ម៉ូឌែល IS200t ជាប្រភេទឡាន Sedan ទ្វា៤ បែបស្ព័ររបស់ Lexus ដែលស្រុកខ្មែរមានប្រើច្រើនគួរសម ពិសេសពពួកជំនាន់ទី៣ ស៊េរីឆ្នាំ២០១៦ ដែលមានការផ្លាស់ប្ដូររាងថ្មី មើលទៅកាន់តែស្ព័រ នឹងទាក់ភ្នែកគ្រាន់បើ។

IS200t 2016 កាលខ្ទង់ ១ឆ្នាំមុនអាចនិយាយបានថាមិនមានឡើយតម្លៃក្រោម ៣ម៉ឺនដុល្លារ ប៉ុន្ដែបច្ចុប្បន្នឃើញមានទីផ្សារដាក់លក់ច្រើនគួរសមជាមួយតម្លៃខ្ទង់ ២ម៉ឺនដុល្លារក្រាស់ ទៅ ៣ម៉ឺនដុល្លារស្ដើង ឡានខ្លះក៏លើ ៣ម៉ឺនដុល្លារស្ដើងផងដែរ អាស្រ័យលើពណ៌ Option ប្រភេទស្លាកលេខឬក្រដាសពន្ធ នឹងភិនភាគឡានជាក់ស្ដែង។

ឡាន Sedan បែបស្ព័រមួយនេះមានប្រវែង ៤៦៦៥ម.ម ទទឹង ១៨១០ម.ម កម្ពស់ ១៤៣០ម.ម ពីដីមកបាតឡាន ១៣៤ម.ម ជាមួយទម្ងន់ ១តោនកន្លះឯណោះ។

ចំពោះភាពទំនើបដែលបំពាក់មកអាចខុសប្លែកគ្នាទៅតាម Option/Trim ដូចជា៖ Standard, Premium, Premium Plus, Luxury, និង F-Sport ជាដើម។

ត្រកូល IS 200t ដែលសម្បូរប្រើនៅស្រុកខ្មែរជាទូទៅឃើញប្រើម៉ាស៊ីន ៤ស៊ីឡាំង ២.០លីត្រ ជំនួយដោយ Turbo ផលិតកម្លាំងបាន ២៤១សេះ កម្លាំងរមួល ២៥៨ផោនហ្វីត រត់ដោយប្រអប់លេខ ៨វគ្គអូតូមាន Paddle Shift បង្វិលកង់ដោយប៉ុងក្រោយ ជំនួយដោយ Drive Mode មាន Eco, Normal, Sport និងជំនួយដោយមុខងារបើកបរលើផ្លូវរអិល Snow Mode ផងដែរ។ 

ចំពោះសន្ទុះល្បឿនវិញ IS អាចជាន់ពី ០ ទៅ ១០០គីឡូម៉ែត្រចាយពេល ៦.៩វិនាទី អាចរត់លឿនបំផុត ២៣០គីឡូម៉ែត្រ/ម៉ោង ជាមួយកម្រិតស៊ីសាំងខ្ទង់ ៨លីត្រ ទៅ ១១លីត្រជាងក្នុង ១០០គីឡូម៉ែត្រ ឬអាចលើសខ្វះតិចតួចអាស្រ័យលើស្ថានភាពជាក់ស្ដែង។

សម្រាប់បងប្អូនវិញយល់យ៉ាងណាដែរចំពោះ Lexus IS200t 2016 មួយនេះ? បងប្អូនដែលធ្លាប់ប្រើ ឬមានបទពិសោធន៌ នឹងព័ត៍មានបន្ថែមអាចចែករំលែកបាន៕

ដោយ៖ Bunsak 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ។

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!