សម្រាប់ម៉ូឌែល Previa នៅស្រុកខ្មែរហាក់មានអ្នកស្គាល់តិចតួចណាស់ ព្រោះមិនសូវបានឃើញមិនសម្បូរ ហើយក៏មិនសូវពេញនិយមផងដែរ។

តែកុំបារម្ភឲ្យតែស្គាល់ Advan Auto មិនថាឡានក្នុងស្រុកម៉ូឌែលអ្វីទេ កម្មវិធីបទបង្ហាញរថយន្ដមួយទឹក តែងតែបើកកកាយជូនបងប្អូនឲ្យបានស្គាល់តែម្ដង ទាក់ទងនឹងកម្លាំងម៉ាស៊ីន ភិនភាគ នឹងតម្លៃទីផ្សារជូនបងប្អូន ដើម្បីជាមូលស្ថានគ្រឹះ ក៏ដូចជាព័ត៍មាន សម្រាប់ឲ្យបងប្អូនអាចថ្លឹងថ្លែង​ សម្រាប់ពិចារណាមុនទិញប្រើជាដើម។

Previa ជាប្រភេទឡាន Minivan ៧កៅអីត្រូវបាន Toyota ផលិតដំបូងនៅឆ្នាំ១៩៩០ មុន Sienna ដល់ទៅ៧ឆ្នាំ ដូច្នេះអាចនិយាយបានថាវាជាសិស្សច្បងរបស់ Toyota Sienna ផងដែរ។ សម្រាប់ស្រុកខ្មែរឃើញមានប្រើខ្លះដែរជាស៊េរីឆ្នាំ ២០០៧ ដល់ ២០០៩ ដែលស្ថិតក្នុងជំនាន់ទី៣ ។

ជាប្រភេទឡាន Minivan ទ្វា៥ មានប្រវែងសរុប ៤៧៩៦ម.ម ទទឹង ១៨០១ម.ម កម្ពស់ ១៧៥០ម.ម ពីដីមកបាត ១៥៥ម.ម ទម្ងន់ ១៨០០គីឡូក្រាម។ 

ឡាន Minivan មួយនេះអាចនិយាយបានថាប្រើម៉ាស៊ីនដូចគ្នានឹង Toyota Camry ឡែនចំណែករូបរាងក៏ដូចត្រីបារឡែនផងដែរ។ 

ចំពោះផ្នែកប្លុកម៉ាស៊ីនមានច្រើនជម្រើស តែភាគច្រើនទូទៅស្រុកខ្មែរឃើញប្រើម៉ាស៊ីន ៤ស៊ីឡាំង ២.៤លីត្រ ផលិតកម្លាំងបាន ១៧០សេះ កម្លាំងរមួល ១៦៥ផោនហ្វីត រត់ដោយប្រអប់លេខ ៤វគ្គអូតូ បង្វិលកង់ដោយប្រភេទប៉ុង១ FWD និងប៉ុង២ AWD ជាមួយកម្រិតស៊ីសាំងចន្លោះពី ៨លីត្រជាង ទៅ ១១លីត្រជាង ក្នុង១០០គីឡូម៉ែត្រ ឬអាចលើសខ្វះតិចតួចទៅតាមស្ថានភាពជាក់ស្ដែង។

ចំពោះផ្ទៃខាងក្នុងរាងស្រដៀងទៅនឹង Sienna ដែរម្យ៉ាងទៀតមិនសាមញ្ញប៉ុន្មានទេសម្រាប់ឡាន Previa មួយនេះ។ ឃើញបំពាក់កៅអីស្បែក ៣ជួរអាចជិះបាន ៧នាក់ ទូលាយគ្រាន់បើចំពោះពពួក Option ខ្ពស់ៗឬជាប្រភេទ Full Option វិញមានបំពាក់នៅប្រព័ន្ធ Smart Key ប៉ូតុង Power ទ្វាបើកសងខាងអូតូ  ចំណែកជួរកណ្ដាលមានជើងទម្រផងដែរ។ 

ក្រៅពីនឹងក៏ឃើញមានអេក្រងថាច់ ៨អីញ កាមេរ៉ាក្រោយ ជំនួយដោយសេនស័រចូលចត ដំបូលបើកពីរតង់ Speaker ៨គ្រាប់ ពោងសុវត្ថិភាពមួយជុំវិញ នឹង DVD ក្រោយផងដែរ។

បើនិយាយពីតម្លៃវិញរាងធូថ្លៃគ្រាន់បើដែរ ឃើញទីផ្សារដាក់ខ្ទង់ ១ម៉ឺនដុល្លារ ទៅ ១ម៉ឺនស្ដើងបន្ដិច អាស្រ័យលើឆ្នាំ ផលិត ពណ៌ Option នឹងភិនភាគឡានជាក់ស្ដែង។

សម្រាប់បងប្អូនវិញយល់យ៉ាងណាដែរចំពោះ Toyota Previa Minivan 7កៅអីមួយនេះ? បងប្អូនដែលមានមតិយោបល់ បទពិសោធន៌ នឹងព័ត៍មានបន្ថែម អាចចែករំលែកបាន៕

ដោយ៖ Bunsak 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ។

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!