ត្រកូល Corolla ក្នុងបរិបទស្រុកខ្មែរទោះបីជាមិនទំនើបណាស់ណាបើធៀបជាមួយរថយន្ដឆ្នាំដូចគ្នាក្នុងគ្រួសារ ក៏វានៅតែពេញនិយមក្នុងការប្រើប្រាស់ ព្រោះតែភាពធន់ សន្សំសំចៃ គ្រឿងបន្លាស់ធូរ និងទីផ្សារលក់ចេញទិញចូលនៅណឹងគ្រាន់បើ។ ហើយអ្វីដែលប្លែកសម្រាប់ Corolla ជំនាន់ទី១១ ឆ្នាំ០១៤នេះ គឺត្រូវបាន Toyota ធ្វើការផ្លាស់ប្ដូរច្រើនស្ទើតែទាំងស្រុងតែម្ដង។ 

តែអ្វីដែលចម្លែកនោះគឹ Corolla ឆ្នាំ០១៤មួយនេះ ត្រូវបាន Toyota បំពាក់ម៉ាស៊ីន ៤ស៊ីឡាំងដដែល តែចំណុះតូចជាងសេរ៊ីមុនៗត្រឹមតែ ១.៦លីត្រប៉ុណ្ណោះ(Specs ស្រុកខ្មែរ) តែអាចផលិតកម្លាំងបាន ១៣២សេះ កម្លាំងរមួល ១១៨ផោនហ្វីត រត់ដោយប្រអប់លេខ ៤វគ្គអូតូ បង្វិលកង់ដោយប៉ុងមុខ។ ជាមួយនឹងល្បឿនអតិបរិមាជិត ២០០គីឡូម៉ែត្រ/ម៉ោង ជាចជាន់ស្ទុះពី ០ ទៅ ១០០គីឡូម៉ែត្រប្រើពេល ១០វិនាទីប៉ុណ្ណោះ។

ចំពោះកម្រិតស៊ីសាំងវិញ សន្សំសំចៃដូចអាព្រូសដែរចន្លោះពី ៥លីត្រ ទៅ ៧លីត្រប៉ុណ្ណោះក្នុង១០០គីឡូម៉ែត្រ ឬអាចលើសខ្វះតិចតួចទៅតាមស្ថានភាពនៃការបើកបរ។

និយាយពីជើងក្រោម ក៏មានការផ្លាស់ប្ដូរបំពាក់បន្ថែមថ្មីផងដែរជាមួយនឹង ព្រព័ន្ធឯករាជ្យ Independent អមដោយបូមរឺស័រ McPherson Strut ជាមួយនឹង anti-roll bar នៅផ្នែកខាងមុខ និងខាងក្រោយប្រើជា Semi-independent អមដោយរឺស័រ coil spring។ ជើងក្រោមប្រភេទនេះរឹងមាំល្អគ្រាន់បើជាងសេរ៊ីមុន ដែលវាធ្វើការទប់លំណឺងបានល្អ ទោះបីជាកាត់បន្ថយរលាក់មិនបានច្រើន តែបើជិះគ្នា៥ទៅ៦នាក់អី វាក៏មិនទន់ និងមើលទៅដាបដូចជំនាន់មុនឡើយ។ ចំណែកយាន់កង់វិញ ទំហំ ១៥អីញ ប្រើហ្វ្រាំងឌីសគៀបទាំងមុខក្រោយជំនួយដោយប្រព័ន្ធ ABS ជាមួយនឹង BA, EBD ជាដើម។ 

