និយាយពី Minivan ៧កៅអីរបស់ Honda ហាក់មិនសូវមានអ្នកស្គាល់ដូចពពួក Toyota នឹង Hyundai ឡើយ។​ ជាក់ស្ដែងដូច Odyssey ឃើញមានប្រើតិចតួចដែរនៅស្រុកខ្មែរយើង ជាមួយតម្លៃទីផ្សារធូរល្មមប្រើដែរ គ្រាន់តែមិនសម្បូរដូច Minivan ផ្សេងៗ។

Odyssey ជាប្រភេទឡានវែងល្មមបំពាក់កៅអី ៣ជួរជាមួយប្រវែងសរុប ៥១០៥ម.ម ទទឹង ១៩៥៨ម.ម កម្ពស់ ១៧៤៧ម.ម ជាមួយទម្ងន់ដល់ទៅ ២តោនឯណោះ។

ស្រុកខ្មែរឃើញមានភាគច្រើនជាស៊េរីឆ្នាំ ២០០៥ដល់២០១០ ដែលប្រើម៉ាស៊ីនសាំងទំហំ ៦ស៊ីឡាំង ៣.៥លីត្រ ផលិតកម្លាំងបាន ២៤៤សេះ កម្លាំងរមួល ២៤០ផោនហ្វីត រត់ដោយប្រអប់លេខ ៥វគ្គអូតូ បង្វិលកង់ដោយប៉ុង១ FWD ជាមួយកម្រិតស៊ីសាំងចន្លោះពី ១០លីត្រជាង ទៅ ១៤លីត្រជាង ក្នុង១០០គីឡូម៉ែត្រ។

ផ្នែកខាងក្នុងវិញ មិនខុសប្លែកពីពពួក Toyota Sienna ប៉ុន្មានឡើយ បើជាពពួក Full Option វិញរាងទំនើបបន្ដិចដោយបំពាក់កៅអីស្បែក ៣ជួឬ ជំនួយដោយអេឡិចត្រូនិចនៅជួរមុខ និងមានមុខងារកម្ដៅ ជាមួយអេក្រង់ថាច់ទំហំ ៨អ៉ីងអាចភ្ជាប់ Bluetooth កាម៉េរាក្រោយ។

ជាមួយដំបូលបើក, DVD ក្រោយសម្រាប់អ្នកដំណើរ ទ្វា២សង់ខាង និងគូទក្រោយ ចុចបិតបើកអូតូ និងអាចបញ្ជាដោយតេឡេ ហើយផ្ទៃខាងក្នុងភាគច្រើនស្រោបស្បែក មើលទៅរាងប្រណិតគួរសមដែរ។

ចំពោះតម្លៃវិញឃើញទីផ្សារដាក់លក់មួយៗ សម្រាប់ស៊េរីឆ្នាំ ២០០៥ដល់២០១០ ខ្ទង់ក្បែរ ១ម៉ឺនដុល្លារ ទៅ ១ម៉ឺនដុល្លារស្ដើងបន្ដិចប៉ុណ្ណោះ អាស្រ័យលើឆ្នាំផលិត ពណ៌ Option នឹងភិនភាគឡានជាក់ស្ដែង។

សម្រាប់បងប្អូនវិញយល់យ៉ាងណាដែរចំពោះ Minivan កៅអី៣ជួរម៉ូឌែល Honda Odyssey មួយនេះ? បងប្អូនណាខ្លះដែលមានបទពិសោធន៌ធ្លាប់ប្រើ ក៏ដូចជាមតិយោបល់ អាចចែករំលែកបន្ថែមបាន៕

ដោយ៖ Bunsak 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ។

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!