CR-V ជាឡាន Compact SUV ខ្នាតតូចប្រើបែបលក្ខណៈគ្រួសាររបស់ Honda ដែលមើលទៅបែបសាមញ្ញ តែគុណភាព នឹងសមត្ថភាពជើងក្រោម អាចផ្ដល់ទំនុបចិត្ត នឹងផាសុកភាពជូនអតិថិជនបានយ៉ាងពេញចិត្តផងដែរ។

Honda CR-V ដែលស្រុកខ្មែរសម្បូរប្រើរហូតមកទល់នឹងបច្ចុប្បន្ននោះគឺពពួកជំនាន់ទី១ ស៊េរីឆ្នាំ ១៩៩៧ ដល់ ២០០១ ដែលជាឡានជប៉ុន Specs អាមេរិក ខណៈតម្លៃទីផ្សារបច្ចុប្បន្នខ្ទង់ ៣,០០០ដុល្លារ ទៅ ៥,០០០ដុល្លារ អាចរកទិញបានជិះហើយ អាស្រ័យលើ ឆ្នាំផលិត ពណ៌ Option នឹងភិនភាគឡានជាក់ស្ដែង។

ស៊េរីចាស់បែបសាមញ្ញមែន តែមានចំណុចពិសេសមួយចំនួនហាក់ទាក់ទាញចិត្តអ្នកដែលប្រើឡានបែប Performance ដោយចំណុចទាំងនោះរួមមាន ប្លុកម៉ាស៊ីន នឹងប្រព័ន្ជជើងក្រោម។

ចំពោះប្លុកម៉ាស៊ីន CR-V ត្រូវបាន Honda កំណត់ម៉ាស៊ីនមានតែ ១ជម្រើស តែមាន ២ប្រភេទទៅតាមលំដាប់ឆ្នាំផលិតដូចជា ពពួកឆ្នាំ ១៩៩៧ ដល់ ១៩៩៩ CRV ប្រើម៉ាស៊ីន straight-four លេខកូត B20B ទំហំ ៤ស៊ីឡាំង ២.០លីត្រ ផលិតកម្លាំង ១២៦ សេះ កម្លាំងរមួល ១៣៣ ផោនហ្វីត រត់លឿនបំផុតបាន ១៧០គីឡូម៉ែត្រ/ម៉ោង​ ដែលអាចជាន់ពី ០-១០០ គីឡូម៉ែត្រប្រើពេល ១១.៤ វិនាទី។ 

ខណៈឆ្នាំ ២០០០ ទៅ ២០០១ CRV ប្រើម៉ាស៊ីនទំហំ ៤ស៊ីឡាំង ២.០ លីត្រ លេខកូត B20Z ដែលបន្ថែមកម្លាំងដល់ទៅ ២០សេះ ធ្វើអោយកម្លាំងសរុបកើន ១៤៦ សេះ អាចរត់លឿនបំផុតបាន ១៧៧គីឡូម៉ែត្រ/ម៉ោង ជាន់ស្ទុះពី ០-១០០គីឡូម៉ែត្រ ប្រើពេល ១០.៤វិនាទី ។

CRV ជំនាន់ទីមួយនេះ ប្រើប្រអប់លេខ ៤ វគ្គអូតូ និងជម្រើស ៥ វគ្គលេខដៃ ជាមួយនឹងប្រភេទរត់ប៉ុងមុខ(FWD) និងប៉ុងពីរ(AWD) ជាមួយកម្រិតស៊ីសាំងវិញខ្ទង់ ៧លីត្រទៅ ១០លីត្រក្នុងមួយ ១០០ គីឡូម៉ែត្រ ឬអាចលើសខ្វះតិចតួចអាស្រ័យលើស្ថានភាពជាក់ស្ដែង។

ចំណុចមួយទៀតដែលទាក់ចិត្តអ្នកប្រើនោះគឺ ប្រព័ន្ធជើងក្រោម ហាក់មិនចាញ់ SUV លំដាប់របស់ក្រុមហ៊ុនឡានផ្សេងៗ ដែលមានឆ្នាំផលិត ប្រហាក់ប្រហែលគ្នានោះទេ។

ដោយ Honda បំពាក់ប្រព័ន្ធស្លាបប្រជៀវឌុប Double wishbone ទាំងមុខទាំងក្រោយ ធ្វើអោយការបើកបរមានភាពទន់ស្រួល ទប់លំណឹងបានល្អកាត់បន្ថយរំញ័រ នឹងមិនសូវរលាក់ឡើយ។ គ្រាន់តែមិនសូវមាំ ម្យ៉ាងអ្នកប្រើខ្លះគាត់អន់ចិត្តរឿង CR-V ដឹកទម្ងន់ច្រើនបន្ដិច មើលទៅដាបខ្លាំង នឹងរាងហែកជើងបន្ដិច ប៉ុន្ដែជើងក្រោមរបស់ CRV មិនមែនសម្រាប់ដឹកឥវ៉ាន់ធ្ងន់ច្រើនឡើយ បើត្រឹមតែម៉ាជិះស្រួល CRV អាចកំដរបាន។

សម្រាប់បងប្អូនវិញយល់យ៉ាងណាដែរចំពោះ Honda CR-V ជំនាន់ទី១ ស៊េរីឆ្នាំ ១៩៩៧ ដល់ ២០០១ មួយនេះ? បងប្អូនដែលមានមតិយោបល់ បទពិសោធន៌ នឹងព័ត៍មានបន្ថែម អាចចែករំលែកបាន៕

ដោយ៖ Bunsak 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ។

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!