Volkswagen បង្ហើបរូបរាងឡាន Pick-Up អគ្គិសនី ប្លែកភ្នែក មិនចាញ់ Tesla Cyber Truck

ចំនួនអ្នកទស្សនា

អ្នកទស្សនា

200

ក្រោយ Ford បញ្ចេញឡានអគ្គិសនី Pick up F-150 Lightning របស់ខ្លួនលក់លើទីផ្សារ និងទទួលបានភាពជោគជ័យគួរឲ្យកត់សម្គាល់ ហើយ Tesla ទៀតសោតក៏ទើបប្រកាសថានឹងបញ្ចេញ Cyber truck របស់ខ្លួននៅពេលឆាប់ៗនេះផងនោះ ថ្មីៗនេះ ក្រុមហ៊ុនផលិតរថយន្ដល្បីឈ្មោះលំដាប់ពិភពលោកមួយទៀតនោះគឺ Volkswagen Group ទើបតែបានបង្ហើបប៉ាតង់ថ្មីមួយរចនាឡានអគ្គិសនី Pick up នេះដែរ។

<i>រូបភាព៖ គម្រូរថយន្ដអគ្គិសនី VW ID.Buzz pick-up</i> — *រូបភាព៖ គម្រូរថយន្ដអគ្គិសនី VW ID.Buzz pick-up*

យោងទៅតាមរូបភាព ដែលបានបង្ហោះនៅលើគណនី twitter ផ្លូវការរបស់ Volkswagen ក្នុងថ្ងៃទិវារចនាពិភពលោក កាលពីពេលថ្មីៗនេះ បានបង្ហាញឲ្យឃើញថា រថយន្ដអគ្គិសនី Pick up នេះ ត្រូវបានយកគម្រូតាមរថយន្ដអគ្គិសនី ID.Buzz ដែលមានលក្ខណៈស្រដៀងទៅនឹង VW Type 2 កាត់មួយបាំងក្រោយ ច្នៃជាទ្រុងសម្រាប់ឡាន pickup ដែលត្រូវបាន VW ដាក់ឈ្មោះថា ID.Buzz Pickup អមជាមួយនឹងពាក្យរ៉ាយរ៉ាប់មួយចំនួនស្ទាបស្ទង់ចំណាប់អារម្មណ៍ អតិថិជនរបស់ខ្លួនផងដែរ។

<i>រូបភាព៖ រថយន្ដអគ្គិសនី ID.Buzz ដែល ID.Buzz pickup យកគម្រូតាម</i> — *រូបភាព៖ រថយន្ដអគ្គិសនី ID.Buzz ដែល ID.Buzz pickup យកគម្រូតាម*

តាមការចុះផ្សាយពី Carscoops បានឲ្យដឹងថា VW មិនបានបញ្ចាក់ថា ID. Buzz Pickup នេះ នឹងត្រូវបំពាក់ប្រព័ន្ធផ្ដល់ថាមពលដូចគ្នាទៅនឹង ID.Buzz ធម្មតា ឬអត់ទេ តែបានបង្ហើបថានឹងកែប្រែប្រព័ន្ធនេះបន្ដិចបន្ដួចក្នុងរង្វង់ឆ្នាំ ២០២៣ ដែលបច្ចុប្បន្ន ID. Buzz ភ្ជាប់ជាមួយអាគុយថាមពល ៨២ kWh ម៉ូទ័រអគ្គិសនីថាមពល ១៥០ kW ដែលអាចផលិតកម្លាំងបាន ២០១ សេះ។

<i>រូបភាព៖ គម្រោងរចនាឡានអគ្គិសនីម៉ាកយីហោថ្មីរបស់ VW, the Scout ដែលមានប្រភេទ SUV និង Pick-Up</i> — រូបភាព៖ គម្រោងរចនាឡានអគ្គិសនីម៉ាកយីហោថ្មីរបស់ VW, the Scout ដែលមានប្រភេទ SUV និង Pick-Up

គួរបញ្ជាក់ផងដែរថា បើតាមសម្ដីរបស់លោក Scott Keogh អតីតនាយកប្រតិបត្តិរបស់ Volkswagen Group នៅអាមេរិក បានឲ្យដឹងថា បច្ចុប្បន្ននេះ VW កំពុងតែផ្ដោតចំណាប់អារម្មណ៍លើការផលិតរថយន្ដអគ្គិសនីប្រភេទ Pickup នេះ ដោយ ទើបតែបានលើកយកម៉ាកសញ្ញារថយន្ដ SUV និង Pickup របស់ខ្លួនពីមុនឈ្មោះថា Scout ត្រឡប់មកវិញ និងគ្រោងប្រែក្លាយម៉ាកសញ្ញានេះឲ្យផលិត SUV និង Pickup truck អគ្គិសនីសុទ្ធ តែម្ដង ជាមួយនឹងគម្រោងចេញលក់ សាកល្បងនៅសហរដ្ឋអាមេរិកដំបូងនៅរង្វង់នៅឆ្នាំ ២០២៦ ផងដែរ។

អត្ថបទ៖ Andra