បញ្ហាគ្រោះថ្នាក់ចារចរណ៍តែងតែកើតមានជារៀងរាល់ថ្ងៃ វាអាចមកពីកត្តាជាច្រើនដូចជា ការបើកបរមិនគោរពច្បាប់ មិនចេះអធ្យាស្រ័យគ្នា មិនបានត្រួតពិនិត្យយានយន្ដមុនពេលធ្វើដំណើរ នឹងភ្លេចភ្លាំងស្មារតីពេលបើកបរជាដើម។ 

ថ្ងៃនេះ Advan Auto សូមលើកយកនៅគោលការណ៍សុវត្ថិភាពពេលបើកបរខ្លះៗចំនួន ១០ចំណុច ដើម្បីធានាបាននៅការបើកបរប្រកបដោយគុណភាព និងសុវត្ថិភាពខ្ពស់ ជូនដល់បងប្អូនប្រិយមិត្តទាំងអស់គ្នាក្នុងការធ្ចើដំណើរ។

១/ ត្រួតពិនិត្យឲ្យបានហ្មត់ចត់មុនពេលធ្វើដំណើរ

មុនពេល​បើកបរ​ត្រូវ​ត្រួតពិនិត្យ​យានយន្ត​របស់​លោក​អ្នក​ឲ្យ​បាន​ហ្មត់ចត់ ចៀសវាង​គ្រោះថ្នាក់​​ជាយថាហេតុ​ ដោយការធ្វេសប្រហែសរបស់អ្នកដូចជា សំបកកង់ សម្ពាធខ្យល់ ភ្លើងស៊េញ៉ូ ប្រព័ន្ធភ្លើងចង្កៀង និងស្បែកហ្វ្រាំងឲ្យបានត្រឹមត្រូវ។

២/ ត្រួតពិនិត្យប្លុកម៉ាស៊ីន

ប្លុកម៉ាស៊ីនក៏ជាផ្នែកមួយសំខាន់ ដែលត្រូវយកចិត្តទុកដាក់ ហើយអ្វីដែលបងប្អូនត្រូវមើលដោយខ្លួនបាននោះគឺ ប្រេងម៉ាស៊ីន ថាតើប្រេងម៉ាស៊ីនរថយន្ដបងប្អូនមានគុណភាពឬអត់ បើប្រែពណ៌ត្រូវប្ដូរចេញ បើនៅល្អហើយខ្វះត្រូវចាក់បន្ថែមឲ្យគ្រប់តាមរង្វាស់ម៉ាក់កេរ។ មួយទៀតគឺ ប្រេងហ្វ្រាំង នឹងទឹកស្អំម៉ាស៊ីន ក៏ត្រូវបានមើលថែទាំដូចទៅនឹងប្រេងម៉ាស៊ីន ។ 

សម្រាប់ ២ចំណុចខាងលើ ចំពោះបងប្អូនដែលមិនសូវយល់ពីរបៀប ថែទាំប្រើប្រាស់ បងប្អូនគួរទៅជួបត្រួតពិនត្យ នឹងពិភាក្សាជាមួយជាងជំនាញដែលបងប្អូនទុកចិត្តបាន។

៣. សម្រាក់ឲ្យបានគ្រប់គ្រាន់មុនពេលធ្វើដំណើរ 

ជាការពិតការបើកបរ​នៅ​​ពេល​លោកអ្នក​ហត់នឿយខ្លាំង គឺ​ងាយ​កើតមាន គ្រោះថ្នាក់​ ដូច្នេះ​លោកអ្នក​ត្រូវ​សម្រាក​ឲ្យ​បាន​គ្រប់គ្រាន់​មុនពេល​បើកបរ​។ ប្រសិនបើនៅពេល​លោកអ្នក​មាន​អារម្មណ៍​ថា​ងងុយដេក ឬអាចភ្លឹក​ពេល​កំពុង​បើកបរ នោះ​វា​ងាយ​នឹង​បង្ក​គ្រោះថ្នាក់​ខ្លាំងណាស់​។

៤/  មុនពេល​ចេញដំណើរត្រូវ​ពាក់​ខ្សែក្រវាត់​ឲ្យ​បាន​ត្រឹមត្រូវ 

ការពាក់ខ្សែក្រវាត់គឺជារឿងសំខាន់ នឹងចាំបាច់បំផុតសម្រាប់ការពារជីវិតរបស់អ្នកប្រសិនបើជួបឧបត្តិវហេតុណាមួយ។

