កាលពីថ្ងៃទី ២៣ ខែ កុម្ភៈ ម្សិលមិញនេះ ឯកឧត្តមទេសរដ្ឋមន្ដ្រី ស៊ុន ចាន់ថុល និងគណប្រតិភូក្រសួងសាធារណការ និងដឹកជញ្ជូន បានចុះត្រួតពិនិត្យដំណើរការងារបច្ចេកទេស និងវឌ្ឍនភាព គម្រោងលើកកម្រិតគុណភាពផ្លូវជាតិលេខ៤ ប្រវែង ១៩៦ គីឡូម៉ែត្រ ដែលរំពឹងថានឹងរួចរាល់សព្វគ្រប់ក្នុងឆ្នាំ២០២៥។ 

តាមប្រសាសន៍ឲ្យដឹងពីឯកឧត្តមទេសរដ្ឋមន្ដ្រី នៅក្នុងកិច្ចសម្ភាសថា ផ្លូវនេះ នឹងត្រូវលើកកម្រិតគុណភាព និងពង្រីកទទឹងតួផ្លូវពី ៧ ម៉ែត្រ ទៅ ១០ ម៉ែត្រ ក្នុងនោះប្រវែង​ ៤០ គីឡូម៉ែត្រ នឹងត្រូវពង្រីកពី ២​គន្លង ទៅ ៤ គន្លង។

ឯកឧត្តមបានបន្ថែមថា បើតាមផែនការគ្រោងទុកផ្លូវប្រវែង ១៧០គីឡូម៉ែត្រ នឹងរួចរាល់នៅដំណាច់ឆ្នាំ ២០២៣ នេះ, ប្រវែង ២៦ គីឡូម៉ែត្រ ទៀតនឹងបញ្ចប់នៅឆ្នាំ ២០២៤។ រីឯ ស្ពានចាស់ចំនួន២៤កន្លែង នឹងត្រូវពង្រីកទំហំទទឹងរហូតដល់១០ម៉ែត្រ ព្រមជាមួយនឹងការសាងសង់ស្ពានថ្មីចំនួន ០៨កន្លែង បន្ថែម ដែល ០២កន្លែង ជាទីតាំងដែលតែងតែរងគ្រោះដោយទឹកជំនន់ជារៀងរាល់ឆ្នាំ ហើយគម្រោងស្ពានទាំង ៣២​ កន្លែងនេះ នឹងរួចរាល់នៅឆ្នាំ ២០២៥។ លើសពិនេះ ក៏មានការជួសជុលស្ថានីយ៍ថ្លឹងរថយន្ដចំនួន ៤ ទីតាំងផងដែរ។ 

ឆ្លៀតក្នុងឱកាសនេះ ផងដែរ ឯកឧត្តមក៏បានក្រើនរំឭកដល់បងប្អូនប្រជាពលរដ្ឋ ជាពិសេសក្រុមហ៊ុនដឹកជញ្ជូន ទាំងអស់ ដឹកជញ្ជូនទំនិញ កុំឲ្យលើសកម្រិតកំណត់ដោយច្បាប់ ព្រោះវាជាកត្ដាមួយបណ្ដាលឲ្យផ្លូវថ្នល់ឆាប់សឹករិចរិល និងខូចខាត។ 

សូមជម្រាបជូនដែរថា ផ្លូវជាតិលេខ៤ គឺជាផ្លូវជាតិតភ្ជាប់ពី រាជធានីភ្នំពេញ ទៅកាន់ទីក្រុងកំពង់ផែភាគនិរតី ដែលជាកំពង់ផែសមុទ្រអន្តរជាតិតែមួយគត់របស់កម្ពុជា ហើយការលើកកម្ពស់កម្រិតគុណភាពនេះ គឺដើម្បីសម្រួលដល់ការដឹកជញ្ជូនទំនិញរវាង រាជធានី និងកំពង់ផែ ដោយរថយន្តដឹកទំនិញធុនធ្ងន់ និងកុងតឺន័រ ស្របតាមកំណើនសេដ្ឋកិច្ចកម្ពុជាបច្ចុប្បន្ន។ 

ប្រភព៖ ក្រសួងសាធារណការ និងដឹកជញ្ជូន 

អត្ថបទ៖ Andra