ក្រោយពីបង្វែរផែនការថ្មីមកផ្ដោតលើការផលិតឡានអគ្គិសនី ក្រុមហ៊ុនផលិតរថយន្ដយក្សជប៉ុន Toyota កំពុងសិក្សាស្រាវជ្រាវរូបមន្ដ ផលិតថ្មឡានអគ្គិសនីដែលមានថាមពលខ្លាំងជាងមុន និងអាយុជីវិតវែងជិះបានឆ្ងាយលើស ១២០០ គម ពិសេសសាកពី ០ ទៅ ៨០% ប្រើពេលត្រឹមតែ ១០នាទី ប៉ុណ្ណោះ។​

តាមការចុះផ្សាយពី Green Car Reports បានឲ្យដឹងថា Toyota កំពុងស្ថិតក្នុងដំណាក់កាលស្រាវជ្រាវបច្ចេកវិទ្យាសាក លើថ្មប្រភេទ solid-state battery នៅក្នុងរោងចក្រ BEV Factory របស់ខ្លួន ដែលនឹងត្រូវ Toyota លាយបញ្ចូលជាមួយនឹងបច្ចេកវិទ្យាមុន​ដូចជា bipolar LFP (Lithium iron phosphate) និង​ NCM (Nickel cobalt manganese) បង្កើតជាថ្ម high performance ដែលមានប្រសិទ្ធភាពទ្វេគុណថ្មមុន រត់បានពី ១២០០ គម ទៅ ១៥០០ គម ជាមួយរយៈពេលសាកពី ០% ទៅ ៨០% តែ ១០ នាទី ដែលធៀបនឹងថ្មដែលបំពាក់លើ Toyota bZ4X បច្ចុប្បន្នដែលអាចរត់បានប្រមាណ ៣៦៦ គម និងសាកក្នុងកម្រិតដូចគ្នាប្រើពេលលើ ២០ នាទី។

តាម The Street បានឲ្យដឹងថា បច្ចេកវិទ្យាថ្ម solid-state battery ថ្មីនេះ នឹងត្រូវអភិវឌ្ឍជាបន្ដបន្ទាប់ និងចេញជាផ្លូវការរង្វង់ឆ្នាំ ២០២៧-២០២៨​ សម្រាប់ដាក់លើរថយន្ដអគ្គិសនីជំនាន់់ក្រោយៗ ដែល Toyota គ្រោងនឹងបំពាក់មុនពេលបន្ដិចលើរថយន្ដអគ្គិសនីដែលនឹងចេញពីឆ្នាំ ២០២៦​ ទៅ។  

សូមជម្រាបដែរថា ក្រោយលោក Akio Toyoda អតីតអគ្គនាយកធំ ក្រុមហ៊ុន Toyota បានផ្ទេរដំណែងទៅលោក Koji Sato អគ្គនាយកថ្មីកាលពីខែ មេសា ថ្មីៗនេះ មក Toyota បានដាកគោលដៅផ្ដោតលើការផលិតរថយន្ដអគ្គិសនីដើម្បី ដើរឲ្យទាន់តម្រូវការ​ និងដណ្ដើមទីផ្សារជាក្រុមហ៊ុនផលិតរថយន្ដដែលពេញនិយមជាងគេមកវិញ ជាមួយនឹងការបង្ហាញ concept រថយន្ដអគ្គិសនី ៣០ ម៉ូដែលដែលចេញជាបន្ដបន្ទាប់ដល់ឆ្នាំ ២០៣០។

តែទោះបីជាសម្រួចទិសដៅលើការផលិតរថយន្ដអគ្គិសនីខ្លាំងក៏ដោយ Toyota បានប្ដេជ្ញាមិនបោះបង់ចោលការផលិតរថយន្ដ ប្រើម៉ាស៊ីនចំហេះក្នុង (សាំង ម៉ាស៊ូត) នោះទេ ដោយបានធ្វើការសិក្សាលើការប្រើឥទ្ធនៈផ្សេងជំនួសវិញដូចជាអ៊ីដ្រូសែន ជាដើម ដែលខ្លួនបានសម្រេចជោគជ័យលើរថយន្ដ Toyota Mirai កន្លងមក។ 

ប្រភព៖ Green Car Reports 

អត្ថបទ៖ Andra

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!