តាមការចុះផ្សាយ​ពី ក្រសួងសាធារណការ និងដឹកជញ្ជូន បានឲ្យដឹងថា កម្មវិធីផ្ដល់ជូនឧបករណ៍ ETC-OBU ដោយឥតគិតថ្លៃបានត្រឡប់មកម្ដងទៀតហើយ សម្រាប់សម្រួលដល់បងប្អូនប្រជាពលរដ្ឋ ដែលមានបំណងចង់បើកបរចេញចូលផ្លូវល្បឿនលឿន ភ្នំពេញ-ព្រះសីហនុ។

ការផ្ដល់ជូននេះ នឹងគិតចាប់ពីថ្ងៃទី ១៥ ខែ មិនា ឆ្នាំ ២០២៣ នេះ ទៅដល់​ថ្ងៃទី ១៥ មិថុនា ឆ្នាំ ២០២៣ (៣ ខែ)​ ដោយបងប្អូនអាចទៅចុះឈ្មោះ បំពាក់ឧបករណ៍ ETC-OBU នេះ បាននៅ តាមមណ្ឌលផ្តល់សេវាសាធារណៈ ទីស្តីការក្រសួងសាធារណការ និងដឹកជញ្ជូន ឬគ្រប់បណ្តាស្ថានីយផ្លូវល្បឿនលឿន ព្រមទាំងចុះឈ្មោះប្រើប្រាស់បាននៅតាមបញ្ជរបង់ប្រាក់ទាំង ៨ ទីតាំងនៅផ្លូវល្បឿនលឿន។

នៅពេលមកទទួល សូមយកថយន្ត ដែលត្រូវបំពាក់មកជាមួយ និង ភ្ជាប់ឯកសារច្បាប់ដើមដូចជា អត្តសញ្ញណប័ណ្ណ  វិញ្ញាបនបត្រត្រួតពិនិត្យលក្ខណៈបច្ចេកទេសយានជំនិះ (ឆៀក), និង បណ្ណសម្គាល់យានជំនិះ (កាតគ្រី)។ 

សូមជម្រាបជូនថា ឧបករណ៍ ETC-OBU (Electronic Toll Collection-On Board Unit) ជាឧបករណ៍ ដែលអនុញ្ញាតឲ្យរថយន្ដដែលមានបំពាក់វា នៅនឹងកញ្ជក់មុខ បើកបរចេញចូលតាមច្រក ETC នៅផ្លូវល្បឿនលឿនបាន ជាមួយនឹងការទូទាត់ដោយស្វ័យប្រវត្តិ មិនចាំបាច់រង់ចាំគិតលុយផ្ទាល់ ឬកកស្ទះចរាចរណ៍នៅបញ្ជរបង់ប្រាក់នោះទេ​ ។ 

បន្ថែមពីលើជម្រើសការប្រើប្រាស់គន្លងផ្លូវ ETC នេះ អ្នកបើកបរ ក៏អាច ចេញចូលតាមគន្លង ANPR ផងដែរ ដែលតម្រូវអោយបញ្ចូលសមតុល្យជាមុនទៅក្នុងផ្លាកលេខដូចគ្នា ដែលការទូរទាត់ប្រាល់អាចធ្វើបានតាម វេបសាយ https://ew.mpwt.gov.kh ក្នុងទូរសព្ទដៃ។ 

ប្រភព៖ ក្រសួងសាធារណការ និងដឹកជញ្ជូន 

អត្ថបទ៖ Andra