Matiz គឺជាឡានប្រភេទ City Car មួយម៉ូឌែលរបស់ក្រុមហ៊ុនកូរ៉េ Daewoo ដែលផលិតដំបូងនៅឆ្នាំ១៩៩៨ ដល់២០០៥ ក្នុងជំនាន់ទី១។ តែក្នុងនោះដែរ Daewoo ធ្វើការផ្លាស់ប្ដូរ នឹងកែប្រែតិចតួចបន្ថែមទៀត សម្រាប់ឆ្នាំ២០០១ ក្នុងជំនាន់ទី១ ហ្នឹង។

ស្រុកខ្មែរឃើញមានដាក់លក់ និងចររាចរណ៌នៅតាមដងផ្លូវជាញឹកញ៉ាប់ផងដែរ ដែលភាគច្រើនជាឆ្នាំ៩៨ ដល់ ២០០៣ ។ ចំពោះតម្លៃទីផ្សារហាងឆេងខ្ទង់ ២០០០ដុល្លារជាង​ ទៅជិត៣០០០ដុល្លារ អាស្រ័យលើឆ្នាំផលិត នឹងភិនភាគជាក់ស្ដែងជាដើម។

ថ្ងៃនេះ Advan Auto ក្នុងកម្មវិធីបទបង្ហាញរថយន្ដមួយទឹក សូមធ្វើការលើកយកនៅ Daewoo Matiz ជំនាន់ទី១មកនិយាយម្ដង ដើម្បីបើកបង្ហាញនៅចំណុចលក្ខណៈទូទៅខ្លះៗជូនបងប្អូនគ្រាន់បានកម្សាន្ដ និងជាចំណេះដឹងមួយផ្នែកផងដែរ។

១. ជាពពួកកូនឡានអម្បូរ Kia Visto ហើយក៏ស្រដៀងគ្នាខ្លះដែរបើមើលមិនចាប់អារម្មណ៌។ Matiz ជាកូនឡានដែលនិយមប្រើនៅក្នុងក្រុង ព្រោះតែកម្លាំងម៉ាស៊ីនតូច ខ្លួនខ្លី នឹងទាបល្មម ងាយស្រួលចូលចត និងបត់បែនបានល្អ។ 

ការរចនាសម្រាប់ចង្កៀងមុខប្រភេទធម្មតា លៀនៗដូចភ្នែកកង្កែប ជាប្រភេទឡាន ទ្វា៥ អាចជិះគ្នា៥នាក់ល្មម នឹងសល់ឃ្លុបក្រោយអាចទុកដាក់អីវ៉ាន់បានតិចតួចផងដែរ។

Matiz មានទំហំប្រវែង ៣៤៩៥ម.ម ទទឹង ១៤៩៥ម.ម កម្ពស់ ១៤៨៥ម.ម​ ទម្ងន់ ៨៥៣គីឡូក្រាម និងអាចដឹកបានជិត ៥០០គីឡូក្រាមឯណោះ។

ចំពោះខាងក្នុង ស្រដៀងទៅនឹង Kia Visto ដែរ ទាំងប្រវែងទំហំគឺប៉ុនគ្នា មានកៅអី២ជួរ ពោងសុវត្ថិភាព ២គ្រាប់ និងបានបំពាក់ឧបរកណ៌សាមញ្ញៗសក្កិសមជាឡានបើកបរធម្មតានៅទីក្រុង។

២.និយាយពីប្លុកម៉ាស៊ីនវិញ សម្រាប់ឆ្នាំ៩៨ដល់ ២០០០ Matiz បានប្រើជាមួយនឹងម៉ាស៊ីន ៣ស៊ីឡាំង ចំណុះ ០.៨លីត្រ ផលិតកម្លាំងបាន ៥១សេះ កម្លាំងរមួល ៥១ផោនហ្វីត ប្រើប្រអប់លេខ ៣វគ្គអូតូ នឹង៥វគ្គលេខដៃ រត់ដោយប៉ុងមុខ (FWD) នឹងអាចជាន់ក្នុងល្បឿនជាអតិបរិមា ១៤៥គីឡូម៉ែត្រ/ម៉ោង។

សម្រាប់ឆ្នាំ២០០១ឡើងទៅ Daewoo បានបន្ថែមនៅជម្រើសម៉ាស៊ីន ២ទៀត គឺ ៤ស៊ីឡាំង ចំណុះ ១.០លីត្រ នឹង ១.២លីត្រ ដែលមានកម្លាំងខ្លាំងជាងមុនបន្ដិច តែសម្រាប់ស្រុកខ្មែរយើងគឺភាគច្រើននាំចូល ប្រើតែ ម៉ាស៊ីន៣ស៊ីឡាំងប៉ុណ្ណោះ។

ចំពោះកម្រិតស៊ីសាំងវិញ Matiz ជាមធ្យមត្រឹម ៥លីត្រ ទៅ ៧លីត្រប៉ុណ្ណោះ អាស្រ័យលើការបើកបរជាកស្ដែង នឹងចំណាយត្រឹមតែ ៨ម៉ឺនរៀងក្នុងមួយឆ្នាំសម្រាប់ពន្ធផ្លូវ ឬស្មើនឹង ២២០រៀងក្នុងមួយថ្ងៃ។  

ជើងក្រោមរបស់កូនឡានមួយប្រភេទនេះ ប្រើជាបូមរឺស័រ MacPherson Strut នៅខាងមុខ នឹងខាងក្រោយបំពាក់ រឺស័រ Coil Spring។ ជើងក្រោមប្រភេទនេះអាចបើកបរក្នុងល្បឿនសមរម្យមួយ តែវាទប់លំនឹងមិនបានល្អឡើយ តែវាងាយស្រួលក្នុងការប្រើប្រាស់ប្រចាំថ្ងៃធម្មតាៗ នៅទីក្រុងឬជិះជិតៗបាន។

ចំណែកយាន់កង់វិញប្រើទំហំ ១៣អីញ បំពាក់ហ្វ្រាំងឌីសគៀបខាងមុខ នឹងខាងក្រោយបំពាក់ហ្វ្រាំងត្រលោកជំនួយដោយប្រព័ន្ធហ្វ្រាំងសុវត្ថិភាព ABS (អាស្រ័យតាម Trim ឬ Option)។

និយាយរួមចំពោះ Daewoo Matiz នេះមិនមានអ្វីពិសេសឡើយ ស្រដៀងទៅនឹង Kia Visto ដែរទាំងភិនភាគ នឹងកម្លាំងម៉ាស៊ីន។ តែអាចល្មមប្រើប្រាស់បាន សម្រាប់សិស្សសាលា បងប្អូនស្រីៗដែលឧស្សាហ៌ជិះជិតៗ ឬទៅផ្សារទិញម្ហូប ជូនកូនតូចៗទៅសាលាអីជាដើម។ និយាយរួមគឺសុវត្ថិភាពជាងម៉ូតូ នឹងអាចកំដរបងប្អូនបាំងថ្ងៃ បាំងភ្លៀងបាន៕

ដោយ៖ BunSak