Frontier ជាកំពូល Pick Up របស់ Nissan តំណាងឲ្យប្រភេទម៉ាស៊ីនសាំង ខណៈ​ Navara ដំណាងឲ្យប្រភេទម៉ាស៊ូត ជាមួយរូបរាងមិនមានអ្វីខុសប្លែកគ្នាគួរឲ្យគត់សម្គាល់ឡើយ។

Frontier មានប្រើនៅស្រុកខ្មែរតាំងពីយូណាស់មកហើយ ដែលភាគច្រើនជាស៊ីឆ្នាំ ២០០៥ ដល់ ២០១០ បច្ចុប្បន្នចរាចរណ៌នៅនៅលើទីផ្សារសម្បូរតែប្រភេទស្លាកលេខ ខណៈក្រដាសពន្ធស្ទើតែគ្មានសោះ បើមានក៏ធូរថ្លៃខ្លាំងដែរខ្ទង់ ១ម៉ឺនដុល្លារស្ដើងប៉ុណ្ណោះ។

ចំពោះតម្លៃវិញ Frontier ស្លាកលេខនៅចន្លោះពី ៧,០០០ដុល្លារជាង ទៅ ១០,០០០ដុល្លារ អាស្រ័យលើ ពណ៌ ឆ្នាំផលិត នឹងភិនភាគឡានជាក់ស្ដែង។

តម្លៃនេះអាចថាធូរថ្លៃច្រើន ប៉ុន្ដែទន្ទឹមនឹងតម្លៃធូរសមរម្យបែបនេះ បងប្អូនអាចមកដឹងពី គុណសម្បត្តិ នឹង គុណវិបត្តិ មួយចំនួនសិន ដើម្បីងាយស្រួលក្នុងការពិចារណា មុនសម្រេចចិត្តទិញ។

ក/ គុណសម្បត្តិ

១/ ជាឡានដែលមានតម្លៃធូរគួរសម ទោះក្រោម ១ម៉ឺនក៏រកទិញបានប្រើដែរ បើធៀបនឹង Pick Up ដទៃដែលមានឆ្នាំផលិត នឹងកម្លាំងប្រហាក់ប្រហែលគ្នា។

២/ ជាប្រភេទឡានដឹកដែលមានកម្លាំងខ្លាំង អាចប្រើដើម្បីបម្រើការងារបានច្រើន ទាំងប្រើធម្មតា ដឹកទំនិញប្រកបអាជីវកម្មបានផងដែរ។

៣/ ទោះបីជាចាសឆ្នាំបន្ដិចក្ដី ប៉ុន្ដែការប្រើប្រាស់សម្រាប់ Nissan Frontier គឺថាធន់ល្អគ្រាន់បើ មិនសូវជាធ្វើទុកផ្ដាសច្រើនទេ។

ខ/ គុណវិបត្តិ 

១/ ទោះបីជាតម្លៃធូរ ប៉ុន្ដែទីផ្សារហាក់រាងស្ងាត់ ដូចនេះអាចប៉ះពាល់ខ្លាំងជាមួយតម្លៃលក់ចេញ ព្រោះអាចខាតច្រើនគួរសម។

២/ ជាឡានម៉ាស៊ីនធំ ធ្វើឲ្យការចំណាយថ្លៃសាំងច្រើន ខ្ទង់ ១៤លីត្រ ទៅ ១៧លីត្រ ក្នុង១០០គីឡូម៉ែត្រ ហើយក៏ជាចំណុចសំខាន់ដែលបងប្អូនត្រូវគិតផងដែរថា រ៉ាប់រងបានឬអត់។

៣/ ធន់មែន ប៉ុន្ដែគ្រឿងបន្លាស់មិនសូវជាសម្បូរឡើយសម្រាប់តាមខេត្ត ភ្នំពេញគួរសម ប៉ុន្ដែតម្លៃវិញក៏រាងខ្ពស់គួរសមដែរ។

គួរបញ្ជាក់ដែរថា៖ Nissan Frontier បំពាក់ម៉ាស៊ីន ៦ស៊ីឡាំង ៤.០លីត្រ ផលិតកម្លាំងបាន ២៦៥សេះ និងកម្លាំងរមួល ២៨៤ផោនហ្វីត រត់ដោយប្រអប់លេខ ៥វគ្គអូតូ បង្វិលកង់ដោយប្រភេទប៉ុងមួយ (RWD) និងប៉ុងពីរ(4WD) ជំនួយដោយប្រព័ន្ធកាប់តាស់។

កម្លាំងខ្លាំងទទួលស្គាល់ ប៉ុន្ដែបើនិយាយពីកម្រិយស៊ីសាំងវិញ ខ្ទង់ ១៣លីត្រជាង ទៅ ១៧លីត្រ ក្នុង១០០គីឡូម៉ែត្រឯណោះ។

សម្រាប់បងប្អូនវិញយល់យ៉ាងណាដែរចំពោះ កំពូង Pick Up ជើងចាស់របស់​ Nissan មួយនេះ? បងប្អូនដែលមាន បទពិសោធន៌នៃការប្រើប្រាស់ ចំណាប់អារម្មណ៌ នឹងព័ត៍មានបន្ថែម អាចចែករំលែកបាន៕

ដោយ៖ Bunsak 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ។

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!