ក្រុមហ៊ុនផលិតឡានហោះអគ្គិសនីដំបូងគេ ដើមកំណើតអាមេរិក Alef Aeronautics ថ្មីៗនេះ បានប្រកាសឲ្យដឹងថា តាំងពីចាប់បើកលក់ជាផ្លូវការមក ក្នុងរយៈពេលត្រឹមតែ បីខែ នៃត្រីមាសទី ៤​ ឆ្នាំ ២០២២​ កន្លងទៅ ឡានហោះអគ្គិសនី របស់ខ្លួន ជាង ៤៤០ គ្រឿង ត្រូវបានអតិថិជនកម្មង់ទិញ និងត្រៀមដឹកជូនដល់ដៃអតិថិជនឆាប់ៗនេះ។​

តាមការចុះផ្សាយពី Street Insider បានឲ្យដឹងថា​ បន្ទាប់ពីឆ្លងកាត់ការធ្វើតេស្ដសាកល្បងបានជោគជ័យជាច្រើនដំណាក់កាលតាំងពីឆ្នាំ ២០១៩ មក ក្រុមហ៊ុន Alef Aeronautics ​បានបើកប្រកាសលក់ឡានហោះអគ្គិសនីម៉ូដែលដំបូងរបស់ខ្លួនឈ្មោះថា Alef Model A ជាផ្លូវការ នៅក្នុងរដ្ឋកាលីហ្វញ៉ា កាលពីដើមខែ តុលា ឆ្នាំ ២០២២ ក្នុងតម្លៃមួយគ្រឿង ៣០ មុឺនដុល្លារ ដែលមានការគាំទ្រកម្មង់ទិញភ្លាមៗដល់ ៤៤០ គ្រឿងក្នុងរយៈពេលត្រឹម ៣​ ខែ ដែលក្នុងនោះមានទាំងក្រុមហ៊ុនធំៗ ពី ហុង កុង ក៏បានកម្មង់ទិញផងដែរ និងគ្រោងបង្ហើយការផលិត រួចដឹកជូនអតិថិជនពេលខ្លីខាងមុខនេះ។ 

Alef Model A ជាឡានហោះដំបូងគេបំផុត ដើរដោយថាមពលអគ្គិសនី ជាមួយនឹងសមត្ថភាពពហុជំនាញ ដោយអាចជិះដូចឡានធម្មតាលើដីក៏បាន ឬ បើកលើអាកាសក៏បាន ដែលឡើង-ចុះ ដូចទៅនឹងឧទ្ធម្ភាចក្រ មិនត្រូវការរត់លើផ្លូវដើម្បីហោះដូចយន្ដហោះធម្មតានោះទេ​ (Electric Vertical Take Off and Landing: eVTOL) ជាមួយនឹងថាមពលសាកមួយពេញ អាចឲ្យវាបើកបរបានចម្ងាយ ៣២១ គម នៅលើដី និង ១៧៧​ គម នៅលើអាកាស។ 

គួរឲ្យដឹងដែរថា Alef Aeronautics ជាក្រុមហ៊ុន ផលិតយានជំនិះប្រើអគ្គិសនីប្រកបដោយនិរន្ដរភាពមួយ​ (Sustainable Electric Transportation Company) ដែលចាប់កំណើត ក្នុងឆ្នាំ ២០១៥ នៅតំបន់ Palo Alto រដ្ឋកាលីហ្វញ៉ា ដោយស្ថាបនិក ជាវិស្វករ​ ៤ នាក់រួមមាន Jim Dukhovny, Konstantin Kisly, Pavel Markin, Oleg Petrov ដែលទ្រទ្រង់ដោយការវិនិយោគទុនពីក្រុមហ៊ុន និងបុគ្គលអ្នកជំនួញធំៗ ជាច្រើន រហូតសម្រេចបានការផលិតម៉ូដែលដំបូងដែលដាក់ហោះសាកល្បងក្នុងឆ្នាំ ២០១៩ ហើយបច្ចុប្បន្ន Alef Aeronautics មានទីស្នាក់ការនៅក្នុងតំបន់ San Mateo រដ្ឋកាលីហ្វញ៉ា សហរដ្ឋអាមេរិក និងកំពុងតែសស្រាក់សស្រាំបើកទទួលការ បញ្ជាទិញបន្ថែមទៀត តាម https://alef.aero ។

ប្រភព៖ Street Insider 

អត្ថបទ៖ Andra