូទាំងខេត្តផងដែរ។ 

នេះសរបង្ហាញថា ខេត្តកោះកុង គឺមានលក្ខណៈសមស្របសម្រាប់ទទួលការវិនិយោគទុន​ លើវិស័យការផលិតរោងចក្រដំឡើងរថយន្ដអគ្គិសនីនេះ ដោយរង់ចាំតែ ក្រុមហ៊ុន ចាប់ផ្ដើមវិនិយោគទុនមកប៉ុណ្ណោះ។ 

អត្ថបទ៖ Andra