១.Toyota Prius ០៤-០៩

Toyota Prius សេរីចាស់មែនតែតម្លៃកាន់តែឡើងខ្ពស់ទៅៗ គួរឲ្យកត់សម្គាល់ បើតាមហាងឆេងពីអ្នកលក់ឡានមួយទឹកនៅកម្ពុជា បានអោយដឹងថា រដូវកាលធម្មតាចំពោះ​​ ០៤-០៩ កាន់លុយតែ១២០០០-១៥០០០ដុល្លារអាចទិញបានហើយ។ តែមុនចូលឆ្នាំនេះវិញ ចាយលុយខ្ទង់ ១៣០០០-១៦០០០ ដុល្លារជាងឯណោះ។

អាព្រូសជំនាន់ទី ២ នេះបង្វិលកង់ដោយប៉ុងមុខ FWD និងរត់ដោយប្រអប់លេខអូតូ CVT (ប្រអប់លេខដែលមានតែលេខ Low & High ដាក់លេខទៅមុខតែម្តង អត់ចាំបាច់ដូរលេខចុះឡើង) ។

ចំពោះកម្រិតស៊ីសាំងវិញ​ ជាមធ្យម ៥L/១០០km ប៉ុន្តែសម្រាប់ការប្រើក្នុងក្រុងវាស៊ីត្រឹមតែ​ ៤​​L/១០០km ។ វាល្អសម្រាប់ប្រើប្រាស់ក្នុងទីក្រុងដោយវាដំណើការពាក់កណ្ដាលអាគុយ និងពាក់កណ្ដាល ម៉ាស៊ីន ចំណែកឯពេលដែលស្ទះវាប្រើកម្លាំងអាគុយដើម្បីបង្វិលកង់។

២​.Camry បាឡែន​ ០២-០៥

Camry បាឡែន មិនខុសពីអាព្រូសប៉ុន្មានទេ បងប្អូនជីដូនមួយនឹងគ្នា អញ្ចឹងតម្លៃនៅហ្នឹងល្អដូចគ្នា ទោះបីសេរ៊ីទាបបន្តិច តែពេញនិយមមែនទែននៅស្រុកខ្មែរ ។ តម្លៃធម្មតា ០២-០៥ ចន្លោះពី​ 

១៣០០០-១៥០០០ដុល្លារ តែពេលមានបុណ្យទានម្ដងៗ វាឡើងដូចតែគេដែរ មានខ្ទង់ ១៤០០០-១៦០០០ ដុល្លាជាងឬអាចហក់ដល់ទៅ ១៧០០០ដុល្លាឯណោះ ទើបយកទៅជិះលេងចូលឆ្នាំបាន។

វាបំពាក់ម៉ាស៊ីន ៤ សុីឡាំង មុខកាត់ស៊ីឡាំង ២.៤ លីត្រ ផលិតកម្លាំង ១៥៧ សេះរត់ដោយប្រអប់លេខ ៤ វគ្គអូតូ បង្វិលកង់ដោយប៉ុងមុខ (FWD) ជាមួយល្បឿនលឿនបំផុត ២០៩ km/h ជាន់ស្ទុះពី ០-១០០ km/h ប្រើរយៈពេល ៩.៤ វិនាទី។ កម្រិតសុីសាំង Camry បាឡែន ជាមធ្យមស៊ី ១០L/១០០ km ប៉ុន្តែសម្រាប់ក្នងក្រុងវាស៊ីសាំងខ្ទង់​ ១១L/១០០km និងក្រៅក្រុង​ ៨.៥L/១០០km។

