បន្ទាប់ពីធ្វើតេស្ដបានសម្រេចនៅអាល្លឺម៉ង់ កាលពីឆ្នាំ ២០២២ កន្លងទៅ ថ្មីៗនេះ រថយន្ដភ្លើងដើរដោយថាមពលអ៊ីដ្រូសែន ដំបូងគេលើពិភពលោក ត្រូវបានរដ្ឋាភិបាលប្រទេស កាណាដា សម្រេចដាក់ឲ្យដំណើរការសាកល្បងដឹកអ្នកដំណើរក្នុងតំបន់ Quebec សម្រាប់រដូវក្ដៅនេះ (ពីខែមិថុនា ដល់ តុលា ចុងឆ្នាំ ២០២៣)។​

តាមការផ្សាយពី La French FAB បានឲ្យដឹងថា រថភ្លើងដើរដោយអ៊ីដ្រូសែនដំបូងគេលើពិភពលោកនេះ ត្រូវបានផលិតដោយក្រុមហ៊ុនរថភ្លើងបារាំង Alstom នៅក្នុងប្រទេសអាល្លម៉ង់ និងឲ្យឈ្មោះថា Coradia iLint ដែលបានមកដាក់ធ្វើតេស្ដសាកល្បងជោគជ័យ លើខ្សែរថភ្លើងប្រវែង ១២៣ គីឡូម៉ែត្រ របស់អាល្លឺម៉ង់ កាលពីខែ កញ្ញា ឆ្នាំ ២០១៨ ដល់ខែ កុម្ភៈឆ្នាំ ២០២០ ហើយទើបតែសម្រេចដាក់ដំណើរការដល់អ្នកដំណើរទូទៅនៅឆ្នាំ ២០២២ ដោយប្រើប្រាស់ Cordia iLint ជំនាន់ទី ២ ដែលមានសមត្ថភាពរត់បានចម្ងាយ ១១៧៥ គម ជាមួយល្បឿន ១៤០គម/ម៉ មិនចាំបាច់ឈប់ចាក់អីដ្រូសែន ដែលធ្វើឲ្យ Coradia iLint ទាក់ទាញចំណាប់អារម្មណ៍ ប្រទេសដែលអនុវត្តគោលនយោបាយឧស្ម័នកាបូនិចស្មើសូន្យឆ្នាំ ២០៥០ ជាពិសេសប្រទេសក្នុងតំបន់អឺរ៉ុប និងអាមេរិកខាងជើងដូចជា កាណាដាជាដើម។ 

យោងតាម Business Insider បានឲ្យដឹងថា រថភ្លើងប្រើអ៊ីដ្រូសែននេះ ដំណើរការស្រដៀងគ្នាទៅនឹងប្រព័ន្ធអគ្គិសនីដែរ ដោយអីដ្រូសែនត្រូវបានគេបង្ហាប់បំបែកអេឡិចត្រុង ទៅជាអគ្គិសនីសម្រាប់ដំណើរការរថភ្លើង ហើយនៅពេលដែលវាប៉ះជាមួយអុកស៊ីសែនវាបញ្ចេញជាចំហាយជាតិទឹកមកក្រៅជំនួសផ្សែងពុល ដែលតែងឃើញពីរថយន្ដ ឬរថភ្លើងដែលប្រើប្រាស់ម៉ាស៊ូត ឬសាំងធម្មតា។ 

សូមជម្រាបដែរថា សម្រាប់ការប្រើប្រាស់ប្រព័ន្ធអ៊ីដ្រូសែននេះ ត្រូវបានក្រុមហ៊ុនផលិតរថយន្ដ ល្បីៗដូចជា Toyota, BMW, Hyundai ធ្វើលើរថយន្ដរបស់ខ្លួនដោយផ្ដល់ផលល្អគួរឲ្យកត់សម្គាល់ ដែលវាជួយដល់បរិស្ថានដោយមិនបញ្ចេញផ្សែងពុល និងអាចរត់បានឆ្ងាយជាងអគ្គិសនីធម្មតា ព្រមទាំងចំណាយពេលបញ្ចូលលឿនប្រមាណ ៥ នាទី (សម្រាប់រថយន្ដ) ខណៈអគ្គិសនីប្រើពេលជាមធ្យម ៣០នាទី ទៅ ១ ម៉ោង​ (ប្រើឆ្នាំងសាកល្បឿនលឿន)។  

Alstom ក៏បានឲ្យដឹងដែរថា បន្ទាប់ពីអាល្លឺម៉ង់ និងកាណាដា ខ្លួនកំពុងរៀបចំដាក់គម្រោងធ្វើរថភ្លើងនេះ នៅប្រទេសផ្សេងៗទៀតដែលចាប់ផ្ដើមពីអឺរ៉ុបមុនគេ ដូចជា​ អ៊ីតាលី ហូឡង់់ អូទ្រីស​ ជាដើម ដើម្បីចូលរួមសម្រេចគោលនយោបាយគ្មានការបំពុលបរិយាកាសពីឧស្ម័នពុលឆ្នាំ ២០៥០ ផងដែរ។ 

ប្រភព៖ La French LAB 

អត្ថបទ៖ Andra 

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!