ចំណែកការឌីស្សាញវិញ រូបរាងទាំងមូលត្រូវបានផ្លាស់ប្ដូរថ្មីទាំងស្រុង ស្អាតប្លែក បើមើលមិនចាប់អារម្មណ៍អាចស្រដៀងទៅនឹង Toyota Camry ឆ្នាំ២០១៨ នឹងToyota Vios ឆ្នាំ២០១៥។ ជាមួយនឹងចង្កៀងមុខថ្មីរាងវែងអូសភ្ជាប់ជាមួយបាណាស្រោបដោយក្រូម អមដោយពិលកាងមួយគូ ចំណែកស្ដុបក្រោយរាងវែងបន្ដិចត្រដៀងទៅនឹងចង្កៀងមុខដែរ ដែលមើលទៅស្អាតប្លែកទាក់ភ្នែកមិនចាញ់ឡានលំដាប់ថវិកាឡើយ។

ខាងក្នុងផ្លាស់ប្ដូរជាមួយនឹងតាប់ឡូផ្នែកខាងមុខ កៅអីចង្កូតដៃទ្វាថ្មីទាំងស្រុងតែម្ដង មែលមើលទៅមានភាពធំទូលាយស្រឡាស់ល្អ និងបំពាក់នៅ Smart Key បូតុង Power Stat ជាដើម។

បើជាប្រភេទ Trim ឬ Option ខ្ពស់ៗវិញឃើញមានបំពាក់បន្ថែម ពោងសុវត្ថិភាព ៦គ្រាប់ កៅអីស្បែកបញ្ជាដោយដៃធម្មតា, ប្រើចង្កៀងមុខប្រភេទគុជ LED ពិលកាង, អេក្រង់ថាច់អាចប្រើ Bleutooth មានការមេរ៉ា ជាមួយនិងសេនស័រ៦គ្រាប់ជំនួយពេលចូលចត, កញ្ចក់ខ្ដោបអូតូ មុខងារបញ្ជាលើដៃចង្កូត ជាមួយនឹងផ្នែកជាច្រើនទៀតស្រោបស្បែករំលេចដោយថ្នេរមើលទៅស្រស់ស្អាត មិនចាញ់ឡានសេរ៊ីខ្ពស់ៗប៉ុន្មានទេ។

ចំពោះតម្លៃវិញ ទូទៅជាប្រភេទស្លាកលេខសម្រាប់ឆ្នាំ០១៤ ដល់០១៦ចន្លោះពី ១៩០០០ដុល្លារជាង ទៅ ២៤០០០ដុល្លារ អាស្រ័យលើឆ្នាំផលិត ពណ៌ Trim & Option និងភិនភាគជាក់ស្ដែងជាដើម។ ហើយតម្លៃនេះអាចនិយាយបានថាប្រហាក់ប្រហែលទៅនឹង Camry ឆ្នាំ០៧ ក្រដាសពន្ធផងដែរ។

ជារួមសម្រាប់ Corolla ជំនាន់ទី១១នេះ អាចនិយាយបានថារូបរាង និងខាងក្នុងមិនអន់ទេ ស្អាតទាក់ភ្នែក កម្រិតស៊ីសាំងវិញសន្សំសំចៃ ប្រើធន់ក៏ចំណាយតិចផងដែរ។ តែអ្វីដែលរាងស្ទើចិត្តបន្ដិចនោះគឺ ឆ្នាំខ្ពស់បច្ចេកវិទ្យាមិនសូវមានភាពទំនើបប្លែកច្រើនទេ ម៉ាស៊ីនតូច កម្លាំងសេះក៏តិច បើចងរត់ល្បឿនផ្លូវឆ្ងាយវ៉ាជែងរាងស្ទើចិត្តដែរ។

តែសម្រាប់បងប្អូនដែលមិនចូលចិត្តរត់ល្បឿនវ៉ាជែងច្រើន ប្រើលក្ខណៈគ្រួសារ បើកបរចុះខេត្តក្នុងក្រុងធម្មតា ចង់បានឡានដែលមានរាងស្អាតតម្លៃខ្ទង់២ម៉ឺនដុល្លារ អាចមើលលេងៗជាមួយ Corolla ឆ្នាំ០១៤ ដល់០១៦នេះបាន៕

ដោយ៖ BunSak