៣. Camry / Camry Hybrid ០៧

ក្រឡេកមកមើល ប្រភេទ Hybrid សេរ៊ីល្មមៗវិញ Camry Hybrid បំពាក់ម៉ាស៊ីន ២.៤ លីត្រ និងជំនួយដោយម៉ូទ័រ ១ គ្រាប់ សរុបកម្លាំងម៉ាស៊ីន និងម៉ូទ័រផលិតបាន ១៨៧ សេះ ប្រើប្រអប់លេខ​ CVT អូសទាញដោយប៉ុងមុខ (FWD)ជាមួយល្បឿនលឿនបំផុត ២០២ km/h អាចជាន់ស្ទុះពី ០-១០០ /km ប្រើរយៈពេល ៩.៦​ វិនាទី។

ចំណែកឯ Camry ០៧ (សាំងសុទ្ធ) បំពាក់ម៉ាស៊ីន ៤ សុីឡាំង មុខកាត់ស៊ីឡាំង ២.៤ លីត្រ ផលិតកម្លាំង ១៥៨ សេះ រត់ដោយប្រអប់លេខ ៥ វគ្គអូតូ បង្វិលកង់ដោយប៉ុងមុខ (FWD) ជាមួយល្បឿនលឿនបំផុត ២៣០ km/h ជាន់ស្ទុះពី ០-១០០ km/h ប្រើរយៈពេល ៧.៤ វិនាទី។ ចំពោះប្រភេទប្រើម៉ាស៊ីនសាំងសុទ្ធ កម្រិតស៊ីសាំង ជាមធ្យមស៊ី ៩.៨L/១០០ km ប៉ុន្តែសម្រាប់ក្នងក្រុងវាស៊ីសាំងខ្ទង់​ ១១L/១០០km និងក្រៅក្រុង​ ៧.៨L/១០០km។

៤. Prius ២០១០

ជាមួយគ្នានេះ Toyota Prius ០១០ ដែលមានតម្លៃត្រដំត្រសងជាមួយ Camry Hybrid ០៧ ក៏បានហក់ឡើងថ្លៃដូចគ្នា ដោយថ្ងៃខែធម្មតាចំណាយចន្លោះពី២០០០០-២៥០០០ ដុល្លាជាង តែមុនចូលឆ្នាំបែបនេះថ្លៃទឹកដោះឡើងខ្ពស់គួរសម មានប្រហែល ២២០០០-២៧០០០ ដុល្លារជាងទើបអាចដណ្ដឹងបាន។

អាព្រូស ០១០ បំពាក់ម៉ាស៊ីន ៤ ស៊ីឡាំងតម្រៀងមួយជួរ (I-4) ចំណុះ ១.៨​ លីត្រ ជំនួយដោយម៉ូទ័រ ១ គ្រាប់

សរុបកម្លាំងទាំងម៉ាស៊ីននិងម៉ូទ័រ ផលិតបាន ១៣៤ សេះ

 ដែលអាចជាន់ស្ទុះពី ០-១០០ km/h ប្រើរយៈពេល ១០វិនាទី ជាមួយនឹងល្បឿនលឿនបំផុតអាចជាន់បាន ១៨៣ km/h បង្វិលកង់ដោយប៉ុងមុខ FWD ។

ចំពោះកម្រិតស៊ីសាំងវិញ​ ជាមធ្យម ៥L/១០០km ប៉ុន្តែសម្រាប់ក្នងក្រុងវាស៊ីត្រឹមតែ​ ៤.៥​​L/១០០km និងក្រៅក្រុង​ ៥L/១០០km។ 

គួរបញ្ជាក់ដែរថា ខាងលើនេះគ្រាន់តែជាតម្លៃទូទៅប៉ុណ្ណោះ ចំពោះតម្លៃជាក់ស្តែងរបស់រថយន្ដអាស្រ័យទៅតាម ប្រភេទ Option ពណ៍ និងឆ្នាំផលិតរបស់វា ក្រោយពីឃើញតម្លៃហើយ លោកអ្នកដែលចង់ទិញរថយន្ដប៉ុន្មានម៉ូឌែលខាងលើនៅរដូវកាលចូលឆ្នាំខ្មែរនេះ អាចពិចារណាសិនក៏មិនទាន់ហួសពេលដែរ៕

អត្ថបទដោយ ៖ BunSak