និយាយពីឡាន Honda នៅខ្មែរយើងភាគច្រើនស្គាល់តែ CRV, Honda CIVIC, Honda City, ជាដើម។ អត្ថបទនេះ Advan Auto សូមលើកយក Honda insight ជំនាន់ទី២ ផលិតក្នុងឆ្នាំ២០១០ មកណែនាំខ្លួនឲ្យប្រិយមិត្តបានស្គាល់ម្ដង។ Insight ក៏ជាឡានដែលល្បីនៅទីផ្សារសហរដ្ឋអាមេរិក និងត្រូវបានគេចាត់ទុកថាជាដៃគូប្រកូតប្រជែងជាមួយ Toyota Prius ផងដែរ។ តើ Honda បានញ៉ាត់គ្រឿងផ្សំអ្វីខ្លះ ទើបបានជាធ្វើឲ្យអាព្រូសភ័យញ័រជើងនៅទីផ្សារអាមេរិក? តោះតាមដានទាំងអស់គ្នា។ 

- Insight ប្រើម៉ាស៊ីនតូចល្មម៤ស៊ីឡាំង ចំណុះ១.៣លីត្រ ផលិតកម្លាំង៩៨សេះ បន្ថែមម៉ូទ័រ Hybrid មួយគ្រាប់ជំនួយផង វាបង្កើនកម្លាំងបាន១១២សេះ និងកម្លាំងរមួល១២៣ផោនហ្វីត ប្រើប្រអប់លេខ CVT ដូចអាព្រូសដែរ និងបង្វិលកង់មុខ(FWD)។ អាចរត់លឿនបំផុតបាន ១៨០គីឡូម៉ត្រ/ម៉ោង ជាន់ស្ទុះពី ០ទៅ ១០០គីឡូម៉ែត្រប្រើពេល ១០.២វិនាទី។

- ចំពោះកម្រិតស៊ីសាំងសន្សំសំចៃគួរសម ដោយក្នុក្រុង៥លីត្រ និងក្រៅក្រុង៥.៥លីត្រ ក្នុង១០០គីឡូម៉ែត្រ។ ថ្វីត្បិតថាសមត្ថភាពស្ទើរជាង Prius បន្តិច តែ Honda Insight ជាគូប្រកួតធំមួយនៅក្នុងទឹកដីអាមេរិក ។

- ជើងក្រោមរាងគ្រាន់បើដែរ ដោយផ្នែកខាងមុខវាដំណើរការដោយប្រព័ន្ធ ឯករាជ Independent Suspension ដែលជំនួយដោយ បូមរឺស័រធម្មតា MacPherson Strut នៅផ្នែកខាងមុខ និងខាងក្រោយជា Stabilizer Bar អមដោយ Torsion Beam។ ជើងក្រោមប្រភេទនេះអាចនិយាយបាន វាទប់លំនឹងល្អសម្រាប់តែបើកត្រង់ប៉ុណ្ណោះ និងជិះស្រួលសម្រាប់ការបើកបរក្នុងទីក្រុង តែចំពោះការរត់ល្បឿន ផ្លូវកោងក៏មិនជាបញ្ហាដែរ គ្រាន់តែផ្អៀងឡានបន្តិច តែបើជិះគ្នា៥នាក់អី Honda Insight ធ្វើការទប់លំណឹងមិនសូវបានឡើយ។

- ចំណែកយាន់កង់វិញ ទំហំ១៥អីញ បំពាក់ហ្វ្រាំងឌីសគៀបនៅផ្នែកខាងមុខ និងខាងក្រោយជាហ្វ្រាំង ត្រលោក ជំនួយដោយប្រព័ន្ធ ABS ភ្ជាប់កង់ទាំងបួនតែម្ដង។

- ខាងក្រៅការរចនាឡើងជាប្រភេទ Hatchback ទ្វា៥ បើក្រឡេកខាងមុខ និងចំហៀងវិញ ស្រដៀងទៅនឹង អាព្រូសដែរ។ Honda Insight ជំនាន់ទី២ ឆ្នាំរាងខ្ពស់ដែរ អញ្ចឹងផ្នែកខ្លះក៏អេមដែរ ចង្គៀងមុខប្រើប្រភេទគុជ HID និងស្ដុបក្រោយជា LED។ 

-Insight បានផ្ដល់ជម្រើសចំនួនពីរដូចជា៖ LE, និង EX ។ ចំពោះ LX ជាប្រភេទធម្មតា ឬអាចនិយាយបានថាជាស្ដង់ដា អត់មានអេក្រងធំ Speaker 4 គ្រាប់ ពោងសុវត្ថិភាពចំនួន៤ ជាដើម។ តែបើជា EX វិញមានបន្ថែមនៅ អេក្រង់ធំ អាចភ្ជាប់ជាមួយទូរសព្ទ័ ឬ Bluetooth, មានផែនទី កាម៉េរាក្រោយ, និងមានមុខងារជាច្រើនមួយចំនួនទៀតផង។ លើសពីនេះ EX ក៏ទទួលបាននៅ Paddle Shift, Speaker ៦គ្រាប់, ពោងសុវត្ថិភាព ៦, USB Port, កញ្ចក់ប្រភេទកាត់ចំណាំងផ្លាត ជាដើម។

-សរុបមក Insight ឆ្នាំខ្ពស់តែមិនមានអ្វីដែលប្លែកឡើយ ដូចជាខាងក្នុងធម្មតាមិនមានបំពាក់កៅអីស្បែក ឬជំនួយដោយអេឡិចត្រនិចនោះទេ ហើយក៏អត់មានប៉ូតុង Power Start ដែរ។ ផលិតឆ្នាំ ២០១០ តែបើធៀបនឹងអាព្រូស ០១០ ដូចជាទៅមិនរួចឡើយ តែចំពោះអាព្រូស ជំនាន់ទី២ដូចគ្នា ត្រឹមឆ្នាំ០៦-០៩ Insight សុីដាច់ហើយ។

ជាក់ស្ដែងកម្លាំងម៉ាស៊ីន Honda ទំហំត្រឹម ១.៣លីត្រ ចំណែកអាព្រូស ១.៤លីត្រ តែ Insight អាចផលិតកម្លាំងលើស Prius ១០សេះ និងកម្លាំងរមួលធំជាងរហូតដល់ ១២៣ផោនហ្វីត អាចនិយាយបានថាខ្លាំងជាងអាព្រួសបន្តិច ។ នៅស្រុកខ្មែរដូចជាមិនទាន់ឃើញមានបងប្អូនយើងប្រើនៅឡើយទេ តែចំពោះ អាមេរិក អ៉ឺរ៉ុប់ ជប៉ុន និងថៃ គេនិយមប្រើវាណាស់។

-ទាំងរូបរាង និងខាងក្នុងក៏មិនលើសគ្នាប៉ុន្មានដែរ ម៉្យាងទៀត សន្សំសំចៃបានល្អគួរសម ដូច្នេះហើយទើបគេចាត់ទុក Insight ជាគូប្រកួតដ៏ធំមួយរបស់ Toyota Prius នៅទីផ្សារអាមេរិក និងអ៉ឺរ៉ុប់ក្នុងប្រភេទជារថយន្ត Hybrid Hatchback ដែលស្ថិតក្នុងតម្លៃទាប តែធន់សន្សំសំចៃជាងគេនៅលើពិភពលោក៕ 

អត្ថបទ៖ BunSak