Kona ជាពពួកឡាន Crossover SUV ចំណូលថ្មីមួយរបស់ Hyundai ដែលផលិតដំបូងនៅឆ្នាំ២០១៨ រហូតដល់ឆ្នាំ២០២៣ ដែលបានចេញស៊េរីថ្មីម៉ូឌែល ២០២៤ ដែលមានទាំងប្រភេទ សាំង ម៉ាស៊ូត និងដំណើរការដោយអគ្គីសនីផងដែរ។
សម្រាប់ស្រុកខ្មែរឃើញនាំចូលមកលក់នៅស៊េរីឆ្នាំ២០១៩ និងឆ្នាំ២០២០ ដែលមានតម្លៃខ្ទង់ ៤ម៉ឺនដុល្លារជាង ហើយឆ្នាំបន្ទាប់ៗមកក៏ហាក់ស្ងាត់ និងបាត់វត្តមាន ស្រាប់តែលិចចេញម៉ូឌែល Venue ឆ្នាំ២០២១ ដែលមានតម្លៃធូរជាង ឬអាចនិយាយថា Venue មកជំនួសតម្ដែងរបស់ Kona ក៏អាចថាបាន។

សម្រាប់ទីផ្សារស្លាកលេខបច្ចុប្បន្ន Kona ឃើញគេដាក់លក់ក្នុងចន្លោះ ក្បែ ៣ម៉ឺនដុល្លារ ទៅ ៣ម៉ឺនដុល្លារបន្ដិច អាស្រ័យលើពណ៌ ឆ្នាំផលិត និងភិនភាគជាក់ស្ដែង។

Kona ស្រុកខ្មែរ ប្រើជាមួយម៉ាស៊ីនសាំងទំហំ ៤ស៊ីឡាំង ចំណុះ ២.០លីត្រ ផលិតកម្លាំងបាន ១៤៧សេះ កម្លាំងរមួល ១៣២ផោនហ្វីត រត់ដោយប្រអប់លេខ ៦វគ្គអូតូ បង្វិលកង់ដោយប៉ុងមុខ ជាមួយកម្រិតស៊ីសាំងជាមធ្យម ៧លីត្រ ទៅ ៨លីត្រក្នុង១០០គីឡូម៉ែត្រ។

ការឌីស្សាញផ្នែកខាងមុខមានទម្រង់បែបអនាគត់ ជាមួយសំណាញ់បាណាលាតផ្ទៃខាងមុខ ឯចង្កៀងវិញរាងប្លែកដោយបំពាក់ភ្លើង Daytime LED នៅផ្នែកខាង និងកណ្ដាលជាភ្លើងបំភ្លឺផ្លូវ ប្រភេទគុជ LED ហើយក៏មានបន្ថែមនៅពិលកាងមួយគូរនៅផ្នែកខាងក្រោមហើយដែរ។ ចំណែកស្ដុបក្រោយក៏ប្រើជា LED ឆ្នូតអូសកាត់គូទក្រោយបន្ដិច និងមានបន្ថែមនៅភ្លើងចំណាំងផ្លាត់ផងដែរ។

Kona បើមើលពីចំហៀងរំលិចដោយយាន់កង់ ១៧អ៉ីងអាលុយមីញូម បំពាក់ហ្វ្រាំងឌីសគៀបទាំងមុខងារក្រោយ និងមានជ័រ ឬកំបាំងភក់ ដែលមើលទៅបែបស្ព័រ គួរសម។

វាមានប្រវែងតួរខ្លួនសរុប ៤២១៥ម.ម ទទឹង ១៨០០ម.ម កម្ពស់ ១៥៧៥ម.ម ជាមួយទម្ងន់ដល់ទៅ ១.៥តោនឯណោះ។

ផ្ទៃខាងក្នុងទូលាយគួរសម បំពាក់កៅអីស្បែក ២ជួរ មានមុខងារក្ដៅត្រជាក់ និងជំនួយដោយអេឡិចត្រនិច នៅជួរមុខ, មាន Smart Key, ដំបូលបើក កញ្ចក់ក្ដោបអូតូ, ស្លាយកុងទ័រ, មុខងារវាស់សម្ពាធ៍កង់, Wireless Charging, បំពាក់អេក្រង់ថាច់ ៧អ៉ីងភ្ជាប់ Apple CarPlay & Android Auto, ជាមួយកាម៉េរាក្រោយ ជំនួយដោយសេនស័រចូលចត មិនតែប៉ុណ្ណោះ សេនស័រមុខក្រោយក៏ធ្វើការទៅលើ Blind Spot Monitor ដែលជំនួយដល់ការផ្ដល់សញ្ញាពេលមានវ៉ាជែង ជាដើម។

ទាំងនេះជាចំណុចត្រួសៗខ្លះៗពី Hyundai Kona ចំពោះរូបរាងខាងក្រៅនឹងខាងក្នុង ស្អាតទាក់ទាញទូលាយល្អ ចំណែកភាពទំនើប អាចថាគួរសម ជាមួយតម្លៃមួយទឹកស្លាកខ្ទង់ ៣ម៉ឺនដុល្លារ។

ចុះបងប្អូនយល់យ៉ាងណាដែរចំពោះ Kona របស់ Hyundai មួយនេះ?សម្រាប់មតិយោបល់ និងបទពិសោធន៍ បងប្អូនអាចចែករំលែកបន្ថែមបាន៕   

ដោយ៖ Bunsak

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!