ត្រកូល Colorado អាចនិយាយបានថាជាកំពូល Pick Up មួយរបស់អាមេរិកដែលចេញពីក្រុមហ៊ុន Chevrolet ក្នុងចំណោម Pick Up ផ្សេងទៀត ជាមួយរូបរាងទាក់ភ្នែកគ្រាន់បើ ម្យ៉ាងបើនិយាយពីភាពធន់ នឹងសន្សំសំចៃវិញ អាចទុកចិត្តលើឡានម៉ាស៊ីន អាមេរិកនេះបាន។

សម្រាប់ជំនាន់ទី២ ចាប់ពីស៊េរីឆ្នាំ ២០១៧ដល់២០២០ ក្រុមហ៊ុនក្នុងស្រុកបាននាំចូលមកលក់ជាហូហែ ក្រោយមកទៀតក៏ស្ងាត់រហូតមកទល់នឹងបច្ចុប្បន្ននេះ ខណៈនៅទីផ្សារអន្តរជាតិ ពពួកជំនាន់ទី៣ All New Colorado 2023 ចេញលក់ហើយ នឹងមានប្រើជាហូហែផងដែរ។

ចំពោះវត្តមានស៊េរីចុងក្រោយ អាចនឹងមានលក់នៅស្រុកខ្មែរឬអត់នោះ នៅមិនទាន់ច្បាស់នៅឡើយទេ ប៉ុន្ដែសម្រាប់បងប្អូនដែលចង់ជិះ ត្រកូល Colorado មួយនេះ អាចមើលពពួកឆ្នាំ ២០១៧ដល់២០២០ នេះបាន។

ចំពោះតម្លៃវិញទីផ្សារបច្ចុប្បន្នឃើញដាក់លក់ខ្ទង់ ២ម៉ឺនដុល្លារស្ដើង ទៅ ២ម៉ឺនដុល្លារក្រាស់បន្ដិច អាស្រ័យលើ ឆ្នាំផលិត ពណ៌ Trim/Option នឹងភិនភាគឡានជាដើម។ ប៉ុន្ដែសម្រាប់ពពួគ High Country នៅក្បែរ ៣ម៉ឺនដុល្លារ ទៅ ៣ម៉ឺនដុល្លារបន្ដិចផងដែរ។

Pick Up អាមេរិកមួយនេះ ប្រើម៉ាស៊ីនម៉ាស៊ូត ៤ស៊ីឡាំង ២.៨លីត្រ ជំនួយដោយ Turbo អាចផលិតកម្លាំង ២០០សេះ កម្លាំងរមួលដល់ទៅ ៥០០ ញូតុនម៉ែត្រ រត់ដោយប្រអប់លេខ ៦វគ្គអូតូ បង្វិលកង់ដោយប៉ុង ២ 4WD ជំនួយដោយប្រព័ន្ធ Lock ប៉ុង (LSD) និងកាប់ពីតាស់ផងដែរ។

ជាមួយកម្រិតស៊ីប្រេងខ្ទង់ ៧លីត្រជាង ទៅក្បែរ ១០លីត្រប៉ុណ្ណោះក្នុង១០០គីឡូម៉ែត្រ ឬអាចលើសខ្វះតិចតួចទៅតាមស្ថានភាពបើកបរជាក់ស្ដែង។

ចំពោះផ្ទៃខាងក្នុងវិញ មានភាពខុសប្លែកគ្នាទៅតាម Option នឹងឆ្នាំផលិតដូចជា LTZ និង High Country សម្រាប់ LTZ មានបំពាក់កៅអីពូកស្បែក ២ជួរ ជំនួយដោយអេឡិចត្រូនិច អេក្រង់លើតាបឡូវ ៩អ៊ីញមានភ្ជាប់ជាមួយកាមេរ៉ាក្រោយ និង Apple CarPlay & Android Auto Speaker ៧គ្រាប់ និងមុខងារច្រើនមួយចំនួនទៀតបញ្ជាលើដៃចង្កូតផងដែរ។ 

បើជាប្រភេទ High Country បើមើលពីខាងក្រៅខ្លះក៏មានហាយឡាយពណ៌ឆ្នូត ជាមួយនឹងស្ព័តបានៅទ្រុងខាងក្រោយ ចំណែកផ្នែកខាងក្នុងវិញ មានសភាពពណ៌កាហ្វេ ខុសពី LTZ មានពណ៌ប្រផេះក្រម៉ៅ ជាមួយភាពទំនើបមួយចំនួនទៀតជាដើម។

សម្រាប់បងប្អូនវិញយល់យ៉ាងណដែរចំពោះ Colorado 2017-2020 មួយនេះ បងប្អូនដែលមានមតិយោបល់ បទពិសោធន៌ នឹងព័ត៍មានបន្ថែម អាចចែករំលែកបាន៕

ដោយ៖ Bunsak 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ។

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!