ក្រោយពីដើរបបួលក្រុមហ៊ុនល្បីៗ ៧ ធ្វើស្ថានីយសាកឡានអគ្គិសនីស្ដង់ដារតែមួយកាលពីពេលថ្មីៗនេះ មហាសេដ្ឋីស្ថាបនិកក្រុមហ៊ុន Tesla លោក Elon Musk បានប្រកាសបន្ថែមមុខរបររកស៊ីមួយទៀតភ្ជាប់ជាមួយគ្នានេះ​ នោះគឺគម្រោងបើកអាហារដ្ឋាន Tesla ប្រចាំនៅស្ថានីយ៍សាកឡានអគ្គិសនី Supercharged របស់ខ្លួនតែម្ដង។  

តាមការឲ្យដឹងពី Teslarati ថា លោក Musk មានគម្រោងរៀបចំដាក់ អាហារដ្ឋាន Tesla (Diner and Drive-in Movie Supercharged) នេះ នៅស្ថានីយ៍សាកឡានអគ្គិសនីរបស់លោក នៅ Santa Monica Boulevard តាំងពីឆ្នាំ ២០១៨ មកម្លេះ តែទើបតែសម្រេចការគូប្លង់លំអិត និងដាក់ស្នើការសាងសង់កាលពីឆ្នាំ ២០២២ និងទទួលបានការអនុញ្ញាតឲ្យសាងសង់ពី នាយកដ្ឋានសំណង់ និងសុវត្ថិភាព កាលពីខែ កក្កដា កន្លងទៅ ដែលលោកបានបង្ហាញរូបភាពគម្រូរបស់ អាហារដ្ឋាននេះនៅក្នុងទិវាអ្នកវិនិយោគប្រចាំឆ្នាំ កាលពីពេលថ្មីៗនេះ។ 

តាមរយៈប្លង់គម្រូបានបង្ហាញឲ្យឃើញថា Tesla Diner and Drive-in Movie នេះនឹងត្រូវសាងសង់ជា ២ ជាន់ ដោយផ្នែកខាងក្រៅជុំវិញអគារ មានឧបករណ៍សាក ៣២ គ្រឿង ហើយនឹងបំពាក់ អេក្រង់យក្សសម្រាប់បញ្ចាំងរឿង និងវីដេអូឃ្លីប ផ្សេងៗចំនួន ២ ក្នុងនោះដែរ ទាំងជាន់លើ និងជាន់ក្រោម មានកន្លែងអង្គុយ ផាសុខភាពសម្រាប់ឲ្យភ្ញៀវសម្រាកលំហែ ពេលរង់ចាំសាកឡាន។ ស្ថានីយ៍ទីមួយនេះ នឹងសាងសង់នៅភាគខាងកើត​ Hollywood ផ្សេងពីកន្លែងដែលបានគ្រោងដំបូង​។ 

សូមជម្រាបផងដែរថា កាលពីពេលថ្មីៗនេះ Tesla ក៏ទើបតែសម្រេចចាប់ដៃសហការ ដាក់ទុនធ្វើស្ថានីយ៍សាកឡានអគ្គិសនីស្ថង់ដាររួមគ្នាជាមួយក្រុមហ៊ុនល្បីៗ ៧ ទៀតដូចជា BMW, General Motor, Honda, Hyundai, Kia, Mercedes Benz, និង​ Stellantis  ចំនួន ៣០ ០០០ កន្លែង​ក្នុងទឹកដីអាមេរិក នៅរង្វង់ដើមឆមាសទី ២ នៃឆ្នាំ ២០២៤ និងបន្ដទៅកាណាដា និងប្រទេសផ្សេងៗទៀតនៅឆ្នាំបន្ដបន្ទាប់ ដូច្នេះ Tesla Diner នេះអាចនឹងត្រូវពង្រីកទៅតាមទីតាំងទាំងនេះជាបន្ដបន្ទាប់ផងដែរ។​ 

ប្រភព៖ Teslarati 

អត្ថបទ៖ Andra 

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!