បើនិយាយពីឡាន ស្ព័រទ្វា ៤របស់ Lexus ដែលមានកម្លាំងខ្លាំង នឹងពេញនិយមប្រើនៅស្រុកខ្មែរ អាចថាត្រកូល GS ស៊ីដាច់ហើយ។ នៅខ្មែរសម្បូរណាស់ប្រភេទ GS300 ជំនាន់ទី២ ស៊េរីឆ្នាំ​២០០៦​ ដល់ ២០០៨ ហើយក៏ល្បីថាស៊ីសាំងច្រើនផងដែរ ប៉ុន្ដែក៏ជិះស្រួលមិនចាញ់ឡានលំដាប់ថវិការខ្ពស់ឡើយ។

សម្រាប់ពពួកជំនាន់ទី២ GS300 បំពាក់ម៉ាស៊ីន​ ៦ស៊ីឡាំង ៣.០លីត្រ ផលិតកម្លាំង ២៤៥សេះ កម្លាំងរមួល ២៣០ផោនហ្វីត ភ្ជាប់ជាមួយប្រអប់លេខ ៦ វគ្គអូតូ នឹងជម្រើសរត់ដោយប៉ុងក្រោយ (RWD) និងមានជម្រើសប៉ុងពីរ(AWD) ។

ចំពោះកម្រិតស៊ីសាំងវិញ បច្ចុប្បន្នអាចហក់ខ្ទង់ ១២លីត្រ ទៅ ១៤លីត្រជាងក្នុង ១០០គីឡូម៉ែត្រ ឬអាចលើខ្វះតិចតួចអាស្រ័យលើស្ថានភាពជាក់ស្ដែង ជាមួយតម្លៃទីផ្សារបច្ចុប្បន្នខ្ទង់ ១ម៉ឺនស្ដើង ទៅ ១ម៉ឺនក្រាស់ការទិញបានជិះហើយ។

តែបើក្រឡេកមើលមើលពពួកជំនាន់ទី៣ ស៊េរីឆ្នាំ ២០១៦ ដែលផ្លាស់ប្ដូររាងថ្មី ឈ្មោះថ្មីម៉ាស៊ីនថ្មីគេហៅថា GS200t កាន់តែស្ព័រ នឹងទំនើបមិនធម្មតាឡើយ ចំណែកកម្លាំងរត់វិញ ប្រើម៉ាស៊ីនត្រឹម ២.០លីត្រ ៤ស៊ីឡាំងមែន ប៉ុន្ដែកុំចង់សាក ខ្លាំងជាងមុនទៅទៀត ជាន់ដឹងតែហើបក្បាលតែម្ដង។

ជាក់ស្ដែង GS200t ដែលប្រើនៅស្រុកខ្មែរឃើញបំពាក់ម៉ាស៊ីន ៤ស៊ីឡាំង ២.០លីត្រ ជំនួយបន្ថែមដោយ Turbo  ផលិតកម្លាំងបាន ២៤១សេះ កម្លាំងរមួល ២៥៨ផោនហ្វីត រត់ដោយប្រអប់លេខ ៨វគ្គអូតូ បង្វិលកង់ដោយប៉ុង១ RWD និងប៉ុង២ AWD និងជំនួយបន្ថែមដោយ Drive Mode ដូចជា៖ Eco, Normal និង Sport ជាមួយកម្រិតស៊ីសាំងខ្ទង់ ៩លីត្រ ទៅ ១១លីត្រប៉ុណ្ណោះក្នុង១០០គីឡូម៉ែត្រ ឬអាចលើសខ្វះតិចតួចទៅតាមស្ថានភាពជាក់ស្ដែង។

ចំពោះតម្លៃវិញឃើញទីផ្សារដាក់លក់ខ្ទង់ ៣ម៉ឺនដុល្លារស្ដើង ទៅ ៤ម៉ឺនដុល្លារ អាស្រ័យលើ ពណ៌ Trim/Option ប្រភេទស្លាកលេខឬក្រដាសពន្ធ ឆ្នាំផលិត នឹងភិនភាគឡានជាក់ស្ដែង។

GS200t ជាប្រភេទឡាន Sedan បែបស្ព័រទ្វា៤ កៅអីស្បែក ពីរជួរអាចជិះបាន ៥នាក់ នឹងសល់ឃ្លុបក្រោយអាចដាក់អីវ៉ានបានច្រើនគួរសម ដែលអមមកជាមួយ Trim ឬ Option ចំនួន ៣ដូចជា Base ឬ Standard, Premium នឹង F-Sport ជាដើម។

ចូលដល់ Option ខ្ពស់ឬ Full Option ពេញដែលគេហៅថា F-Sport ឃើញបំពាក់ អេក្រង់តាប់ឡូទំហំ ១២.៣អ៉ីង កៅអីក្ដៅប្រជាក់ ផ្លឹតទឹកអូតូ រីដូកញ្ចក់ក្រោយជាមួយ Parking Sensor រូបរាងខាងក្រៅក៏ បំពាក់សំណាញ់ ជាមួយចង្កៀងគុជ ៣គ្រាប់ប្រភេទ Auto High Beam, Spoiler នៅគូទក្រោយ យាន់កង់បែបស្ព័រ ១៨អ៉ីង។

ក្រៅពីកៅអីអេឡិចត្រនិច និង Lumbar Support មានបន្ថែមនៅមុខងារជើងទម្រភ្លូវជួរមុខ Speaker ១៧គ្រាប់ Premium Mark Levinson, ការបំពាក់ស្បែក និងហ្វមិការអាលុយ្យូមបែបកាប៉ូន, កុងទ័រឌីជីថល ក្រៅពីនឹងក៏មានប្រព័ន្ធសុវត្ថិភាពសំខាន់ៗដូចជា៖

១/ ប្រព័ន្ធកំណត់ល្បឿនតាមឡានខាងមុខ Adaptive Cruise control ។

២/ ប្រព័ន្ធដាស់តឿនពេលឡានចាក់គន្លងផ្លូវ Land Departure Warming ។

៣/ ប្រព័ន្ធផ្ដល់សញ្ញាដាស់តឿន និងចាប់ហ្វ្រាំងអូតូពេលមានឧបសគ្គនៅខាងមុខ forward collision mitigation with automatic braking ជាដើម។

សម្រាប់បងប្អូនវិញយល់យ៉ាងណាដែរចំពោះ Lexus GS200t ជំនាន់ទី៣ ស៊េរីឆ្នាំ ២០១៦ មួយនេះ? បងប្អូនដែលមានមតិយោបល់ បទពិសោធន៌ នឹងព័ត៍មានបន្ថែម អាចចែករំលែកបាន៕

ដោយ៖ Bunsak 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ។

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!