និយាយពីពពួក Camry ស៊េរីឆ្នាំ ២០០៧ ដល់ ២០០៩ ការពេញនិយមនៅតែខ្លាំង នឹងមានទីផ្សារល្អគ្រាន់បើសម្រាប់សាំងសុទ្ធ LE នឹង XLE ដែលជាទូទៅបច្ចុប្បន្ននេះសម្បូរតែពពួកស្លាកលេខ ខណៈក្រដាសពន្ធស្ទើតែគ្មានឡើយ។ ដូចនេះទើបតម្រូវការទីផ្សារពពួកស្លាកលេខច្រើន ខណៈការនាំចូលប្រភេទក្រដាសពន្ធកាន់តែតិចជាងមុន ម្យ៉ាងក្រដាសពន្ធក៏មានតម្លៃខ្ពស់ជាងស្លាកលេខមួយទឹកក្នុងស្រុកផងដែរ។

មុនចូលឆ្នាំខ្មែរមកដល់ក្នុងពេលខាងមុខនេះ ចរន្ដ៍ឡានមួយទឹកស្លាកលេខហាក់មានតម្រូវការជាងមុនប៉ុន្ដែតម្លៃមិនជាខ្ពស់ខុសធម្មតាឡើយ។ តែបើក្រឡេកមកមើលពពួក Camry 07 LE នឹង XLE ដូចជាមានទីផ្សារល្អសម្រាប់ប្រភេទស្លាកលេខ ខណៈតម្លៃវិញហាក់រាងខ្ពស់ជាងមុនខុសធម្មតាបន្ដិច បើធៀបនឹងរថយន្ដ Prius មួយទឹកស្លាកលេខ ដែលមានភាពពេញនិយមដូចគ្នា ប៉ុន្ដែតម្លៃទីផ្សារហាក់នៅដដែល។

ចំពោះតម្លៃបច្ចុប្បន្នវិញសម្រាប់ Camry ២០០៧ដល់២០០៩ មួយទឹកស្លាកលេខនៅខ្ទង់ ១៥,០០០ដុល្លារជាង​ ទៅ ២១,០០០ដុល្លារ អាស្រ័យលើ ឆ្នាំផលិត ពណ៌ Option ប្រភេទស្លាកលេខខ្ពស់ទាប នឹងភិនភាគឡានជាដើម។

គួរបញ្ចាក់ដែរថា Camry 07​ LE នឹង XLE ប្រើម៉ាស៊ីន ៤ស៊ីឡាំង ២.៤ លីត្រ ផលិតកម្លាំង ១៥៨ សេះ កម្លាំងរមួល ១៦២ផោនហ្វីត រត់ដោយប្រអប់លេខ ៥ វគ្គអូតូ បង្វិលកង់ដោយប៉ុងមុខ (FWD) ជាមួយល្បឿនលឿនបំផុតខ្ទង់ ២០០គីឡូម៉ែត្រ/ម៉ោង ជាន់ស្ទុះពី ជាន់ស្ទុះពី ០ ទៅ ១០០គីឡូម៉ែត្រ ប្រើរយៈពេល ៧.៤ វិនាទី។

ជាមួយកម្រិតស៊ីសាំងខ្ទង់ ៩លីត្រ ទៅ ១១លីត្រក្នុង១០០គីឡូម៉ែត្រ ឬអាចលើសខ្វះតិចតួចអាស្រ័យលើស្ថានភាពជាក់ស្ដែង។

សម្រាប់បងប្អូនវិញយល់យ៉ាងណាដែរចំពោះ Toyota Camry LE, XLE ស៊េរីឆ្នាំ ២០០៧ ដល់ ២០០៩ មួយនេះ? តម្លៃពពួកស្លាកលេខទីផ្សារដាក់លក់ខ្ទង់ប៉ុណ្ណឹងបងប្អូនយល់យ៉ាងមិចដែរ? សម្រាប់បងប្អូនដែលមានមតិយោបល់ បទពិសោធន៌ នឹងព័ត៍មានបន្ថែម អាចចែករំលែកបាន៕

ដោយ៖ Bunsak 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ។

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!