Malibu ជាប្រភេទឡាន Sedan រាងបែបស្ព័ររបស់ Chevrolet សម្រាប់រូបរាងបែបនេះដែរ​ គឺចាប់ពីស៊េរីឆ្នាំ ២០១៩ ដល់ ២០២១ ហើយស្រុកខ្មែរឃើញមានប្រើខ្លះដែរ ដែលភាគច្រើនជាឆ្នាំ២០១៩ ។ Malibu អាចថាជាឡានមួយទឹកឆ្នាំខ្ពស់ ដែលមានតម្លៃធូរគ្រាន់បើមួយ ម្យ៉ាងចយររាងសម្បើមណាស់ ហើយក៏ទំនើប នឹងកម្លាំងខ្លាំងផងដែរ។

កាលចេញដំបូងថ្មីខ្លាញ់គោតម្លៃខ្ទង់ ៥ម៉ឺនដុល្លារឯណោះ ប៉ុន្ដែបច្ចុប្បន្ននេះស៊េរីថ្មីក្រោយៗលែងឃើញវត្តមានទៀតហើយ ខណៈពពួកឆ្នាំ ២០១៩ នឹង ២០២០ ប្រភេទមួយទឹកឃើញទីផ្សារដាក់លក់ចាប់ពី ២ម៉ឺនដុល្លារក្រាស់ ទៅ ៣ម៉ឺនដុល្លារស្ដើង អាស្រ័យលើ ពណ៌ Option នឹងភិនភាគឡានជាក់ស្ដែង។

ឡានសញ្ញាបូករបស់ អាមេរិកមួយនេះ ឃើញប្រើស្រុកខ្មែរភាគច្រើនបំពាក់ម៉ាស៊ីន Turbo ៤ស៊ីឡាំង ២.០លីត្រ អាចផលិតកម្លាំងបានដល់ទៅ ២៥០សេះ និងកម្លាំងរមួល ២៦០ផោនហ្វីត រត់ដោយប្រអប់លេខ ៩វគ្គអូតូ បង្វិកង់ដោយប៉ុងមុខ FWD អាចរត់ល្បឿនបំផុតបានខ្ទង់ ២០០គីឡូម៉ែត្រ/ម៉ោង ជាមួយសមត្ថភាពជាន់ស្ទុះពី ០ ទៅ ១០០គីឡូម៉ែត្រប្រើពេលត្រឹម ៦.៣វិនាទីប៉ុណ្ណោះ។ 

ចំពោះកម្រិតស៊ីសាំងវិញ ហាក់សន្សំសំចៃគ្រាន់បើ ដែលជាមធ្យមខ្ទង់ ៨លីត្រ​ ទៅ ១០លីទ្រ ក្នុង១០០គីឡូម៉ែត្រ។

ក្រៅពីការឌីស្សាញរូបរាងស្លីម ទាក់ភ្នែក នឹងទាន់សម័យ ផ្ទៃខាងក្នុងក៏មិនធម្មតាដែរ បំពាក់កៅអីស្បែក ២ជួរ អាចជិះបាន ៥នាក់ នឹងសល់ឃ្លុបក្រោយដាកអីវ៉ាន់បានច្រើនគួរសម។

សម្រាប់ Option ខ្ពស់ៗវិញឃើញភ្ជាប់មកជាមួយ  ចង្កៀងគុជ LED ប្រភេទ Adaptive កៅអីជួរមុខជំនួយដោយអេឡិចត្រនិច នឹងមុខងារត្រជាក់ អេក្រង់ថាច់នៅចំកណ្ដាល អាចភ្ជាប់ជាមួយនិង កាម៉េរាក្រោយ Apple CarPlay Android Auto, Speaker ៩គ្រាប់ប្រភេទ Bose, Wireless Charge,  មុខងារបញ្ជាឆេះពីចម្ងាយ ពោងសុវត្ថិភាពជុំវិញរថយន្ដ សេនស័រមុខក្រោយជំនួយពេលចូលចតជាដើម។

បើនិយាយពីប្រព័ន្ធបច្ចេកវិទ្យាជំនួយពេលបើកបរវិញឃើញមានដូចជា៖ 

១/ ប្រព័ន្ធផ្តល់ដំណឹង និងទប់ចង្កូតក្នុងករណីរត់ខុសគន្លងផ្លូវ Land Departure Warning and Land Keeping Assist។

២/ ប្រព័ន្ធកំណត់ល្បឿនអូតូ Adaptive Cruise Control។

៣/ ប្រព័ន្ធចាប់ហ្រ្វាំងអូតូពេលមានឧបសគ្គ Pre-Colisoin System។

៤/ ប្រព័ន្ធត្រួតពិនិត្យ និងគ្រប់គ្រងសំពាធខ្យល់គ្រប់កង់  Tires monitoring System។

៥/ ប្រព័ន្ធប្រាប់ដំណឹងពេលមានរថយន្តចង់វ៉ា រឺជែង blind Spot Monitor។ 

៦/ ប្រព័ន្ធប្រាប់ពីគ្រោះថ្នាក់ពេលបើកបរថយក្រោយ Rear Cross Traffic alert ជាដើម។

សម្រាប់បងប្អូនវិញយល់យ៉ាងណាដែរចំពោះ Chevrolet Malibu មួយនេះ? បងប្អូនដែលមានមតិយោបល់ ឬបទពិសោធន៍ នឹងព័ត៍មានបន្ថែម អាចចែករំលែកបាន៕

 ដោយ៖ Bunsak

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!