Lamborghini ត្រូវបានគេស្គាល់ទូទៅថាជាម៉ាកសញ្ញារថយន្ដ Super-Sport Car ល្បីឈ្មោះ របស់ អ៊ីតាលី ដែលថ្មីៗនេះទើបតែបានប្រកាសថា ខ្លួននឹងឈប់បន្ដការផលិតរថយន្ដប្រើម៉ាស៊ីនចំហេះក្នុង ហើយនៅបំណាច់ឆ្នាំ ២០២២ នេះ និងផ្ដោតលើរថយន្ដ PHEV និង EV ចាប់ពី ២០២៣ ទៅ ។ 

យោងតាមការចុះផ្សាយពី សារព័ត៌មាន CNET បានឲ្យដឹងថា ហេតុផលដែល Lamborghini មានបំណងចង់ផ្លាស់ប្ដូរការផលិតរថយន្ដពីប្រើម៉ាស៊ីនចំហេះក្នុង ទៅជា Plug in Hybrid និង​ អគ្គិសនីនេះ គឺដើម្បីស្របទៅតាមការពេញនិយមនាសម័យបច្ចុប្បន្ន​ និងដើម្បីបរិស្ថានផងដែរ តែផលវិបាកត្រង់ថា អាចនឹងប្រឈមនឹងការ ស្រកស្រុតផ្នែក Performance និងប៉ះពាល់ដល់ប្រព័ន្ធមេកានិច និងម៉ាស៊ីនដែលជាអត្តសញ្ញាណរបស់រថយន្ដខ្លួន។ 

បើតាមសម្ដីរបស់លោក Stephan Winkelmann អគ្គនាយកក្រុមហ៊ុន Lamborghini បានប្រាប់មកកាន់សារព័ត៌មាន Automotive News ថា៖

 “បើសិនជាអ្នកចង់ទិញឡាន (Lamborghini) ម៉ាស៊ីនចំហេះក្នុង នោះអ្នកប្រហែលជាមិនសូវមានសំណាងទេឥឡូវនេះ ព្រោះថាឡានដែលផលិតក្នុងឆ្នាំ ២០២២ នេះជិតអស់ពីស្ដុកហើយ” 

លោកបានបន្ថែមទៀតថា៖ 

 “សម្រាប់រថយន្ដ (Lamborghini) ដែលចេញនៅឆ្នាំ ២០២៣ ខាងមុខនឹងត្រូវចាប់ផ្ដើម ផលិតជាលក្ខណៈរថយន្ដ Plug in Hybrid សិន​និងបន្ដទៅផលិត Lamborghini ប្រើអគ្គិសនីសុទ្ធនៅឆ្នាំ ២០២៤” 

ក្នុងនោះ លោក Stephen ក៏បានបញ្ចាក់ផងដែរថា៖ 

 “ក្រុមហ៊ុនរបស់យើង (Lamboghini) គឺជាក្រុមហ៊ុនផលិតរថយន្ដ Super-Sport car ដូច្នេះវាហាក់ជារឿងពិបាកមួយសម្រាប់ការផ្លាស់ប្ដូរឲ្យស្របទៅតាមបរិបទសង្គមបែបនេះ ជាពិសេសគឺធ្វើយ៉ាងណាឲ្យរក្សាបាននូវ​អត្តសញ្ញាណ ក៏ដូចជាសមត្ថភាពរបស់រថយន្ដផងដែរ មានន័យថា យើងនឹងកែប្រែគ្រប់យ៉ាង តែធ្វើយ៉ាងណាឲ្យដូចជាមិនបានកែប្រែអ្វីសោះ” 

យ៉ាងណាក៏ដោយ ទោះបីជាជួបផលពិបាកបែបនេះ លោកក៏បានបង្ហើបថាគម្រោងផលិតឡានអគ្គិសនីគឺនៅតែបន្ដ ដោយបញ្ជាក់ថា ឡានអគ្គិសនីសុទ្ធដំបូងគេនឹងជាប្រភេទឡានកៅអីបួន ដោយរូបរាងរបស់វា ប្រហែលជាអាចប្រើប្រាស់ទម្រង់ J1 platform ដែលកាត់ស្ដាយតាម Porsche Taycan និង Audi E-Tron GT ដែលរបៀបជាឡានសម្រាប់ជិះធម្មតាប្រចាំថ្ងៃ មិនទាន់ឡើងដល់ឡាន Sport Car ដូច Huracan ឬ Aventador នៅឡើយទេ និងអាចពន្យារការចេញលក់ដល់ឆ្នាំ ២០២៥ ដោយសារតែបច្ចុប្បន្នរោងចក្រធំនៅ Sant’Agata Bologenese, Italy នៅមិនទាន់បើកប្រតិបត្ដិការប្រក្រតីនៅឡើយ។

ក៏ប៉ុន្ដែ នៅឆ្នាំ ២០២៣ នេះ Lamborghini នឹងបើកទ្វារស្វាគមន៍ Aventador ជំនាន់ថ្មីជាមួយប្រព័ន្ធ Plug-in Hybrd ដំបូងគេ រួចហើយ ម៉ូដែល Hurucan​ និង Urus ជំនាន់ថ្មី ប្រើប្រាស់ Plug-in Hybrid ​នឹងចេញជាបន្ដបន្ទាប់ពីក្រោយផងដែរ។

អត្ថបទ៖ Andra