ប្រភេទឡាន Hatchback មួយនេះត្រូវបានក្រុមហ៊ុន Ford ផលិតដំបូងនៅឆ្នាំ ១៩៧៦ ដែលជាជំនាន់ទី១ រហូតដល់ឆ្នាំ២០២២ ដំណើរការបាន ៧ជំនាន់ទៅហើយក្នុងរយៈពេលជិត ៥០ឆ្នាំកន្លងមកនេះ។ ក្នុងពេលថ្មីៗនេះដែរក្រុមហ៊ុន Ford បានប្រកាសថានឹងបិទទ្វាឈប់ផលិតម៉ូឌែលមួយប្រភេទនេះទៀតហើយ ដោយជំនួសមកវិញនូវឡានអគ្គិសនីម្ដង។
ទោះបីជាបែបនេះក្ដីក៏ Fiesta នៅតែពេញនិយមសម្រាប់ការប្រើប្រាស់នៅជុំវិញពិភពលោក និងកម្ពុជាយើងផងដែរ។ ចំពោះស្រុកខ្មែរឃើញចររាចណ៍លើដងផ្លូវភាគច្រើនជាប្រភេទឡានស្លាកលេខសេរីឆ្នាំ២០១៤ ដល់២០១៨ ដែលមានតម្លៃចន្លោះពី ១ម៉ឺនដុល្លារស្ដើង ទៅ១ម៉ឺនដុល្លារក្រាស់តិចតួច តម្លៃ អាចប្រែប្រួលអាស្រ័យលើស្ថានភាពជាក់ស្ដែងនៃរថយន្ដ។
Fiesta ប្រើម៉ាស៊ីនច្រើនជម្រើស តែស្រុកខ្មែរភាគច្រើនឃើញនាំចូលមកប្រើតែម៉ាស៊ីន Ecoboost ទំហំ ៣ស៊ីឡាំង ចំណុះ ១.០លីត្រ តែអាចផលិតកម្លាំង ១២៥សេះ កម្លាំងរមួល ១៤៧ញ៉ូតុនម៉ែត្រ បង្វិលកង់ដោយប៉ុងមុខ (FWD) រត់ដោយប្រអប់លេខ ៦វគ្គអូតូ អាចរត់បានល្បឿនអតិបរិមា ១៨០គីឡូម៉ែត្រ។
ចំពោះកម្រិតស៊ីសាំងវិញសន្សំសំចៃគ្រាន់បើ ក្នុង១០០គីឡូម៉ែត្រចន្លោះពី ៥លីត្រជាង ទៅ៧លីត្រ ឬអាចលើសខ្វះតិចតួចអាស្រ័យលើការបើកបរជាក់ស្ដែង។
ចំពោះប្រព័ន្ធជើងក្រោមវិញផ្នែកខាងមុខរបស់ Fiesta ប្រើប្រភេទបូមរឺស័រ MacPherson Strut អមដោយរឺស័រ Coil Spring ជាមួយនឹង Anti Roll Bar ចំណែកខាងក្រោយវិញបំពាក់ជា រឺស័រ អមដោយបូម shock absorber ។ ជើងក្រោមប្រភេទនេះទោះបីជាទន់បន្ដិច ទប់លំណឹងមិនសូវជាបានល្អដូចប្រភេទផ្សេងៗ តែសមស្របសម្រាប់ការប្រើប្រាស់ក្នុងទីក្រុង ទោះបីជារត់ល្បឿនផ្លូវឆ្ងាយក៏មិនជាបញ្ហាអ្វីឡើយ។ ចំណែកយាន់កង់វិញទំហំ ១៦អីញស្ដង់ដា បំពាក់ហ្វ្រាំងឌីសគៀបនៅផ្នែកខាងមុខ និងខាងក្រោយប្រើជាហ្វ្រាំងត្រលោកជំនួនដោយប្រព័ន្ធ ABS និងប្រព័ន្ធជំនួយជួយទប់លំណឺងឡានមិនអោយរអិលថយក្រោយ Hill Launch Assis ជាដើម។
Fiesta ជាប្រភេទកូនឡាន Hatchback ទ្វា៥កៅអី២ជួរ មិនចង្អៀតពេក ក៏មិនទូលាយពេកដែរ ដោយវាមានប្រវែង ៣៩៧៥ម.ម ទទឹង ១៧០៩ម.ម កម្ពស់ ១៤៩៥ម.ម ពីដីមកបាត ១២០ម.ម ជាមួយនឹងទម្ងន់ ១១២៧គីឡូក្រាម។
ឆ្នាំរាងខ្ពស់មែនតែមិនជាប្លែកណាស់ណាទេ ទាំងផ្នែកខាងមុខក្រោយបំពាក់ចង្កៀង Halogen ធម្មតាប៉ុណ្ណោះ តែអមដោយពិលកាង១គូ ជាមួយនឹងប៉ាណាខាមុខមើលទៅស្អាតគួរសម រូបរាងបែបស្ព័រមិនអន់ប៉ុន្មានទេ។
