Infiniti ជាក្រុមហ៊ុនបុត្រសម្ព័ន្ធរបស់ Nissan ក្នុងគោលបំណងនាំចូលទីផ្សារអាមេរិក និងអ៉ឺរ៉ុប ហើយក៏ជាប្រភេទឡាន Luxury Car ដើម្បីប្រកួតប្រជែងជាមួយដៃគួររបស់ខ្លួនផងដែរ។ 

Infiniti មិនខុសពីឡាន Lexus ដែលជាបុត្រសម័្ពន្ធរបស់ Toyota នោះទេ ហើយក៏មានច្រើនជម្រើសប្រភេទម៉ូឌែលមិនចាញ់ក្រុមហ៊ុនផ្សេងៗឡើយ។ ហើយសម្រាប់ Infiniti FX ជំនាន់ទី១ ឆ្នាំ២០០៣ ដល់២០០៦នេះដែរ ក៏ឃើញមានចររាចណ៍នៅស្រុកខ្មែរគួរសម។ 

វាជាប្រភេទ Crossover SUV ដែលមានរូបរាងទាន់សម័យ ខ្ពស់ស្រឡាស់ និងខាងក្នុងទូលាយល្អផងដែរ ពិសេសកម្លាំងម៉ាស៊ីនខ្លាំងមិនធម្មតានោះទេ។

Infiniti FX ជំនាន់ទី១នេះ ប្រើជាមួយម៉ាស៊ីនសាំងទំហំ ៦ស៊ីឡាំង ចំណុះ ៣.៥លីត្រ ផលិតកម្លាំង ២៨០សេះ កម្លាំងរមួល ២៧០ផោនហ្វីត រត់ដោយប្រអប់លេខ ៥វគ្គអូតូ បង្វិលកង់ដោយប៉ុង១ (RWD) និងប៉ុង២ (AWD) ជាមួយនឹងល្បឿនអតិបរិមា ២២០គីឡូម៉ែត្រ/ម៉ោង អាចជាន់ស្ទុះពី០ ទៅ ១០០គីឡូម៉ែត្រប្រើពេលត្រឹម ៧វិនាទីប៉ុណ្ណោះ។

ចំពោះកម្រិតស៊ីសាំងវិញក្នុង១០០គីឡូម៉ែត្រចំណាយខ្ទង់ ១១លីត្រ ទៅ ១៦លីត្រ ឬអាចលើសខ្វះតិចតួចទៅតាមការបើកបរជាក់ស្ដែង។

Infiniti មួយម៉ូឌែលនេះប្លុកម៉ាស៊ីនជាន់ Smooth ស្ទុះល្អណាស់ គួបផ្សំជើងក្រោមហាប់ណែនមាំល្អទៀត អាចនិយាយបានថាពពួក Lexus ស៊េរីឆ្នាំដូចគ្នាល្មមហក់អត់រួចទេ។ 

រូបរាងស្អាត់ប្លែក ឆ្នាំទាប់មែនតែចង្កៀងមុខប្រើប្រភេទគុជ HID ភ្លឺច្បាស់គ្រាន់បើ អមដោយពិលកាង ជាមួយនឹងស្ដុបក្រោយ LED ផងដែរ។

វាមានប្រវែង ៤៨០៣ម.ម ទទឹង ១៩២៥ម.ម កម្ពស់ ១៦៥០ម.ម ពីដីមកបាត ១៩២ម.ម ជាមួយនឹងទម្ងន់ជិត ២តោនឯណោះ។

ខាងក្នុងស្រឡះល្អ បំពាក់កៅអីស្បែក២ជួរ ជំនួយដោយអេឡិចត្រនិច មានមុខងារកំដៅកៅអី អាចជិះបានគ្នា ៥ទៅ៦នាក់ និងសល់ឃ្លុបក្រោយអាចដាក់អីវ៉ាន់បានច្រើនគួរសម។ ស៊េរីឆ្នាំទាប់ៗបែបនេះមិនមានបំពាក់ Smart Key នោះទេ តែក៏មានអេក្រង់ LCD ទំហំ ៨អីញសម្រាប់មើលផែនទី កាមេរាក្រោយផងដែរ។ ក្រៅពីនឹងក៏ឃើញមានរន្ធម៉ាស៊ីនត្រជាក់សម្រាប់កៅអីក្រោយ ដំបូលបើក ពោងសុវត្ថិភាពជុំវិញ ជាមួយនឹង Speaker ៨គ្រាប់ប្រភេទ Bose ផងដែរ។

សម្រាប់តម្លៃវិញភាគជាច្រើនជាប្រភេទស្លាកលេខពីឆ្នាំ២០០៣ ដល់២០០៦ ចន្លោះពី ១ម៉ឺនដុល្លារស្ដើង ទៅ១ម៉ឺនដុល្លារក្រាស់ អាស្រ័យលើឆ្នាំផលិត ពណ៍ Option និងភិនភាគជាក់ស្ដែងជាដើម។

សរុបមក Infiniti ជំនាន់ទី១ ឆ្នាំ០៣ ដល់ ០៦នេះ ទាំងរូបរាងខាងក្រៅ និងខាងក្នុងជាមួយនឹងសមត្ថភាព អាចចាត់ជាឡានលំដាប់ជួរមុខដែរក្នុងឆ្នាំផលិតប្រហាក់ប្រហែលគ្នា ហើយតម្លៃក៏ធូរគួរសមទៀត។ តែអ្វីដែលជាហេតុមិនសូវជាពេញនិយមនៅស្រុកខ្មែរនោះគឺ គ្រឿងពពួក Nissan ថ្លៃគួរសមពិសេសស៊េរីឡានដែលមិនសូចសម្បូរដូច Infiniti នេះទៀតអាចរឹតថ្លៃជាងស៊េរីឡានផ្សេងៗ។

ម៉្យាងទៀតម៉ាស៊ីនធំស៊ីសាំងច្រើនមិនចាញ់ RX330នោះទេ បូករួមទាំងទីផ្សារពិបាកលក់ចេញផង ទើបជាហេតុមិនសូវឃើញមុខ Infiniti ញឺកញាប់ដូចជាពពួកឡាន Toyota ឡើយ៕

ដោយ៖ Bunsak