…………………………………………………………………..

• ចុច Subscribe Channel Telegram របស់ Advan Auto ដើម្បីទទួលបានព័ត៌មាន ចំណេះដឹង និងការកំសាន្ដថ្មីៗអំពីរថយន្ដ

ការប្រើប្រាស់ឡាននៅស្រុកខ្មែរភាគច្រើនម្ចាស់ឡានតែងតែជួបបញ្ហាធំមួយ គឺឡានឆាប់ខូចជើងក្រោមជាញឹកញាប់ ដោយហេតុថាផ្លូវថ្នល់ផ្នែកខ្លះ មានការខូចខាត ឬមិនទាន់បានធ្វើស្អាតនៅឡើយទេ ដូចនេះបើសិនជា ម្ចាស់ឡានគ្រប់រូបមិនសូវយកចិត្តទុកដាក់ថែទាំនោះទេ  នោះប្រព័ន្ធជើងក្រោមឡានអ្នកនឹងឈឺជាញឹកញាប់។

តួនាទី និង​ផ្នែកសំខាន់ៗ នៃជើងក្រោមរថយន្ដរួមមាន កង់ និងសំបកកង់ មានតួនាទីបង្វិលឲ្យឡានទៅមុខ, បូមនិងរ៉ឺស័រជួយទប់ឡានកុំឲ្យឃ្លីងឃ្លោង,​ ចំពោះចុងទាំងសងខាងនៃប៉ុងខាងមុខ ត្រូវបានភ្ជាប់គ្នាជាមួយសន្លាក់ ភ្លៅកង់ (knuckle) ដោយកន្លាស់ភ្លៅកង់ (kingpin) ហើយចុងដុំក៏ត្រូវភ្ជាប់ជាមួយភ្លៅកង់ដែរតាមរយៈបា៉​​​ដាង ហើយវាមាននៅគ្រឿងបង្គុំដែលជាតំណជាច្រើនដូច ជាកៅស៊ូញាក់ រ៉ូទីល និងប៉ាដាង ជាដើម ដើម្បីធ្វើឲ្យដៃភ្ជាប់ អាចបត់បែនបាន និងចុងក្រោយគឺប្រព័ន្ធចង្កូត (Steering System)​ ដែលវាភ្ជាប់គ្នាជាមូយនឹង ប្រព័ន្ធជើងក្រោមដើម្បីដំណើរការ បត់បែន ទៅតាមការគ្រប់គ្រងរបស់អ្នកបើកបរ ។

ឥឡូវនេះងាកមកមើលគម្លឹះសំខាន់ទាំង ៥ដើម្បីថែទាំប្រព័ន្ធជើងក្រោមឡានអ្នកឲ្យប្រើបានយូរ៖

1. សប់កង់ឲ្យតឹងៗ

ជារឿងតូចតាចដែលអ្នកត្រូវធ្វើជាប្រចាំ​ ពោលគឺសប់កង់ឡានឲ្យបានត្រឹមត្រូវទៅតាមចំនួនកំណត់ និង ថ្លឹងកង់ទាំងអស់ឲ្យសមមូលគ្នា។ កង់ឡានដែលធូរមានសម្ពាធខ្យល់មិនគ្រប់ នឹងនាំឲ្យឡានអ្នកស៊ីសាំង ជាន់ហ្រ្វាំងមិនសូវមានប្រសិទ្ធភាព ជាពិសេសជើងក្រោមឡានអ្នកនឹងប្រទាញប្រទង់ចុះឡើងពេលបើកបរ ដែលនាំឲ្យវាឆាប់ខូចមុនអាយុកាលកំណត់ ។

2. តម្រង់កង់

ករណីកង់ឡានអ្នករត់មិនស្មើគ្នា នោះចង្កូតឡានរបស់អ្នកនឹងប្រទាញទៅឆ្វេងឬទៅស្តាំខុសប្រក្រតី មានន័យថា ប្រព័ន្ធចង្កូតរបស់អ្នកកំពុងមានបញ្ហា ឬអាចខូចម៉ែត្រចង្កូត។ ប៉ុន្ដែដោយសារសម័យនេះ យើងមានម៉ាស៊ីនតម្រង់កង់ទំនើប ដែលជួយដោះស្រាយបញ្ហានេះត្រឹមតែប៉ុន្មាននាទីប៉ុណ្ណោះ ។

