ការធ្វើដំណើរផ្លូវឆ្ងាយមិនថាពេលក្នុងរដូវកាលបុណ្យទាន ឬកម្មវិធីផ្សេងៗឡើយ ដើម្បីសុវត្ថិភាពមុនពេលចេញដំណើរ បងប្អូនត្រូវតែដឹងចំណុចខ្លីៗខ្លះៗ ដើម្បីធានាថាមិនមានបញ្ហាណាមួយដែលបង្ករឡើងដោយផ្នែកតូចៗផ្សេងៗទាំងនេះឡើយ។ បើតាមជាងជំនាញ បានណែនាំនៅចំណុចសំខាន់ៗចំនួន៨ ក្នុងការពិនិត្យរថយន្ដមុនពេលធ្វើដំណើរ។

1. ឆែកមើលសំបកកង់ចេញឡានទៅផ្លូវឆ្ងាយ

អ្នកគួរយកចិត្តទុកដាក់ជាមួយសំបកកង់ឲ្យបានច្រើន ជៀសវាងធ្លាយកង់ ផ្ទុះកង់ ឬរអិលកង់ពេលមានមេឃភ្លៀង។ អ្វីដែលអ្នកត្រូវមើលគឺខ្នងសំបកកង់ ថាតើ ក្រឡាសំបកកង់នៅលើសពី ៦ ម.ម ឬទេ ហើយដើម្បីដឹងថាតើវានៅមានជម្រៅលើ ៦ ម.ម យើងអាចមើលថ្នេរសំណឹកនៅលើសំបកកង់ផ្ទាល់ ភាសាបច្ចេកទេសគេហៅថា tire wear indicator អញ្ចឹងបើសិនដល់ថ្នេរសំណឹកហើយ អ្នកគួរដូរសំបកកង់ចេញឲ្យហើយទៅ ។

មួយវិញទៀតអ្នកអាចមើលអាយុកាលផុតកំណត់ ដែលមានភ្ជាប់មកជាមួយគ្រប់សំបកកង់ ដោយជាទូទៅសំបកកង់១ អាចប្រើបាន ៣-៥ ឆ្នាំប៉ុណ្ណោះ ដូចនេះប្រសិនបើផុតអាយុវាហើយ អ្នកគួរដូរវាចេញ ជៀសវាងផ្ទុះបែកតាមផ្លូវពេលរត់ល្បឿនលឿន ។

2. ថ្លឹងកង់និងតម្រង់កង់

សម្ពាធខ្យល់នៅក្នុងកង់ក៏ជាផ្នែកមួយដែលជួយឲ្យឡានអ្នកស៊ីសាំងតិច និងធានាសុវត្ថិភាពផងដែរ ហើយរឿងដែលកាន់តែសំខាន់ អ្នកត្រូវត្រួតពិនិត្យមើលផ្នែកចំហៀងសំបកកង់និងគេមផង ថាតើមានសឹករិចរឹលខ្លាំង ឬមានស្នាមប្រះឬទេ។

បើសិនជាកង់ឡានសឹករដេបរដុបឬសឹកមិនស្មើ គ្នានោះមាននយ័ថាប្រព័ន្ធជើងក្រោម នៃរថយន្តអាចនឹងមានបញ្ហាហើយ។ ដូចនេះនៅពេលរត់ល្បឿនលឿននោះ ឡាននឹងរ៉េចង្កូតឬប្រទាញចង្កូត ដែលអាចបង្កគ្រោះថ្នាក់បាន។

3. ដាក់ឧបករណ៍សាគួរ

អ្នកណាទៅដឹងថានៅតាមផ្លូវមានរឿងអ្វីកើតឡើង ដូចនេះអ្នកគួរសាគួរឧបករណ៍ខ្លះដូចជាកង់សាគួរ កាវប៉ះកង់ ឧបករណ៍ដោះកង់ ដូយលើកឡាន សោរ តួណឺវ៉ីស ផ្លាកសញ្ញាត្រីកោន និង បំពងពន្លត់ភ្លើងជាដើម ។

4. ឆែកមើលសារធាតរាវក្នុងរថយន្ត

សារធាតរាវដែលសំខាន់ៗនៅឡានរួមមាន ប្រេងម៉ាស៊ីន ប្រេងហ្រ្វាំង ប្រេងបូមចង្កូត រាប់បញ្ចូលទាំងទឹកថ្នាំ Coolant និង ទឹកជូតកញ្ចក់ផងដែរ ។

