Hilux Vigo ជាឡាន Pick Up របស់ Toyota ដែលបោះជំហានចូលទីផ្សារអាស៊ី ទទួលបានការគាំទ្រខ្លាំង ក្នុងអំឡុងឆ្នាំ ២០០៥ ដែលជាជំនាន់ទី៧ ។ ចំពោះស្រុកខ្មែរវិញអាចនិយាយបានថា Vigo ជាឡាន Pick Up របស់ជប៉ុនដំបូងគេផងដែរ ដែលមានទីតាំងក្រុមហ៊ុននៅស្រុកខ្មែរផ្ទាល់ ហើយក៏ទទួលជោគជ័យខ្លាំង។

ខណៈបច្ចុប្បន្ន Vigo ជំនាន់ទី៧ ស៊េរីឆ្នាំ ២០០៥ ដល់ ២០១៥ នៅតែឃើញប្រើប្រាស់ប្រចាំថ្ងៃធម្មតា ចំណែកទីផ្សារលក់ចេញទិញចូល ក៏នៅតែមានជាហូរហែ ហើយល្បីថាតម្លៃទីផ្សារនៅនឹងល្អគ្រាន់បើ។

សម្រាប់ Vigo ជំនាន់ទី៧ ត្រូវបានគេបែងចែកជា ២ប្រភេទគឺស៊េរីឆ្នាំ២០០៥ ដល់ ២០១១ នឹងឆ្នាំ២០១២ ដល់២០១៥ ដែលជាកំណែទម្រង់ថ្មី ឬហៅថា Facelift លើកទី១ ក្នុងជំនាន់ទី ៧ ។

ចំពោះតម្លៃទីផ្សារបច្ចុប្បន្នសុំនិយាយតែប្រភេទឡាន Vigo ចង្កូតឆ្វេងហ្ស៊ីនប៉ុណ្ណោះ ដែលមានតែប្រភេទស្លាកលេខ ហើយពពួក ឆ្នាំ២០០៥ ដល់ ២០១១ ខ្ទង់ ១៦,០០០ដុល្លារជាង ទៅ ២០,០០០ដុល្លារបន្ដិច ខណៈស៊េរីឆ្នាំ ២០១២ ដល់២០១៥ ខ្ទង់ ២ម៉ឺនដុល្លារស្ដើង ដល់ ២ម៉ឺនដុល្លារក្រាស់ឯណោះ អាស្រ័យលើប្រភេទពណ៌ ឆ្នាំផលិត នឹងភិនភាគឡានជាក់ស្ដែង។

គួរបញ្ជាក់ថា៖ Toyota Hilux Vigo ប្រើម៉ាស៊ីនម៉ាស៊ូត ៤ស៊ីឡាំង ៣.០លីត្រ ជំនួយដោយ Turbo ផលិតកម្លាំងបាន ១៧១សេះ កម្លាំងរមួល ២៥២ផោនហ្វីត រត់ដោយប្រអប់លេខ ៤វគ្គអូតូ នឹង ៥វគ្គអូតូសម្រាប់ ២០១២ឡើង បង្វិលកងដោយប៉ុងមួយ(RWD) និងប៉ុងពីរ(4WD) មានលេខដៃសម្រាប់ជំនួយដែលខ្មែរយើងហៅថាកាពីតាស់។

ចំណែកកម្រិតស៊ីប្រេងវិញចន្លោះពី ៨លីត្រជាង ទៅ១១លីត្រ ក្នុង១០០គីឡូម៉ែត្រ ឬអាចលើសខ្វះតិចតួច អាស្រ័យលើស្ថានភាពជាក់ស្ដែង។

សម្រាប់បងប្អូនវិញយល់យ៉ាងណាដែរចំពោះ Toyota Hilux Vigo ស៊េរីឆ្នាំ ២០០៥ ដល់ ២០១៥ មួយនេះ? បងប្អូនដែលមានមតិយោបល់ បទពិសោធន៍ នឹងព័ត៍មានបន្ថែម អាចចែករំលែកបាន៕

ដោយ៖ Bunsak 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ។

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!