និយាយចំពោះឡានដែលបំពាក់ម៉ាស៊ីនដូចគ្នា ទាំងទំហំស៊ីឡាំងចំណុះ និងកម្លាំងប៉ុនគ្នា គឺមានមិនតិចនោះទេ គ្រាន់តែខុសលេខកូដតែប៉ុណ្ណោះ។ ជាក់ស្ដែងឡានដែលតែងនិយមប្រើនៅស្រុកខ្មែរក៏មានច្រើនដែរ តែថ្ងៃនេះ Advan Auto សូមធ្វើការលើកយកនៅពពួកឡាន Toyota និង Lexus ដែលមានម៉ាស៊ីន ៦ស៊ីឡាំង ចំណុះ៣.៣លីត្រ ដែលមានលេខកូតដូចគ្នា 3MZ-FE ចំនួន៣ម៉ូឌែលមកនិយាយម្ដង។ ចង់ដឹងថាប្រភេទឡានដែលពេញនិយមណាខ្លះ? និងកម្រិតស៊ីសាំងខុសគ្នាដូចម្ដេច? តោះមកស្វែងយល់ត្រួសៗជាមួយ Admin ទាំងអស់គ្នា។

1. Lexus RX330

Lexus មួយម៉ូឌែលនេះក៏សម្បូរមិនចាញ់ឡានផ្សេងៗឡើយ ទោះបីជាចាស់ឆ្នាំបន្ដិចក្ដីតែ RX330 អាចនិយាយបានថាជាតារារះមិនទាន់លិចទៅណាឡើយ។

Lexus RX330 បំពាក់ម៉ាស៊ីន ៦ស៊ីឡាំង ចំណុះ ៣.៣ លីត្រ ផលិតកម្លាំងបាន ២៣០សេះ កម្លាំងរមួល ២៣៨ផោនហ្វីត ល្បឿនលឿនបំផុត ២២៥គីឡូម៉ែត្រ/ម៉ោង ជាន់ស្ទុះពី ០ ទៅ ១០០ម៉ែត្រប្រើពេល ៨.១វិនាទី។ ប្រើប្រអប់លេខ ៥ វគ្គអូតូ បង្វិលកង់ដោយប្រភេទប៉ុងមួយ (FWD) និងប៉ុងពីរ (AWD) ជាមួយនឹងទម្ងន់ ១៧៥០គីឡូក្រាម។

កម្រិតស៊ីសាំងកាលចេញពីរោចក្រកាលជិត២០ឆ្នាំមុន ក្នុងក្រុង ១៣លីត្រ និងក្រៅក្រុង ១០លីត្រ តែជាក់ស្ដែងបច្ចុប្បន្ននេះវិញ ហក់ចន្លោះពី ១២លីត្រ ទៅ១៥លីត្រ ក្នុង១០០គីឡូម៉ែត្រ ឬអាចលើសខ្វះតិចតួចតាមស្ថានភាពជាក់ស្ដែង។

2. Toyota Highlander 

ទោះបីមិនចាយរាងដូច Lexus តែឡានមួយម៉ូឌែលនេះក៏ទទួលបានការចាប់អារម្មណ៍ច្រើនពីបងប្អូនអ្នកប្រើប្រាស់ខ្លាំងណាស់ដែរ ព្រោះតែភាពធន់ រឹងមាំ ទើបឃើញចររាចរណ៍លើដងផ្លូវមិនសូវដាច់ភ្នែកឡើយ។

Highlander ឆ្នាំ០៤ឡើង វាប្រើជាមួយនឹងម៉ាស៊ីន ៦ស៊ីឡាំង មុខកាត់ ៣.៣លីត្រ ផលិតកម្លាំងបាន ២៣០សេះ ជាមួយកម្លាំងរមួល ២៤២ ផោនហ្វីត រត់ដោយប្រអប់លេខ ៥ វគ្គអូតូ បើកលឿនបំផុតបាន ២២០ គីឡូម៉ែត្រ/ម៉ោង សន្ទុះពី ០ ទៅ ១០០ គីឡូម៉ែត្រប្រើពេលតែ ៨ វិនាទីប៉ុណ្ណោះ បង្វិលកង់ដោយជម្រើស ប៉ុង១ (FWD) និងប៉ុង២ (AWD) ជាមួយនឹងទម្ងន់ ១៦៥៥ គីឡូក្រាម។

កម្រិតស៊ីសាំងចន្លោះពី ១១លីត្រ ទៅ១៤លីត្រក្នុង១០០គីឡូម៉ែត្រ ឬអាចលើសនេះទៅតាមការបើកបរជាក់ស្ដែង។

3. Toyota Sienna 

សម្រាប់ឡាន Minivan មួយម៉ូឌែលនេះពពួកសេរ៊ីឆ្នាំ ០៤ ដល់០៦ ក៏ជាឡានដែលពេញនិយមខ្លាំងដែរក្នុងចំណោមឡាន Van ផ្សេងៗទៀត។

Sienna បំពាក់ម៉ាស៊ីន ៦ស៊ីឡាំង មុខកាត់ ៣.៣លីត្រ ផលិតកម្លាំងបាន ២៣០ សេះ កម្លាំងរមួល ២៤២ ផោនហ្វីត ប្រើប្រអប់លេខ ៥វគ្គអូតូ ល្បឿនអតិបរិមា ២២០ គីឡូម៉ែត្រ/ម៉ោង ជាន់ស្ទុះពី ០ ទៅ ១០០គីឡូម៉ែត្រ/ម៉ោង ប្រើពេល ៨.៨ វិនាទី បង្វិលកង់ដោយប្រភេទប៉ុង១(FWD) និងមានជម្រើសប៉ុង២(AWD) ជាមួយទម្ងន់រហូតដល់ ២ តោនឯណោះ។

កម្រិតស៊ីសាំងវិញបច្ចុប្បន្នចន្លោះពី ១២លីត្រ ទៅ១៦លីត្រ ១០០គីឡូម៉ែត្រ ឬអាចលើសខ្វះតិចតួចទៅតាមស្ថានភាពជាក់ស្ដែង។

និយាយរួមឡាន៣ម៉ូឌែលនេះ ម៉ាស៊ីនដូចគ្នា ចំណែកកម្លាំងសន្ទុះ និងកម្លាំងរមួលអាចមិនលើសខ្វះគ្នាច្រើនទេ ប្រហាក់ប្រហែលអាចទទួលយកបាន ចំណែកការចំណាយលើពន្ធផ្លូវក៏ដូចគ្នាផងដែរ។

តែចំពោះកម្រិតស៊ីសាំងខុសគ្នា គឺមកពីកត្តាមួយចំនួនដូចជា អាយុកាលនៃការប្រើប្រាស់ ការឌីហ្សាញរូបរាងដែលនាំឲ្យប្រែប្រួលទម្រង់ Aerodynamic និងទម្ងន់របស់ឡានជាដើម។ ចុះបងប្អូនយល់យ៉ាងដែរចំពោះ ឡានទាំង៣ម៉ូឌែលនេះ បើមានឡានណាដែលមានប្រើម៉ាស៊ីនប៉ុនគ្នាដូចគ្នាទៅនឹងឡាន ៣ខាងលើហ្នឹង អាចចែករំលែកនៅក្នុង Comment ឲ្យ Admin បានដឹងផង៕

ដោយ៖ BunSak