ដោយសារតែមើលឃើញថាចំនួនប្រជាពលរដ្ឋធ្វើដំណើរតាមរយៈរថយន្ដក្រុងសាធារណៈ ទៅលេងស្រុកមានការកើនឡើង ជារៀងរាល់ឆ្នាំ ជាពិសេសកាលពីឆ្នាំមុន រដ្ឋបាលរាជធានីភ្នំពេញ បានបន្ថែមចំនួនឡានក្រុងច្រើនជាងមុនទៅគ្រប់ទីតាំង ចេញដំណើរសម្រាប់ឆ្នាំថ្មីនេះ ដើម្បីសម្រូលឲ្យបងប្អូនប្រជាពលរដ្ឋធ្វើដំណើរកាន់តែងាយស្រួល និងបានទៅលេងស្រុកទាំងអស់គ្នា ដោយមិនត្រូវការចំណាយច្រើនលើថ្លៃសំបុត្រឡានឈ្នួល។  

យោងតាមសេចក្ដីជូនដំណឹងពី រដ្ឋបាលរាជធានីភ្នំពេញ កាលពីពេលថ្មីៗនេះ បានឲ្យដឹងថា សម្រាប់ឆ្នាំថ្មីនេះ រដ្ឋបាលរាជធានីភ្នំពេញនឹងរៀបចំរថយន្ដក្រុងចំនួន ៤៥៥ គ្រឿង ដែលច្រើនជាងឆ្នាំមុន (ចូលឆ្នាំខ្មែរ ២០២៣) ដែលមានតែ ៣៤៥ គ្រឿង។ ក្នុងរថយន្ដ ៤៥៥ គ្រឿង ៦០ គ្រឿងនឹងត្រូវទុកប្រើប្រាស់នៅ ភ្នំពេញ និង ៣៩៥ គ្រឿងទៅតាមបណ្ដាខេត្ត ហើយការផ្ដល់សេវាកម្មក៏កើនពី ៥ ថ្ងៃទៅ ៦ ថ្ងៃផងដែរ ដោយគិតចាប់ពីថ្ងៃទី ១២ ដល់ថ្ងៃទី ១៧ ខែ មេសា ឆ្នាំ ២០២៤ ជាមួយនឹងពេលវេលាចេញដំណើរគ្រប់ខ្សែទាំងពី ភ្នំពេញ ទៅបណ្ដាខេត្ត និងពីបណ្ដាខេត្ដ មកភ្នំពេញ ចាប់ផ្ដើ​​​មពីម៉ោង ៦: ៣០ នាទីព្រឹក ដល់ម៉ោង ១១: ៣០ នាទីថ្ងៃ ។ 

គូរបញ្ជាក់ថា ការផ្ដល់ជូនសេវាដឹកជញ្ជូននេះ គឺធ្វើឡើងដោយឥតគិតថ្លៃ និងមិនទាមទារត្រូវការកក់សំបុត្រ ឬឯកសារពាក់ពន្ធ័ (អត្ដសញ្ញាណបណ្ណ, កាតបុគ្គលិក,...) អ្វីឡើយ ហើយសម្រាប់ការជិះក៏មានភាពងាយស្រួល មិនមានដាក់អ្នកដំណើរលើស ចំនួនកំណ​ត់នោះទេ ហើយឆ្នាំនេះ នៅក្នុងរថយន្ដនីមួយៗនឹងមានដាក់ទឹកបរិសុទ្ធជូនអ្នកដំណើរពិសារដោយឥតគិតថ្លៃផងដែរ។ 

រដ្ឋបាលរាជធានីភ្នំពេញ ក៏សូមអំពាវនាវដល់ក្រុមហ៊ុន និងម្ចាស់រថយន្ដដឹកជញ្ជូនទាំងឡាយ ឲ្យរក្សាតម្លៃដឹកជញ្ចូនដដែល ពុំដំឡើងថ្លៃ ក្នុងឱកាសបុណ្យទានបែបនេះ ដើម្បីរួមចំណែកសម្រួលជីវភាពរស់នៅរបស់បងប្អូន ប្រជាពលរដ្ឋទាំងអស់គ្នា។

សម្រាប់ព័ត៌មានបន្ថែម ទាក់ទងម៉ោងចេញដំណើរ និងចំណតរថយន្ដ សូមពិនិត្យមើលលើសេចក្ដីជូនដំណឹងខាងក្រោម៖ 

និងស្វែងរកទីតាំងចំណត និងទិសដៅនីមួយៗតាមរយៈ QR Code នេះ៖ 

អត្ថបទ៖ Andra 

ប្រភព៖ រដ្ឋបាលរាជធានីភ្នំពេញ