ឆ្លើយតបទៅនឹង អនុសាសន៍របស់សម្ដេចបវរ​មហាធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា កាលពីពេលថ្មីៗនេះ ដើម្បីជួយសម្រួលដល់ការចំណាយក្នុងការធ្វើដំណើររបស់បងប្ងូនប្រជាពលរដ្ឋ ទៅស្រុកកំណើតជួបជុំបងប្ងូន ក្នុងពីធីបុណ្យភ្ជុំបិណ្ឌខាងមុខរដ្ឋបាលរាជធានីភ្នំពេញ នឹងរៀបចំរថយន្ដក្រុងចំនួន ៤៥៥ គ្រឿង សម្រាប់សេវាដឹកជញ្ចូនសាធារណៈរយៈពេល ៥ ថ្ងៃ គិតពីថ្ងៃទី ១២ ខែ តុលា ឆ្នាំ ២០២៣ ដល់ថ្ងៃទី ១៦ ខែ តុលា ឆ្នាំ ២០២៣ ដោយមិនយកប្រាក់នោះទេ។ 

យោងតាមខ្លឹមសារសេចក្ដីប្រកាសពី រដ្ឋបាលរាជធានីភ្នំពេញ បានបង្ហាញថា រថយន្ដទាំង ៤៥៥ គ្រឿងនេះ​នឹងត្រូវបែងចែកធ្វើដំណើរទៅតាមខេត្តនីមួយៗ ដោយ ៦០ គ្រឿង នឹងត្រូវទុកប្រើប្រាស់ក្នុងរាជធានីភ្នំពេញ និង ៣៩៥ សម្រាប់ដឹកប្រជាពលរដ្ឋទៅខេត្ត និងត្រឡប់មកវិញ ដោយចេញដំណើរនៅម៉ោង ៦ៈ៣០ នាទីព្រឹក។ 

សម្រាប់ទីតាំង ចេញដំណើរ ទៅតាមបណ្ដាខេត្តរដ្ឋបាលរាជធានីបានរៀបចំ ដាក់ទៅគ្រប់តាម​បណ្ដោយផ្លូវជាតិ ដូចជាលើ៖ 

• ផ្លូវជាតិលេខ ១ មាន ២ខ្សែ ពី ភ្នំពេញ-កណ្ដាល-ព្រៃវែង ១០ គ្រឿង, ភ្នំពេញ-កណ្ដាល-ស្វាយរៀង​ ១០ គ្រឿង, 
• ផ្លូវជាតិលេខ ២ មានមួយខ្សែ ភ្នំពេញ-កណ្ដាល-តាកែវ ៥ គ្រឿង, 
• ផ្លូវជាតិលេខ ៣ មាន ២ខ្សែ ភ្នំពេញ-កែប​ ១០ គ្រឿង, ភ្នំពេញ-កំពត ១០ គ្រឿង, 
• ផ្លូវជាតិលេខ ៤ មាន ២ ខ្សែ ភ្នំពេញ-កំពង់ស្ពឺ ៥ គ្រឿង, ភ្នំពេញ-ព្រះសីហនុ ១០ គ្រឿង, 
• ផ្លូវជាតិលេខ ៥ មាន ៤ខ្សែ  ភ្នំពេញ-កំពង់ឆ្នាំង ១៥ គ្រឿង, ភ្នំពេញ-ពោធិ៍សាត់ ១៥ គ្រឿង, ភ្នំពេញ-បាត់ដំបង ៦០ គ្រឿង, និង ភ្នំពេញ-បន្ទាយមានជ័យ ៦០ គ្រឿង 
• ផ្លូវជាតិលេខ ៦ ខ្សែ ភ្នំពេញ-កំពង់ធំ ១០ គ្រឿង, ភ្នំពេញ-សៀមរាប ១២០ គ្រឿង, 
• ផ្លូវជាតិលេខ ៦,៧ ភ្នំពេញ-កំពង់ចាម ១៥ គ្រឿង, ភ្នំពេញ-ត្បូងឃ្មុំ ១៥ គ្រឿង, 
• ផ្លូវជាតិលេខ ៨, ១៣ ភ្នំពេញ-ក្រចេះ ១៥ គ្រឿង និងភ្នំពេញ-ស្ទឹងត្រែង ១០ គ្រឿង។ 

សូមជម្រាបជូនថា ការផ្ដល់ជូនសេវាដឹកជញ្ជួនដោយឥតគិតថ្លៃនេះ គឺដើម្បីសម្រាលការលំបាក​ និងការចំណាយរបស់ពលរដ្ឋ ព្រមទាំងអំពាវនាវដល់ដល់ក្រុមហ៊ុន និងម្ចាស់រថយន្ដឈ្នួល ឲ្យរក្សាតម្លៃនៅដដែល កុំដំឡើងថ្លៃក្នុងឱកាសនៃការធ្វើបុណ្យទាន  ដើម្បីរួមចំណែកសម្រួលជីវភាពរស់នៅរបស់បងប្អូន ប្រជាពលរដ្ឋទាំងអស់គ្នា។ 

សម្រាប់ព័ត៌មានបន្ថែម ទាក់ទងម៉ោងចេញដំណើរ និងចំណតរថយន្ដ សូមពិនិត្យមើលលើសេចក្ដីជូនដំណឹងខាងក្រោម៖ 

ប្រភព៖ រដ្ឋបាលរាជធានីភ្នំពេញ 

អត្ថបទ៖ Andra 

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!