បន្ទាប់ពីបានចុះបញ្ជីវិនិយោគដាក់លក់រថយន្ដអគ្គិសនីផ្ទាល់ក្នុងប្រទេសថៃ កាលពីប៉ុន្មានខែមុន ថ្មីៗនេះ តាមការចុះផ្សាយពី សារព័ត៌មាន TeslaRati បានឲ្យដឹងថា Tesla បានប្រកាសបើកទីស្នាក់ការនេះ ជាផ្លូវការហើយ ដោយយកទីតាំងនៅក្នុងទីក្រុង​ បាងកក ហើយបច្ចុប្បន្នកំពុងតែធ្វើការជ្រើសរើសបុគ្គលិក លើផ្នែកជាច្រើន ដែលបានបង្ហោះជាសាធារណក្នុងវេបសាយការងាររបស់ Tesla តែម្ដង។​

យោងតាមការឲ្យដឹងពី នាយកដ្ឋានអភិវឌ្ឍអាជីវកម្មថៃ ថា ក្រុមហ៊ុន Tesla (Thailand) Co., Ltd. បានចុះឈ្មោះក្នុងបញ្ជីវិនិយោគដាក់លក់រថយន្ដអគ្គិសនីផ្ទាល់ក្នុងប្រទេសថៃ កាលពីថ្ងែទី ២៥ ខែមេសា ឆ្នាំ ២០២២ ថ្មីៗនេះ ហើយវេបសាយ DataforThai ក៏បានចុះផ្សាយដែរថា​ ទីស្នាក់ការថ្មីនេះគឺមានតួនាទីជាអ្នកផ្សព្វផ្សា​យ និងបម្រើសេវាទិញ-លក់ រថយន្ដអគ្គិសនី Tesla គ្រប់ប្រភេទ ពាសពេញប្រទេសថៃ មិនថា ជា រថយន្ដខ្នាតតូចអ្នកជិះធម្មតា, pickup, រថយន្ដដឹកអ្នកដំណើរធន់តូច ក្នុងនោះក៏មានលក់ទាំងផលិតផលផ្សេងៗទៀតរបស់ Tesla ដូចជា អាគុយឡានអគ្គិសនី និង បន្ទៈសូឡា ព្រមជាមួយនឹងការដាក់ប្រព័ន្ធផ្ទុកថាមពល ឧបករណ៍ផ្ទុកថាមពលផ្ទាល់ផងដែរ​។

នេះគឺជាដំណឹងល្អមួយសម្រាប់ប្រទេសថៃ ដោយសារតែកាលពីមុនរថយន្ដអគ្គិសនី Tesla ដែលលក់ចេញពីឈ្មួញនាំចូលសរុបទាំងថ្លៃពន្ធ ថ្លៃសេវាផ្សេងៗ មួយគ្រឿងមានតម្លៃដល់ទៅជាង ៣ លានបាត ឬ ៨៧,៦៨៨ ដុល្លារ ធៀបទៅនឹងទីផ្សារអាមេរិកដែលលក់ត្រឹមតែ ២៩ ២២៩ ដុល្លារ ដូច្នេះហើយការនាំចូលរថយន្ដ Tesla មកលក់ក្នុងទីផ្សារថៃដោយផ្ទាល់អាចកាត់បន្ថយតម្លៃលក់បច្ចុប្បន្នដល់ទៅពាក់កណ្ដាល ដែលសមស្របនឹងការប្រកួតប្រជែង ជាមួយរថយន្ដអគ្គិសនីដទៃទៀតរបស់ចិន និងជប៉ុន នេះបើតាមការឲ្យដឹងពី គេហទំព័រព័ត៌មានមួយរបស់ប្រទេសថៃ The Standard។ 

Tesla Thailand មិនបានបង្ហើបថា នឹងត្រូវការបុគ្គលិកប៉ុន្មាន និងមានគម្រោងសម្ភោធជាផ្លូវការនៅពេលណានៅឡើយទេ​ តែសន្និដ្ខានថាការដាក់ទីស្នាក់ការលក់នេះ អាចជាជំហានដំបូងសម្រាប់ Tesla ចូលទឹកដីអាស៊ីអគ្នេយ៍ ហើយគេរំពឹងដែរថា ប្រទេស ថៃ អាចនឹងក្លាយជាទីតាំងបន្ទាប់សម្រាប់ Tesla បោះទុនសាងសង់រោងចក្រផ្គុំដំឡើងប្រចាំតំបន់នេះផងដែរ។ 

អត្ថបទ៖ Andra