ចំពោះ Murano ជាប្រភេទរថយន្ដ Crossover SUV របស់ Nissan ដែលមានរូបរាងស្រដៀងទៅនឹង Nissan Juke ដែរ។ ចូលដល់ជំនាន់ទី៣ ឆ្នាំ២០១៤ រហូតដល់ឆ្នាំ២០២៣ ដែល Murano ២០២៤ ត្រៀមបង្ហាញខ្លួនសម្រាប់អតិថិជននៅចុងឆ្នាំនេះហាក់មិនមានអ្វីប្លែកភ្នែកច្រើនឡើយ។

អាចនិយាយបានថារូបរាង ក្នុងរយៈពេល ១០ឆ្នាំ Murano មិនទាន់មានការផ្លាស់ប្ដូរទាំងស្រុងឡើយ គឺត្រឹមផ្នែកតិចតួច ដូចជាខាងមុខ ចង្កៀង ស្ដុបក្រោយ និងផ្ទៃខាងក្នុងបន្ដិចប៉ុណ្ណោះ។ បើនិយាយអោយស្រួលស្ដាប់ផង Murano ២០២៤ ដូចទៅនឹងពពួក ២០២៣ ដែរ។ ខណៈរថយន្ដជាច្រើនចូលដល់ដំណាក់កាលដែរត្រូវផ្លាស់ប្ដូរស្ទើតែទាំងស្រុងអស់ទៅហើយ។

សម្រាប់ស៊េរីឆ្នាំ២០២៤នេះ តម្លៃចេញពីរោងចក្រចាប់ពី ៣៤,០០០ដុល្លារ ដល់ ៤៥,០០០ដុល្លារ ជាមួយជម្រើស Trim ៣ ដូចជា៖ SV, SL, Platinum និងជម្រើសរត់ដោយប្រភេទប៉ុង១​ FWD និងប៉ុង២ AWD ជាដើម ខណៈស៊េរីឆ្នាំ២០២៣ លក់តម្លៃត្រឹម ៣៣,៦៦០ដុល្លារប៉ុណ្ណោះ។  

Murano បំពាក់ជាមួយម៉ាស៊ីនសាំងទំហំ ៦ស៊ីឡាំង ចំណុះ ៣.៥លីត្រ ផលិតកម្លាំងបាន ២៦០សេះ កម្លាំងរមួល ២៤០ផោនហ្វីត ប្រើប្រអប់លេខ​ CVT ជាមួយកម្រិតស៊ីសាំងជាមធ្យម ៩លីត្រក្នុង១០០គីឡូម៉ែត្រ។

សម្រាប់រូបរាងខាងក្រៅវិញ Nissan ដូចជាចូលចិត្ត Concept V-Motion Signature Grill ឌីស្សាញរបស់ខ្លួនណាស់ ដែលផ្ទៃខាងមុខមានទម្រង់ជាអក្សរ V ស្រោមដោយក្រូម។ បើនិយាយពីចង្កៀងមុខរ ជាមួយស្ដុបក្រោយរាងជា V-Sharp ដែល Murano បំពាក់ជា Full LED មួយឈុតតែម្ដង។

វាជាប្រភេទឡានទ្វា៥ កៅអី ២ជួរទូលាយគួរសម អាចជិះគ្នា ៥នាក់មិនចង្អៀតទេ ជាមួយកៅអី និងផ្នែកជាច្រើនស្រោបដោយស្បែក និងការតុបតែងលាយជាមួយហ្វមិកាឈើមើលទៅក៏ស្អាតម្យ៉ាងដែរ។

រួមផ្សំជាមួយកុងទ័រ ឌីជិថល ១២.៣អ៉ីង ជាមួយថាច់ស្គ្រីន ពាហុមុខងារ ភ្ជាប់ Apple Carplay & Android Auto ជាមួយមុខងារ Nissan Connect Speaker Bose ១១គ្រាប់ Wireless Charging ដំបូលបើក Panoramic Glass និងជាមួយកញ្ចប់សុវត្ថិភាពជំនួយពេលបើកបរ Safety Shield 360 ដំទំនើបរបស់ Nissan មួយឈុតជាស្ដងដារតែម្ដង។

Advan Auto នឹងចាំអ៊ុតមើលនៅឆ្នាំបន្ដរបន្ទាប់ទៀត ថាតើ Nissan សម្រេចទុករូបរាងបែបនេះបន្ដរទៅទៀត ឬគូសវាសឲ្យ Murano ក្លាយទៅជាទម្រង់ថ្មីដូចស៊េរីឡានថ្មីៗបច្ចុប្បនេះ?​ សម្រាប់បងប្អូនវិញយល់យ៉ាងដែរចំពោះ Nissan Murano 2024 នេះ? ចំពោះមតិយោបល់ និងព័ត៍មានបន្ថែមអាចចែករំលែកបាន៕

 ដោយ៖ Bunsak

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!