ចូលមកខាងក្នុងប្លែកគួរសម ជាមួយនឹង Smart Key ៣គ្រាប់ ប៉ូតុង Power Start, Fiesta ក៏បានបំពាក់កៅអីស្បែកលាយកាំញ៉ៃ បញ្ជាដោយដៃ ២ជួរ ទូលាយគួរសមអាចជិះបានគ្នា៥នាក់។ តែប្លែកជាងរថយន្ដផ្សេងៗដោយក្រោមកៅអីរបស់អ្នកដំណើរមុខ មានកន្លែងទុកដាក់ស្បែកជើង គ្រាន់បើជាងទុកទំនេរចោល។
ក្រៅពីនឹងក៏ឃើញមានបំពាក់ Speaker ៦គ្រាប់ ពោងសុវត្ថិភាពព័ទ្ធជុំវិញ, មានផ្លិតទឹកអូតូ, សេនស័រជំនួយពេលចូលចត, មានមុខងារបញ្ជាលើដៃចង្កូត តែមិនមានបំពាក់អេក្រង់ Monitor នៅខាងមុខឡើយជំនួសដោយ មុខងារជាច្រើនបញ្ជាដោយប៉ុតុងចុច និងមូលឡើងចុះផងដែរ តែអ្វីដែលពិសេសនោះគឺ ទ្វាក្រោយអាចបិទបើកបញ្ជាដោយប្រើតេឡេបាន។
ចំពោះឡាន Ford Fiesta មួយប្រភេទនេះទោះបីជាក្រុមហ៊ុនប្រកាសបិទទ្វាក៏ដោយ តែទីផ្សារការប្រើប្រាស់នៅតែធម្មតា និងតម្លៃហាងឆេងនៅស្រុកខ្មែរគឺដូចដើម មិនមានអ្វីដែលប្រែប្រួល ឬព្រួយបារម្ភអ្វីឡើយ។ ចំពោះភាពទំនើបទោះឆ្នាំខ្ពស់មែន តែមិនមានអ្វីប្លែកពិសេសច្រើនឡើយ បើនិយាយពីរូបរាងបែបស្ព័រតូចច្រឡឹង និងការប្រើប្រាស់ធន់សន្សំសំចៃវិញ ទោះមិនពិសេសតែសមត្ថភាពរបស់ Fiesta សមនឹងតម្លៃខ្លួនល្មមអាចប្រើប្រាស់បាន៕ ចុះបងប្អូនយល់យ៉ាងណាដែរជាមួយ Ford Fiesta មួយប្រភេទនេះ?
ដោយ៖ BunSak
Ford Fiesta ស៊ីសាំងតិចដូចឡាន Hybrid តម្លៃខ្ទង់ ១ម៉ឺនស្ដើង ជាឡានថ្មីឆ្នាំខ្ពស់នៅស្រុកខ្មែរ ហាក់ត្រូវបានគេមើលរំលង
The new Hyundai TUCSON ឆ្នាំ២០២៥ បានបង្ហាញរូបរាងជាលើកដំបូងនៅព្រះរាជាណាចក្រកម្ពុជា
4 ចំណុចដែល Prius Option 5 ទទួលបានលើសពី Option 2-4 ខណៈតម្លៃវិញក៏ខ្ពស់ដែរ
Land Cruiser Prado 2025 មកដល់ហើយតម្លៃ 16ម៉ឺនដុល្លារជាង ចុះស៊េរីចាស់ឆ្នាំ 2003 នេះវិញសល់តម្លៃខ្លួនប៉ុន្មានដែរ
Ford Fiesta ស៊ីសាំងតិចដូចឡាន Hybrid តម្លៃខ្ទង់ ១ម៉ឺនស្ដើង ជាឡានថ្មីឆ្នាំខ្ពស់នៅស្រុកខ្មែរ ហាក់ត្រូវបានគេមើលរំលង
4 ចំណុចដែល Prius Option 5 ទទួលបានលើសពី Option 2-4 ខណៈតម្លៃវិញក៏ខ្ពស់ដែរ
Land Cruiser Prado 2025 មកដល់ហើយតម្លៃ 16ម៉ឺនដុល្លារជាង ចុះស៊េរីចាស់ឆ្នាំ 2003 នេះវិញសល់តម្លៃខ្លួនប៉ុន្មានដែរ
Tacoma 2001-2004 នៅតែជាឡាន Pick Up ដែលពេញនិយម នឹងតម្លៃទីផ្សារនឹងល្អ ទោះបីជាអាយុកាល 20ឆ្នាំហើយក្ដី