កាលពីពេលថ្មីៗនេះសម្តេច ហ៊ុន សែន នាយករដ្ឋមន្ត្រីកម្ពុជា បានប្រកាសហាមដាច់ខាត ឡានអត់ពន្ធបើកបរលើផ្លូវស្រុកខ្មែរ និងបានអំពាវនាវឲ្យម្ចាស់រថយន្តអត់ពន្ធទាំងអស់ទៅបង់ពន្ធមុនថ្ងៃទី ៣១ ខែធ្នូ ឆ្នាំ ២០២១ ខាងមុខនេះ ។

“មិនអនុញ្ញាតឲ្យ ឲ្យមានឡានឬម៉ូតូនៅលើផ្លូវដែលគ្មានបង់ពន្ធទេ ព្រោះនេះជាប្រវត្តិសាស្ត្រច្រំដែលៗ” នេះជាប្រសាសន៍របស់សម្តេច ហ៊ុនសែន លើកឡើងនៅក្នុងពិធីសម្ពោធដាក់អោយប្រើប្រាស់ អាគាររដ្ឋបាលអគ្គនាយកដ្ឋានគយនិងរដ្ឋាករកម្ពុជាកាលពីថ្ងៃទី២៣ ខែធ្នូ ឆ្នាំ២០២១ កន្លងទៅនេះ ។ 

ក្នុងដែរ អគ្គនាយកដ្ឋានគយនិងរដ្ឋាករកម្ពុជាបានអំពាវនាវ និងលើកទឹកចិត្តដល់ ម្ខាស់រថយន្តទៅបង់ពន្ធយ៉ាងយូរត្រឹមថ្ងៃទី៣១ ខែធ្នូ ឆ្នាំ២០២១ នេះដើម្បីទទួលបានការអនុគ្រោះបន្ធូរបន្ថយពន្ធ និងអាករចំនួន ១០% ចំពោះម្ចាស់រថយន្តចង្កូតឆ្វេងគ្មានពន្ធ។ 

ចំណែកម្ចាស់រថយន្តចង្កូតស្តាំគ្មានពន្ធតម្រូវអោយតម្កល់ប្រាក់ពន្ធនិងអាករដើម្បីទទួលបានការអនុគ្រោះបន្ធូរបន្ថយពន្ធអាករចំនួន១០% និងត្រូវកែចង្កូតពីស្តាំមកឆ្វេងឲ្យបានរួចរាល់យ៉ាងយូរត្រឹមថ្ងៃទី៣០ ខែមិថុនា ឆ្នាំ២០២២។ 

ប្រសិនបើម្ចាស់រថយន្តមិនបានទៅបង់តាមការកំណត់ទេ នោះម្ចាស់រថយន្តចង្កូតឆ្វេងនិងតម្រូវអោយបង់ពន្ធអាករពេញ លេញ គិតចាប់ពីថ្ងៃទី០១​ ខែមករា ឆ្នាំ២០២២ ដល់ថ្ងៃទី៣០ ខែមិថុនា ឆ្នាំ២០២២ ។ ហើយចាប់ពីថ្ងៃទី០១ ខែកក្កដា ឆ្នាំ២០២២ តទៅ រថយន្តគ្មានពន្ធនិងត្រូវរងការបង្ក្រាបយ៉ាងតឹងរុឹង ចំណែកឯរថយន្តចង្កូតស្តាំនិងត្រូវដោះ បំបែកជា គ្រឿងបន្លាស់ ឬកំទេចចោលតែម្តង។ 

គួរបញ្ចាក់ផងដែរថាម្ចាស់រថយន្តអាចគណនាប្រាក់ពន្ធនិងអាករប៉ាន់ស្មានសម្រាប់រថយន្តគ្មានពន្ធនិងអាករនាំចូលមានស្រាប់ក្នុងប្រទេស ដោយចូលទៅតាមតំណដែលមាននៅក្នុងគេហទំព័រហ្វេកប៊ុករបស់អគ្គនាយកដ្ឋានគយនិងរដ្ឋាករ កម្ពុជា។

អត្ថបទដោយ ៖ ម៉ីស៊ាង

…………………………………………………………………..

ដើម្បីទទួលបានព័ត៌មាន ចំណេះដឹង និងវីដេអូថ្មីៗទាក់ទងនឹងរថយន្ដសូម ៖

Follow Facebook Page : 👉 Advan Auto 

Subscribe Youtube Channel : 👉Advan Auto 

Follow TikTok : 👉Advan Auto 

Follow Instagram : 👉Advan Auto