ថ្មីៗនេះ គ្រាន់តែ Toyota ជួបបញ្ហាគាំងប្រព័ន្ធ software ដែលនាំឲ្យត្រូវផ្អាកដំណើរការរោងចក្រធំ នៅក្នុងប្រទេសជប៉ុនតែមួយថ្ងៃ ធ្វើឲ្យក្រុមហ៊ុនផលិតរថយន្ដយក្សមួយនេះ ខាតទឹកប្រាក់អស់ដល់ទៅជាង ៣៥៦ លានដុល្លារ។ 

តាមការចុះផ្សាយពី Carscoops បានឲ្យដឹងថា ការផ្អាកដំណើរបណ្ដោះអាសន្នកាលពីថ្ងៃទៅ ៣០ សីហា កន្លងទៅនេះ បណ្ដាលមកពីបញ្ហាប្រព័ន្ធ software ដែលក្រុមហ៊ុនប្រើសម្រាប់ដំណើរការកម្មង់គ្រឿងបង្គុំក្នុងរោងចក្រគាំង និងត្រូវការផ្អាកជាបណ្ដោះអាសន្នដើម្បីដោះស្រាយ update ប្រព័ន្ធឡើងវិញ ធ្វើឲ្យមានការប៉ះពាល់ដល់ដំណើរការផលិតដល់រោងចក្រសំខាន់ៗ ១៤ កន្លែងនៅជប៉ុន និងឈ្លៀតទៅប៉ះពាល់រោងចក្រដៃគូផ្សេងៗដូចជា Daihatsu, Hino និង Lexus ជាដើម ដែលនាំឲ្យ Toyota ខាតលុយដល់ ៣៥៦ លានដុល្លារ។ 

គួរឲ្យដឹងថា នេះមិនមែនជាលើកទីមួយទេ ដែល Toyota ជួបបញ្ហាប្រព័ន្ធ​ software ដែលបណ្ដាលឲ្យក្រុមហ៊ុន ត្រូវផ្អាកដំណើរការរោងចក្របណ្ដោះអាសន្ន និងខាតទឹកប្រាក់វាល់លានបែបនេះ ជាក់ស្ដែងបញ្ហាស្រដៀងគ្នាកើតឡើងថ្មីគឺ កាលពី ឆ្នាំ ២០២២​ កន្លងទៅ រោងចក្រផ្គត់ផ្គង់គ្រឿងបង្គុំប្លាស្ទិច Kojima របស់ខ្លួន គាំងប្រព័ន្ធបញ្ជាផលិតកម្ម  ដែលប៉ះពាល់ដល់ដំណើរការផ្គុំ និងដំឡើងរថយន្ដរាប់ពាន់គ្រឿង ជាមួយនឹងទិន្នន័យជាមធ្យមផលិតបាន ១៣ ៥០០ គ្រឿងក្នុងមួយថ្ងៃ។ 

ជុំវិញបញ្ហា ការរអាក់រអួលប្រព័ន្ធ Software ជាញឹកញយនេះ តាមការឲ្យដឹងពី Reuters ថាមានការសង្ស័យជាច្រើនថា អាចបណ្ដាលមកពី ការលុកលុយពីក្រុមអ្នកវាយប្រហារតាមប្រព័ន្ធអ៊ីនធឺណេត (Cyberattack-er) ក៏ប៉ុន្ដែ Toyota បានបញ្ជាក់ថា មិនមែនពាក់ព័ន្ធនឹង Cyberattack នោះទេ គឺគ្រាន់តែប្រព័ន្ធ software ឆ្លងមេរោគប៉ុណ្ណោះ តែយ៉ាងណាក៏ដោយ បើសិនជាបញ្ហានេះ បន្ដកើតឡើងជាញឹកញាប់ វាមិនត្រឹមតែប៉ះពាល់ដល់សង្វាក់ផលិតកម្មរបស់ Toyota និងខាតទឹកប្រាក់រាប់លានដុល្លារ នោះទេ​ តែបង្ហាញពីការធូររលុង នៃប្រតិបត្តិការខ្សែសង្វាក់ផ្គត់ផ្គង់របស់ខ្លួន ដែលជារឿងដែល Toyota មិនងាយឲ្យកើតមានកន្លងមក។  

ប្រភព៖ Reuters

អត្ថបទ៖ Andra 

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!