ថ្មីៗនេះ តាមការឲ្យដឹងពី រដ្ឋបាលរាជធានីភ្នុំពេញ បានចេញសេចក្ដីជូនដំណឹងមួយស្ដីពីការរៀបចំពិធីបើកការដ្ឋានសាងសង់ ស្ពានអាកាសថ្មីចំនួន ២កន្លែងបន្ថែមទៀតក្នុងក្រុងភ្នំពេញ ដែលមានតម្លៃសរុបជាង ៤៦ លានដុល្លារអាមេរិក ជាមួយនឹងការបញ្ចៀសចរាចរណ៍ត្រង់កំទីតាំងប្រារព្ធពិធី ចំនួន ៣ ថ្ងៃ។ 

គួរឲ្យដឹងដែរថា ស្ពានអាកាស ទាំងពីរ​ នេះ មានទីតាំង ១ ស្ថិតនៅត្រង់ចំណុចប្រសព្វមហាវិថីសម្ដេចតេជោហ៊ុន សែន មហាវិថី ព្រះមនុវង្ស និងមហាវិថី កងយោធពលខេមរភូមិន្ទ (ផ្លូវលេខ ២៧១​ )ក្នុងទឹកដីខណ្ឌចំការមន និងខណ្ឌមានជ័យ និង ស្ពានអាកាសទី ២ ស្ថិតនៅចំណុចប្រសព្វ មហាវិថីសហពន្ធរុស្ស៊ី និង មហាវិធីសម្ដេចចៅហ្វាវាំង វរវៀងជ័យ អធិបតីស្រឹង្គារ គង់ សំអុល (ផ្លវលេខ ២០០៤) ក្នុងខណ្ឌពោធិ៍សែនជ័យ ដែលមានតម្លៃសរុបជាទឹកប្រាក់ជាង ៤៦ ៧៧៥ ០០០ ដុល្លារអាមេរិក។

ស្ពានអាកាសទាំងពីរនេះ នឹងត្រូវបានសាងសង់ដោយក្រុមហ៊ុនវិនិយោគទុន អណិកជនកម្ពុជា (OCIC) ដោយចំណាយពេល រង្វង់ ៣៦ ខែ សម្រាប់ស្ពានអាកាសទី ១ និង ១៦ ខែសម្រាប់ការសាងសង់ស្ពានអាកាសទី ២។ 

ក្នុងនោះដែរ ខ្លឹមសារសេចក្ដីប្រកាសបានឲ្យដឹងថា រដ្ឋបាលរាជធានីភ្នំពេញ នឹងធ្វើការបញ្ចៀសចរាចរ និងផ្អាកជាបណ្ដោះអាសន្ន មិនអនុញ្ញាតឲ្យមានយានជំនិះឆ្លងកាត់នៅកំណាត់ផ្លូវ រាប់ពីចំណុចប្រសព្ធមហាវិថីសម្ដេចតេជោ ហ៊ុន សែន មហាវិថីព្រះមុនីវង្ស និងវិថីកងយុទ្ធពលខេមរភូមិន្ទ រហូតដល់ស្ដុបចំណុបប្រសព្ធមហាវិថី​សម្ដេចតេជោហ៊ុន សែន (ផ្លូវ ៦០ម៉ែត្រ) ជាមួយនឹងមហាវិថីអ្នកឧកញ៉ា មហាភក្ដីសប្បុរិសភោគាធិបតី ហ៊ុន នាង​ (ផ្លូវ ៣០ម៉ែត្រ) រយៈពេល ៣ ថ្ងៃ ចាប់ពីថ្ងៃទី ២៩ ខែ សីហា ឆ្នាំ ២០២២ ដល់ថ្ងៃទី ៣១ ខែ សីហា ឆ្នាំ ២០២២ នេះ ដើម្បី រៀបចំពីធីបើកការដ្ឋានសាងសង់ស្ពានអាកាស ២ កន្លែង ក្រុងភ្នំពេញ ដោយផុតថ្ងៃកំណត់នេះ រដ្ឋបាលរាជធានីភ្នំពេញ នឹងបើកឲ្យចរាចរណ៍ចំណុចនេះដូចធម្មតាវិញ ។ 

យោងតាមប្រសាសន៍របស់សម្ដេច តេជោហ៊ុនសែន ក្នុងពិធីសម្ភោធបើកការសាងសង់នេះបានឲ្យដឹងថា សម្ដេចបានដាក់ឈ្មោះឲ្យស្ពានអាកាសទី ១ ថា ស្ពានអាកាសព្រះមុន្នីវង្ស និងស្ពានអាកាសទី ២ ថា ស្ពានអាកាស គង់ សំអុល និងបានបន្ថែមទៀតថា មកទល់ពេលបច្ចុប្បន្ននេះ រាជធានីភ្នំពេញបានចំណាយលើការសាងសង់ទាំងស្ពានឆ្លងទន្លេ និងស្ពានអាកាសសរុបថវិកាជាង ២២៦លានដុល្លារអាមេរិកហើយ លើសពីនេះ រាជរដ្ឋាភិបាលកំពុងសិក្សាបង្កើតក្រុងល្វាឯមនាពេលខាងមុខផងដែរ។ 

អត្ថបទ៖ Andra