បន្ទាប់ពីបង្ហាញមុខ ព្រមគ្នាជាមួយនឹងរថយន្ដអគ្គិសនី ១៦ ម៉ូដែលទៀត ក្នុងសន្និសិទ្ធសារព័ត៌មានរបស់ Toyota កាលពីខែ ធ្នូ ឆ្នាំ ២០២១​ កន្លងទៅ ថ្មីៗនេះលេចឮដំណឹងថា Toyota Cruiser អគ្គិសនី ជាមួយការរចនាទាក់ភ្នែកនេះ នឹងឈានជើងមកដល់ទីផ្សារនៅដើមឆ្នាំ ២០២៤ នេះ តែមិនប្រើអគ្គិសនីទេ។ 

តាមការចុះផ្យាយពី AutoBlog ឲ្យដឹងថា ខណៈ Toyota មានគម្រោងធ្វើ compact cruiser នេះ ជាប្រភេទឡានអគ្គិសនីសុទ្ធ ការបង្ហាញមុខជាលើដំបូងរបស់វាបានធ្វើឲ្យមានការចាប់អារម្មណ៍ពីសំណាក់អតិថិជន មកពីទីផ្សារផ្សេងៗគ្នា ដូច្នេះហើយទើបបានជា Toyota គិតថានឹងផលិត compact cruiser អគ្គិសនីនេះ ជាប្រភេទប្រើប្រាស់ឥទ្ធនៈ និង Hybrid មួយទៀតសម្រាប់តម្រូវការចង់បានតាមទីផ្សារនីមួយៗ។ 

សូមជម្រាបជូនដែរថា សម្រាប់ compact cruiser ប្រភេទឥទ្ធនៈ និង Hybrid នេះ នឹងត្រូវឲ្យឈ្មោះថា Land Hopper ដោយគេចាត់ទុកវាដូចជា​កូន Land Cruiser ខ្នាតតូច ជាមួយនឹងការប្រើប្រាស់ platform GA-F បំបែកចេញពី Land cruiser និង Sequoia គ្រាន់តែមានការរចនាបន្ថែមឲ្យទាន់សម័យ និងមានអត្តសញ្ញាណផ្ទាល់ខ្លួនរបស់វា ក៏ប៉ុន្ដែក៏មានមតិជាច្រើនលើកឡើងថា ការរចនារបស់វា ក្រលៀសមួយភ្នែកទៅ ស្រដៀងនឹង Suzuki Jimny ដែរ។  

សម្រាប់ប្រព័ន្ធម៉ាស៊ីនផ្សេងៗ Toyota មិនទាន់បានឲ្យដឹងនៅឡើយទេ តែគេសន្និដ្ខានថា Land Hopper Hybrid អាចភ្ជាប់ម៉ាស៊ីន turbocharged ១.៥ លីត្រ Hybrid ពី Corolla Cross ឬ ម៉ាស៊ីនហាយប្រីត ២.៥ លីត្រ ៤ ស៊ីឡាំងរបស់ RAV4 រីឯប្រភេទឥទ្ធនៈអាចមកជាមួយម៉ាស៊ីន ២.៨ លីត្រ ៤ ស៊ីឡាំងពី Hilux ក៏ប៉ុន្ដែ ច្បាស់យ៉ាងលាស់យ៉ាងណានោះ មានតែរង់ចាំការបង្ហាញពី Toyota ផ្ទាល់នៅក្នុងកម្មវិធី Japan Mobility Show ឆ្នាំ ២០២៣ នៅចុងខែតុលាខាងមុខនេះ។ ក្នុងនោះដែរ Land Hopper ឥទ្ធនៈ និង Hybrid អាចនឹងមានវត្តមានលើទីផ្សារ នៅរង្វង់ដើមឆ្នាំ ២០២៤ មុនប្រភេទអគ្គិសនី។ 

ប្រភព៖ AutoBlog

អត្ថបទ៖ Andra 

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!