Land Cruiser J100 Series ជាប្រភេទឡាន SUV ខ្នាតធំរបស់ Toyota ដែលមានរូបរាងមុខមាត់ស្ទើតែដូចគ្នាទាំងស្រុងទៅនឹងពពួក Lexus LX470 ទើបស្រុកខ្មែរតែងហៅឡាន Land Cruiser J100 Series នេះថាជា Land Cruiser 470 ។

សម្រាប់ពពួកជំនាន់ទី៦ នេះដែរគឺផលិតចាប់ពីឆ្នាំ ១៩៩៨ ដល់ ២០០៧ ស្ថិតក្នុងរូបរាងតែមួយ ប៉ុន្ដែក៏មានការ Facelift ចំនួន ២ដង ទៅតាមឆ្នាំមួយចំនួនផងដែរ។

ជាក់ស្ដែង Land Cruiser 470 មួយនេះមានច្រើនជម្រើសម៉ាស៊ីន មានទាំងប្រភេទសាំង នឹងម៉ាស៊ូត ប៉ុន្ដែស្រុកខ្មែរ និយមពពួក ឡង់ ប្រើម៉ាស៊ូតជាង ដូចជា៖

ម៉ាស៊ីនទំហំ ៦ស៊ីឡាំង  ៤.២លីត្រ ជំនួយដោយ Turbo ផលិតកម្លាំង ១៦៥សេះ កម្លាំងរមួល ២៦០ផោនហ្វីត។

ខណៈម៉ាស៊ីន ៦ស៊ីឡាំង ដូចគ្នាមួយទៀត ផលិតកម្លាំងបានដល់ទៅ ២០១សេះ កម្លាំងរមួល ៣១៧ផោនហ្វីត ដែលនៅស្រុកខ្មែរហៅថា ប្រភេទម៉ាស៊ីនធំ 24V។  

មានជម្រើសរត់ដោយប្រអត់លេខ ៤វគ្គអូតូ ៥វគ្គអូតូ ៤វគ្គលេខដៃ និងបង្វិលកង់ដោយប៉ុង២ 4WD ជំនួយដោយប្រព័ន្ធកាបពីតាស់ ហើយក៏ភ្ជាប់ជាមួយ Drive Mode នឹងមានប្រព័ន្ធប៉ូមឡើងចុះលើកកម្ពស់រថយន្ដផងដែរ ។

និយាយពីកម្រិតស៊ីប្រេងវិញបច្ចុប្បន្នអាចខ្ទង់ ១២លីត្រ ទៅ ១៥លីត្រ ក្នុង១០០គីឡូម៉ែត្រ ឬអាចលើសខ្វះតិចតួច ទៅតាមស្ថានភាពជាក់ស្ដែង។

Land Cruiser 470 មួយនេះជាប្រភេទឡាន Full Size ទ្វា៥ កៅអី ៣ជួរ អាចជិះបាន ៨នាក់ មិនជាចង្អៀតឡើយ។

ចំពោះគ្រឿងបរិក្ខាដែលបំពាក់ សម្រាប់ពពួក Full Option ឬពពួកឆ្នាំ២០០៣ ឡើងលើ ប្លែកគ្រាន់បើ និងដូច Lexus LX470 តែម្ដង ទាំងបរិក្ខា និងការឌីស្សាញ ខាងមុខផ្នែកតាបឡូ បន្ថែមពីនេះ ក៏មានអេក្រង់ LCD Monitor និងផ្នែកជាច្រើនទៀតបំពាក់ ហ្វមីការឈើ ដំបូលបើក មើលទៅក៏មិនអន់ប៉ុន្មានដែរ ។ 

ចំពោះតម្លៃវិញឃើញទីផ្សារដាក់លក់ចាប់ពី ១ម៉ឺនដុល្លារស្ដើង ទៅ ២ម៉ឺនដុល្លារបន្ដិច អាស្រ័យលើ ពណ៌ ឆ្នាំផលិត Option ប្រភេទម៉ាស៊ីន នឹងភិនភាគឡានជាក់ស្ដែង តែបើប៉ះឡានស្អាតសំណុំភិនភាគនៅថ្មី អាចមានតម្លៃដល់ទៅ ២ម៉ឺនដុល្លារក្រាស់ផងដែរ។

សម្រាប់បងប្អូនវិញយល់យ៉ាងណាដែរចំពោះ SUV ខ្នាត់ធំហាប់ណែន ខ្ពស់ស្រឡាស់ នឹងទូលាយមួយនេះ? បងប្អូនដែលមានធ្លាប់មាន បទពិសោធន៍ មតិយោបល់ នឹងព័ត៍មានបន្ថែម អាចចែករំលែកបាន៕

ដោយ៖ Bunsak

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!