Honda ជាក្រុមហ៊ុនយក្ស លំដាប់ជួរមុខមួយរបស់ជប៉ុន មិនថានៅជុំវិញពិភពលោកឡើយ នៅស្រុកខ្មែរក៏ពេញនិយមខ្លាំងមិនចាញ់ Toyota ប៉ុន្មានឡើយ។ តែសម្រាប់ Ridgeline ដែលជាប្រភេទឡាន Pick Up វិញនៅស្រុកខ្មែរហាក់ស្ងប់ស្ងាត់យូៗឃើញមួយបើធៀបឡានឡាន​ Pick Up របស់ក្រុមហ៊ុនផ្សេងៗ។ 

Ridgeline អាចចាត់ទុកថាជាឡានចំណូលថ្មីដែរ ព្រោះផលិតដំបូងនៅឆ្នាំ២០០៦ ដល់ឆ្នាំ២០១៧ ដែលជាជំនាន់ទី១ បើគិតមកទល់នឹងបច្ចុប្បន្ននេះវិញ Honda ដំណើរការ Ridgeline បាន២ជំនាន់ទៅហើយ។

ចំពោះវត្តមាននៅស្រុកខ្មែរវិញ អាចនិយាយបានថាជាឡានកម្រមួយម៉ូឌែលហើយភាគច្រើនជាស៊េរីឆ្នាំ២០០៦ ដែលមានតម្លៃស្លាកលេខចន្លោះពី ៨០០០ដុល្លារ ទៅ ១០០០០ដុល្លារជាងតិចតួច អាស្រ័យលើគុណភាព និងភិនភាគឡានជាក់ស្ដែង។

Ridgeline ប្រើម៉ាស៊ីនសាំងទំហំ ៦ស៊ីឡាំង ចំណុះ ៣.៥លីត្រ ប្រភេទឡាបអាកាមទោល (Single overhead cam) ផលិតកម្លាំងបានដល់ទៅ ២៤៧សេះ កម្លាំងរមួល ២៤៥ផោនហ្វីត រត់ដោយប្រអប់លេខ ៥វគ្គអូតូ បង្វិលកង់ដោយប៉ុង២ 4WD ជាស្ដងដារតែម្ដង ដែលជំនួយដោយប្រព័ន្ធ Lock ប៉ុងក្រោយ និងកាពិតាស់ផងដែរ។

ចំពោះកម្រិតស៊ីសាំងវិញចន្លោះពី ១២លីត្រ ទៅ ១៦លីត្រក្នុង១០០គីឡូម៉ែត្រ ឬអាចលើសតិចតួចទៅតាមស្ថានភាពជាក់ស្ដែង និងកម្រិតគុណភាពនៃអាយុកាលម៉ាស៊ីនផងដែរ។

ចំណែកភិនភាគទំហំវិញ វាមានប្រវែង ៥២៥២៣ម.ម ទទឹង ១៩៧៦ម.ម កម្ពស់ ១៧៨៥ ពីដីមកបាត ២០៨ម.ម ទម្ងន់ ២តោន អាចដឹកបាន ៧០០គីឡូក្រាម ជាមួយនឹងសមត្ថភាពអូសសណ្ដោង ២៣០០គីឡូក្រាម។ 

ជាប្រភេទឡាន Pick Up មែនតែជើងក្រោមមិនប្រើជន្ទាស់ដូចទៅនឹងឡានដឹកដទៃឡើយ គឺប្រើជាប្រភេទ ជើងទម្រឯករាជភ្ជាប់កង់ទាំង៤តែម្ដង តែផ្នែកខាងមុខជំនួយបន្ថែមដោយ រឺស័រ MacPherson Strut អមដោយ Stabilizer bar និងផ្នែកខាក្រោយបំពាក់ជា Multi-Link Suspension ។

ជើងក្រោមប្រភេទនេះ វាជួយទប់លំណឹងបានល្អ កាត់បន្ថយរលាក់នឹងរំញ័របានច្រើន ទោះបីជាជិះក្នុងឡាន Pick Up មែនតែជិះ Ridgeline នេះហាក់ដូចជាកំពុងបើក SUV លំដាប់ថវិកាមួយអញ្ចឹង។ 

ចំណែកយាន់កង់វិញប្រើទំហំ ១៧អីញ បំពាក់ហ្វ្រាំងឌីសគៀបទាំងមុខក្រោយជំនួយដោយប្រព័ន្ធ ABS ជាមួយនឹង TC, TSC, BA, EBA និង EBD ធ្វើឲ្យការជាន់ហ្វ្រាំងកាន់តែមានប្រសិទ្ធភាពខ្ពស់ក្នុងការបើកបរ។

ខាងក្នុងវិញទូលាយគួរសម មានបំពាក់កៅអី ២ជួរ អាចជិះគ្នា៥នាក់មិនទាន់ចង្អៀតឡើយ ទោះបីឆ្នាំទាប់មែនតែ Ridgeline មានប្រព័ន្ធ Cruise Control មកជាស្ដងដារតែម្ដង។ 

បើជាប្រភេទ Trim ខ្ពស់ៗវិញឃើញមានបំពាក់នៅ កៅអីស្បែក, ជំនួយដោយអេឡិចត្រនិច, ផ្នែកមួយចំនួនបំពាក់នៅស្បែក ពោងសុវត្ថិភាព ៦គ្រាប់ Speaker ៧គ្រាប់, ដំបូលបើក, រន្ធម៉ាស៊ីនត្រជាក់ក្រោយ ជាមួយនឹង មុខងារសំខាន់ៗជាច្រើនទៀតផងដែរ។

ជារួមសម្រាប់ Honda Ridgeline ឆ្នាំ២០០៦ នេះបើនិយាយពីកម្លាំង សមត្ថភាពវិញអាចប្រជែងជាមួយឡាន Pick Up ផ្សេងៗបាន។ គ្រាន់តែថាជាប្រភេទឡានមិនសូវនិយមនៅស្រុកខ្មែរ គ្រឿងបន្លាស់ក៏មិនសម្បូដែរ ហើយបើចង់លក់ចេញទិញចូលប្រញាប់វិញនោះ រាងពិបាកបន្ដិចព្រោះទីផ្សារមិនជាទូលាយឡើយ។

ជំពោះកម្រិតនៃភាពធន់ និងគុណភាពវិញ Admin ក៏មិនទាន់ដឹងច្បាស់នៅឡើយទេ សម្រាប់បងប្អូនដែលមានបទពិសោធន៍ជាមួយ Rigeline អាចចូលខ្លួនមកចែករំលែកនៅក្នុង Comment ខាងក្រោមនេះបាន៕

ដោយ៖ Bunask