ហើយ​ត្រូវ​ប្រាកដ​ថា​អ្នកដំណើរ​ទាំងអស់​ពាក់​ខ្សែក្រវាត់​របស់​ពួកគេ​បាន​ត្រឹមត្រូវ​ផងដែរ​។ ការពាក់​ខ្សែក្រវាត់​គឺ​ដើម្បី​សុវត្ថិភាព​ផ្ទាល់ខ្លួន និងការពារពីការផាកពិន័យរបស់សមត្ថកិច្ច ហើយ​ក៏​ជា​ច្បាប់​តម្រូវ​ផងដែរ​។

៥/ ត្រូវរៀបចំកៅអី នឹងកញ្ចក់មុខក្រោយ ឆ្វេងស្ដាំងឲ្យបានត្រឹមត្រូវ

តម្រូវកៅអីអង្គុយបើកបរ និងចង្កូតឲ្យបានត្រឹម ម្យ៉ាងត្រូវពិនិត្យមើល កញ្ចក់មើលក្រោយ នឹងសងខាង ដើម្បីធានាថា បងប្អូនអាចងាយស្រួលបតបែន និងមើលឃើញបានច្បាស់ ស្រឡាស់ល្អនៅជុំវិញខ្លួនបាន។

៦/ ផ្ចង់ស្មារតីក្នុងការបើកបរ

ស្មារតីគឺជារឿងសំខាន់ ដូច្នេះមិនគួរនិយាយ​លេង ឬជជែកគ្នាច្រើនពេលកំពុងបើកបរទេ ម្យ៉ាងទៀតមិនត្រូវបើកសម្លេង ឬចាក់តន្ត្រីឮខ្លាំងៗឡើយ។ ​ក្រៅពីនឹងក៏ពុំគួរប្រើទូរសព្ទ័ដូចជា តបសារឬឆែកមើលកម្មវិធីផ្សេងៗនោះទេ ក្នុងករណីខលនិយាយគួរតែមានឧបរកណ៍ជំនួយ។ ម្យ៉ាងទៀតភ្នែក​ត្រូវ​សម្លឹង​មើល​ផ្លូវ​ជាប់​ជានិច្ច ប្រយ័ត្ន​ប៉ះទង្គិច​អ្នក​ថ្មើរជើង​ ឬ​រថយន្ត​ដទៃ​ដែល​កំពុង​ធ្វើ​ចរាចរណ៍​លើ​ដងផ្លូវ​ជាមួយ​អ្នក​។

៧/ ការបើកបរត្រូវរក្សាគម្លាត

ពេល​បើកបរ​ត្រូវ​រក្សា​គម្លាត​ឲ្យ​នៅ​ឆ្ងាយ​ពី​រថយន្ត​ខាងមុខ ករណី​ជាន់​ហ្វ្រាំង​បន្ទាន់ គឺ​មិន​បង្ក​គ្រោះថ្នាក់​ជាមួយ​រថយន្ត​នៅខាងមុខ​។

៨/ មុនបត់ឬឈប់ត្រូវផ្ដល់សញ្ញាជាមុន

ការផ្ដល់ភ្លើងសញ្ញាគឺជារឿងសំខាន់ ដើម្បីឲ្យអ្នកធ្វើដំណើរខាងក្រោយដឹងពីបំណងរបស់ឡានខាងមុខ។ ហើយចំពោះការបត់ឆ្វេង ឬស្ដាំ អ្នកគួរតែផ្ដល់សញ្ញាមុនយ៉ាងតិចក្នុងរយៈចម្ងាយ ២០ម៉ែត្រ នៃផ្លូវដែលបងប្អូនត្រូវបត់។

៩/ បើកបរគោរពច្បាប់ នឹងចេះអធ្យាស្រ័យគ្នា

ការបើកបរគោរពច្បាប់គឺជារឿងចាំបាច់បំផុត បើកបរតាមល្បឿនកំណត់ ចេះអធ្យាស្រ័យគ្នាទៅវិញទៅមក ជាពិសេសត្រូវដឹងពីអទិភាព ក្នុងការឆ្លងកាត់ ម្យ៉ាងទៀតត្រូវបើកបរឲ្យត្រូវតាមគន្លងរបស់ខ្លួន។

១០/ ស្រវឹងកុំបើកបរ

បងប្អូនត្រូវប្រកដ់ថា ការបើកបរគ្មានជាតិស្រវឹង ហើយបងបរដោយការទទួលខុសត្រូវខ្ពស់។

បំណងល្អពី Advan Auto ! សូមជូនពរបងប្អូន ធ្វើដំណើរប្រកបដោយសុវត្ថិភាព សុខសប្បាយជួបជុំគ្រួសារ រីករាយឆ្នាំថ្មី៕

ដោយ៖ Bunsak 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ។

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!