តិចនិកឆែកប្រេងម៉ាស៊ីនងាយៗដែលអ្នកអាចធ្វើបណ្តោះអាសន្នបានគឺយើងត្រួតពិនិត្យបរិមាណប្រេងម៉ាស៊ីននៅលើម៉ាកេប្រេងម៉ាស៊ីន។ ដំបូងគឺយើងដកម៉ាកេចេញមកជូតឱ្យស្អាតរួចញុកចូលវិញឱ្យសប់​​​ រួចដកចេញមកវិញដើម្បីមើលបើសិនកម្រិតប្រេងនៅចន្លោះ អតិបរិមា​ និងអបប្បរិមាគឹវាគ្រប់គ្រាន់បើវាក្រោម ចំណុចអបប្បរិមាយើងត្រូវរកមើលកន្លែងលេចជ្រាប។ បើសិនជាអត់មានទេយើងត្រូវបន្ថែមប្រេង​ ករណីទីពីរគឺ ពណ៌របស់ប្រេងម៉ាស៊ីនដែលជាទូទៅវាមានព័ណត្នោតបើសិនជាឡើងព័ណខ្មៅមានន័យថាយើងគួរដល់ពេលផ្លាស់ប្តូរហើយ។

5. ឆែកមើលអាគុយ

អាគុយនៅដំណើរការល្អពេលនៅផ្ទះ មិនប្រាកដថាវានៅតែដើរស្រួលពេលនៅតាមផ្លូវទេ ដូចនេះអ្នកត្រូវឆែកមើលថាតើអាគុយមានស្នឹមក្បាលឬមានបញ្ហាអ្វីឬទេ ហើយកុំភ្លេចឆែកមើលខ្សែភ្លើងអាគុយផង បើថាមានដាច់រហែកល្មមៗ ដូរចេញឲ្យហើយទៅ ដោយសារវាមានតម្លៃធូរថ្លៃទេ ។

6. ត្រួតពិនិត្យមើលប្រព័ន្ធភ្លើង

ប្រព័ន្ធភ្លើងនេះក្រៅតែពីប្រព័ន្ធមេកានិចមួយចំនួន គឺសម្ដៅដល់ភ្លើងបំភ្លឺរបស់រថយន្ដ អ្នកត្រូវតែប្រាកដ

ថាភ្លើងបំភ្លឺផ្លូវផ្នែកខាងមុខ និងស្ដុបសេញ៉ូសងខាងមុខក្រោមដំណើរការធម្មតាពេលដែលអ្នកបើកបរ។ ពីព្រោះវាមានសារៈសំខាន់ណាស់ជាពិសេសនៅពេលអ្នកធ្វើដំណើរកម្សាន្តផ្លូវឆ្ងាយទៅខេត្តនានាជាដើម។

7. ប្រព័ន្ធជើងក្រោម

គ្រឿងក្រោមក្រៅតែពីសម្បកកង់ គឺយើងត្រូវពិនិត្យផ្នែកមួយចំនួនផងដែរដូចជា៖ ស្បែកហ្វ្រាំង ប្រព័ន្ធបូមរឺស័រ ឬទ្រនាប់កៅស៊ូ និងត្រូវប្រាកដថាមិនមានលេចដំណក់ទឹក ឬសារធាតុរាវណាមួយដែលបណ្ដាលមកពី ការជ្រាបប្រេងឡើយ។ 

8. ជួបជាងជំនាញ

ចំពោះបងប្អូនដែលមិនធ្លាប់ ឬចេះត្រួតពិនិត្យមើលដោយខ្លួនឯងទេ អាចទៅជួបជាងជំនាញដើម្បីណែនាំ និងពិនិត្យបាន ចៀងវៀងមានបញ្ហាណាមួយនៅពេលធ្វើដំណើរ។

ចំណុចសំខាន់ៗទាំង៨ខាងលើ បងប្អូនអាចពិនិត្យបានមុនពេលធ្វើដំណើរទៅស្រុកនៅរដូវកាលភ្ជុំបិណ្ឌនេះ បំណងល្អពី Advan Auto៕

ដោយ៖ BunSak