បន្ទាប់ពីបើកឲ្យប្រើប្រាស់សាកល្បងកាលពីដើមខែមេសា កន្លងនៅ (នៅឱកាសបុណ្យចូលឆ្នាំខ្មែរ) ពេលនេះ ស្ពានបេតុងខ្សែកាបឫស្សីកែវឆ្លងទន្លេសាប និងស្ពានអាកាសឫស្សីកែវ បានសម្ភោធបើកឲ្យប្រើប្រាស់ជាផ្លូវការនៅព្រឹកថ្ងៃទី ៣១ ខែ ឧសភា ឆ្នាំ ២០២៣ នេះ ក្រោមអធិបតីភាពសម្ដេចអគ្គមហាសេនាបតីតេជោ ហ៊ុន សែន។ 

បើតាមរបាយការណ៍របស់ឯកឧត្តម ឃួង ស្រេង អភិបាលរាជធានីភ្នំពេញ បានឱ្យដឹងថា ស្ពានឫស្សីកែវឆ្លងកាត់ទន្លេសាប គឺជាប្រភេទស្ពានបេតុងខ្សែកាប ប្រវែង ៥១០ម៉ែត្រ ទទឹង ២០.៥ ម៉ែត្រ និង មាន ៦គន្លង ដែល ៣ ​ទៅ និង ៣ មក ក្នុងនោះ ២ គន្លងសម្រាប់រថយន្ត និង ១គន្លង សម្រាប់ទោចក្រយានយន្ត ដែលអនុញ្ញាតឲ្យធ្វើដំណើរលើស្ពានក្នុងល្បឿន ៤០ គម/ម៉។ ស្ពាននេះ ត្រូវបានបើកការដ្ឋានសាងសង់នៅថ្ងៃទី ២៣ តុលា ២០១៧ ប្រើពេលសម្រេច ៦៨ ខែ ជាមួយថវិកា ៣៥​ លានដុល្លារ បានមកពីមូលនិធិតំបន់អភិវឌ្ឍន៍​ជ្រោយ​ចង្វារ របស់ក្រុមហ៊ុនវិនិយោគទុនអាណិកជនកម្ពុជា (OCIC) មានទីតាំង ភ្ជាប់ពីតំបន់អភិវឌ្ឍន៍​ជ្រោយចង្វារមកផ្លូវជាតិលេខ៥ ត្រង់ចំណុចប្រសព្វផ្លូវលេខ ៣៦ ក្នុង​ខណ្ឌឫស្សីកែវ រាជធានីភ្នំពេញ។ 

ចំណែកឯស្ពានអាកាសឫស្សីកែវវិញ ស្ថិតតាមបណ្ដោយផ្លូវ​ជាតិ​លេខ ៥ ត្រង់ចំណុចប្រសព្វផ្លូវលេខ ៣៦ក្នុងខណ្ឌឫស្សីកែវ រាជធានីភ្នំពេញ បើកការដ្ឋានសាងសង់កាលពីថ្ងៃ ៣១ មករា ២០២២ ប្រើពេលសម្រេច ១៦ ខែ ជាមួយថវិកាជាង ៩ លានដុល្លារ។ ស្ពានអាកាសនេះមាន ទទឹង ៣.២៥ ម៉ែត្រ បូក ៣.៥០ ម៉ែត្រ សម្រាប់​ចរាចរទ្វេទិស មាន ២ គន្លងទៅ និង ២ មក និងកំណត់ល្បឿនបើកបរ ៤០ គម/ម៉។

សូមជម្រាបជូនដែរថា សមិទ្ធផលស្ពានទាំង ២ នេះ គឺជាការផ្សារភ្ជាប់ហេដ្ឋារចនាសម្ព័ន្ធស្ពានភ្លោះជ្រោយចង្វារ ដែលដែលដើរតួនាទី​សំខាន់សម្រាប់ការធ្វើដំណើររបស់ប្រជាពលរដ្ឋរវាងផ្លូវជាតិលេខ ៥ និងលេខ ៦ ជាពិសេសតំបន់ឫស្សីកែវ និងតំបន់អភិវឌ្ឍន៍ជ្រោយចង្វារ ឲ្យកាន់តែមានសក្តានុពលក្នុងការ​អភិវឌ្ឍ​ថែមទៀត។ 

ប្រភព៖ ក្រសួងព័ត៌មាន 

អត្ថបទ៖ Andra 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!