3. ឆែកមើល កៅស៊ូញាក់ និង សន្លាក់ភ្លៅកង់

រាល់ពេលដែលអ្នកយកឡានទៅដូរប្រេងម៉ាស៊ីន អ្នកគួរតែឲ្យជាងជួយឆែកមើល កៅស៊ូញាក់ និង សន្លាក់ភ្លៅកង់ ព្រោះវាជួយឲ្យដៃតំណរភ្ជាប់ជើងក្រោម អាចបត់បែនបានទៅតាមស្ថានភាពផ្លូវ ប៉ុន្តែដោយសារវាត្រូវរងទម្ងន់រាប់ រយគីឡូ អញ្ចឹងវាអាចមានកំហូច សឹកជាដើម លើសពីនឹងទៀតគឺរូទីល និង អាវីសេក៏ ត្រូវពិនិត្យប្រេងរំអិលវាឱ្យបានល្អផងដែរ ការពារ វាបង្កជាសម្លេងរំខាន និងពិបាកក្នុងការបើកបរ ។

4. ឆែកមើលបូម និងរឺស័រ

បូមនិងរឺស័រ ធ្វើការជាប្រចាំលើការទប់លំនឹងឡានអ្នក កាត់បន្ថយរំញ័រ និងធ្វើឲ្យឡានអ្នកជិះមិនសូវរលាក់ជាដើម ប៉ុន្តែដោយសារតែវារងទម្ងន់ពីឡាន ព្រមទាំងត្រូវលើកចុះលើកឡើងគ្រប់ពេល ដូចនេះប្រើកាន់តែច្រើន ដឹកកាន់តែធ្ងន់ វានឹងកាន់តែខ្សោយ ទន់ លើកទម្ងន់ឡានលែងរួច ដូចនេះអ្នកត្រូវឧស្សាហ៍ឆែកមើលឲ្យបានដិលដល់ នៅពេលទៅដូរប្រេងម៉ាស៊ីន បើខូចល្មមៗ គួរប្ដូរវាឲ្យហើយដើម្បីសុវត្ថិភាពតាមផ្លូវ ។

5. ឆែកមើលប្រេងបូមចង្កូត

ជាទូទៅប្រេងបូមចង្កូតមានតួនាទីជួយសម្រួលការបង្វិលចង្កូតឡាន​ ប៉ុន្តែបើសិនឡានអ្នកខ្វះប្រេងបូមចង្កូត ឬមួយវាខូចគុណភាព វានឹងធ្វើឲ្យចង្កូតឡានតឹង ធ្វើការខុសប្រក្រតី នាំឲ្យខូចចង្កូតឡាន ជាពិសេសអាចបង្កគ្រោះថ្នាក់ នៅពេលបើកបរផងដែរ ដូចនេះអ្នកគួរឲ្យជាងជួយឆែកមើលពេលដូរប្រេងម៉ាស៊ីន ។ 

គួររំឭកផងដែរថា នៅពេលជិះឡានតាមផ្លូវ គួរតកចិត្តទុកដាក់មើលទួលបន្ថយល្បឿន ព្រោះតែការដែលបើកឡាន លឿនលើទួលបន្ថយល្បឿន នឹងធ្វើឲ្យជើងក្រោមឡានឆាប់ខូច និងពិសេសមានបញ្ហាបូម និងរ៉ឺស័រ  ដូចនេះ អ្នកគួរបន្ថយល្បឿនពេលជិះជួប ទួលបន្ថយល្បឿន។ 

…………………………………………………………………..

ដើម្បីទទួលបានព័ត៌មាន ចំណេះដឹង និងវីដេអូថ្មីៗទាក់ទងនឹងរថយន្ដសូម ៖

Follow Facebook Page : 👉 Advan Auto

Subscribe YouTube Channel : 👉Advan Auto

Follow TikTok : 👉Advan Auto

Follow Instagram : 👉Advan Auto