Trailblazer ហាក់ពេញនិយម នឹងសម្បូរប្រើគួរសមសម្រាប់ស៊េរីឆ្នាំ២០១៧ដល់២០២០ ហើយក៏ជាឡានថ្មីខ្លាញ់គោប្រើស្រុកខ្មែរផងដែរ។

ចំពោះពពួកឆ្នាំ២០១៧ដល់ឆ្នាំ ២០២០ មានរូបរាងដូចគ្នា ស្ថិតក្នុងប្រភេទ SUV ខ្នាតមធ្យមកៅអី ៣ជួរ អាចជិះបាន ៧នាក់ ជាមួយតម្លៃទីផ្សារបច្ចុប្បន្នខ្ទង់ ២ម៉ឺនដុល្លារជាង ទៅ៣ម៉ឺនដុល្លារជាង អាស្រ័យលើ ពណ៌ ឆ្នាំផលិត ជម្រើសប៉ុង១ ឬប៉ុង២ នឹងភិនភាគឡានជាក់ស្ដែងជាដើម។

Trailblazer មានរូបរាង នឹងការឌីស្សាញដូចទៅនឹង Pick Up Chevrolet Colorado ដែលជាបងប្អូនក្នុងគ្រួសារ។
សម្រាប់ SUV មួយនេះវិញមានប្រវែង ៤៨៨៧ម.ម ទទឺង ២១៣២ម.ម​ កម្ពស់ ១៨៥១ម.ម ពីដីមកបាតឡាន ២៥ម.ម ទន្ងន់២តោនជាង និងអាចផ្ទុកទម្ងន់បន្ថែមបានជិត ៨០០គីឡូក្រាមឯណោះ។

ទាំងផ្នែកខាងក្នុងនឹងខាងក្រៅ Trailblazer អាចខុសប្លែកគ្នាអាស្រ័យទៅតាម Trim/Option ដូចជា LT (ប្រភេទប៉ុង១) នឹង LTZ (ប្រភេទប៉ុង២)។ 

និយាយរួមចំពោះប្រភេទ LTZ ប៉ុង២វិញខាងក្រៅមានពិលកាង ប្រើចង្គៀងគុជប្រភេទ HID រាងភ្លឺច្បាស់គ្រាន់បើ អមដោយ Daytime Running Light ជាមួយនិងស្ដុបក្រោយ LED ផងដែរ។

ខាងក្នុងបំពាក់ដោយកៅអីស្បែកជំនួយដោយអេឡិចត្រនិច, មានអេក្រង់ LCD ៨អីញ អាចភ្ជាប់ Bluetooth GPS និងសម្រាប់មើលកាម៉េរាក្រោយ មានសេនស័រជំនួយពេលចូលចត និងមានមុខងារជាច្រើនទៀតផងដែរ។ 

ចូលដល់ប្លុកម៉ាស៊ីនវិញ SUV អាមេរិកមួយនេះប្រើម៉ាស៊ីនម៉ាស៊ូត ៤ស៊ីឡាំង ២.៨លីត្រ ជំនួយដោយ Turbo អាចផលិតកម្លាំងបាន ២០០សេះ កម្លាំងរមួល ៥០០ញ៉ូតុនម៉ែត្រ រត់ដោយប្រអប់លេខ ៦វគ្គអូតូ បង្វិលកង់ដោយជម្រើសប៉ុង១ 2WD នឹងប៉ុង២ 4WD ជំនួយដោយប្រព័ន្ធកាប់ពីតាស់ នឹង Lock ប៉ុងផងដែរ ជាមួយកម្រិតស៊ីប្រេងចន្លោះពី ៨លីត្រទៅ ១២លីត្រក្នុង១០០គីឡូម៉ែត្រ ឬអាចលើសខ្វះតិចតួចទៅតាមស្ថានភាពជាក់ស្ដែង។

សម្រាប់បងប្អូនវិញយល់យ៉ាងណាដែរចំពោះ Chevrolet Trailblazer 2017-2020 មួយនេះ? កាន់លុយខ្ទង់ ២ម៉ឺនដុល្លារជាង ទៅ៣ម៉ឺនដុល្លារ ចង់ជិះ SUV គិតថាគួរពិចារណាជាមួយ ឡានអាមេរិកមួយនេះដែរអត់? សម្រាប់បងប្អូនដែលមានមតិយោបល់ បទពិសោធន៌ នឹងព័ត៍មានបន្ថែម អាចចែករំលែកបាន៕ 

ដោយ៖ Bunsak 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ។

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!