ត្រកូល IS ជាប្រភេទឡាន Sedan បែបស្ព័រ របស់ក្រុមហ៊ុន Lexus ហើយនៅស្រុកខ្មែរឃើញមានវត្តមានភាគច្រើនជាស៊េរីឆ្នាំ២០០៦ ដល់ ២០០៨ ជាមួយរូបរាងដ៏ទាក់ទាញ និងពេញនិយម ទោះបីជាមានអាយុកាល ១៧ឆ្នាំហើយក្ដី។ ដោយឃើញបច្ចុប្បន្នក៏មានប្រទះភ្នែកនៅលើដងផ្លូវខ្លះដែរ ជាមួយតម្លៃចាប់ពី ១៦០០០ដុល្លារជាង ទៅក្បែរ ២ម៉ឺនដុល្លារ អាស្រ័យលើពណ៌ Option និងភិនភាគឡានជាក់ស្ដែង។

អាចនិយាយបានថា Lexus Is250 ឆ្នាំ២០០៦នេះ ជាប្រភេទឡានស្ព័រទំនើប រូបរាងទាក់ទាញ ខាងក្នុងស្អាតបែប Luxury Car កម្លាំងខ្លាំងជាន់ហើបក្បាលឡាន ជាមួយតម្លៃធូរមិនគួរឲ្យជឿ តែកុំឃើញធូៗ ដឹងពីលក្ខណៈទូទៅខ្លះៗ ក៏ដូចជាគុណសម្បត្តិ និងគុណវិបត្តិរបស់ Is ២០០៦ នេះបន្ដិចសិន។

ឃើញរាងតូចបន្ដិចមែនតែបំពាក់ម៉ាស៊ីនទំហំ ៦ស៊ីឡាំង ចំណុះ២.៥លីត្រ ផលិតកម្លាំងបាន ២០៤សេះ កម្លាំងរមួយល ១៨៥ផោនហ្វីត រត់ដោយប្រអប់លេខ ៦វគ្គអូតូ ជំនួយដោយ Paddle Shifter  បង្វិលកង់ដោយប៉ុងក្រោយ RWD និងប៉ុងពីរ AWD អាចរត់ល្បឿនបាន ២៣០គីឡូម៉ែត្រ/ម៉ោង ដែលជាន់ស្ទុះពី០ទៅ ១០០គីឡីម៉ែត្រប្រើពេលតែ ៨វិនាទីប៉ុណ្ណោះ។ 
កម្រិតស៊ីសាំងវិញចន្លោះពី ១០លីត្រ ទៅ១៤លីត្រ ក្នុង១០០គីឡូម៉ែត្រឬអាចលើសខ្វះតិចតួចទៅតាមស្ថានភាពជាក់ស្ដែង។

IS 250 មានប្រវែងសរុប ៤៥៧២ម.ម ទទឹង ១៨៨០ម.ម កម្ពស់ ១៤២៥ម.ម ពីដីមកបាតឡាន ១៤៤ម.ម ជាមួយទម្ងន់ ១៧០០គីឡូក្រាមឯណោះ។

ផ្នែកខាងក្នុងទំនើបស្អាតបែប Spot Luxury Car ទោះបីជាចាស់ឆ្នាំបន្ដិចហើយក្ដីតែភាពទាន់សម័យមិនចាញ់ឡានស៊េរីថ្មីៗដែលមានតម្លៃ៣ម៉ឺនឡើយ។

គ្រាន់តែមាឌតូចខាងក្នុងរាងចង្អៀតបន្ដិច បំពាក់កៅអីស្បែក២ជួរ ជំនួយដោយអេឡិចតត្រនិកខាងជួរមុខ មានមុខងារកម្ដៅកៅអី Mamery Seat អាចជិះបានគ្នា៥នាក់ល្មម បំពាក់អេក្រង់ចំកណ្ដាលទំហំ ៩អីញ កញ្ចក់ចុចអូតូ Smart Key កញ្ចក់កាត់ចំណាំងផ្លាត់ ដំបូលបើក ពោងសុវត្ថិភាព ៨គ្រាប់ Speaker ១៣គ្រាប់, ប្រើយាន់កង់ទំហំ ១៧អីញ, មានកាម៉េរាក្រោយ និងសេនស័រជំនួយពេលចូលចតផងដែរ។

បើជាប្រភេទ Full Option បន្ថែមយាន់កង់១៨អីញរាងស្ព័រស្អាតជាងមុន Speaker ១៤គ្រាប់ Mark Levinson Bluetooth GPS, ផ្លិតទឹកអូតូ, ចង្កៀងមុខប្រើគុជ HID ប្រភេទ Adaptive អាចរ៉េឆ្វេងស្ដាំតាមចង្កូត ជាមួយនឹង ប្រព័ន្ធចាប់ល្បឿនអូតូតាមឡានខាងមុខ (Dynamic Radar Cruise Control) មុខងារជំនួយពេលចូលចត (Rear Parking Assist) ជាដើម។

បើតាមបទពិសោធន៍ពីបងប្អូនអ្នកប្រើ IS250 នៅស្រុកខ្មែរបានឲ្យដឹងថា ទោះបីជិះស្រួលមែនតែក៏មានចំណុចល្អ និងចំណុចស្ទើចិត្តដែរ៖

ចំពោះគុណសម្បត្តិ
ជិះស្រួលជើងក្រោមហាប់ណែន និងទន់ល្អ។
ម៉ាស៊ីនធំ កម្លាំងសេះខ្លាំង ជាន់ស្ទុះចុះខេត្តវ៉ាជែងមិនតឹងចិត្តឡើយ។ទោះបីមានអាយុកាល ១៧ឆ្នាំហើយក្ដី តែរូបរាងនៅទាន់សម័យ ខាងក្នុងពេលបើកបរជួយទប់សម្លេងរំខានបានល្អ ហើយស្អាតបែប Luxury តែម្ដង។

ចំពោះគុណវិបត្តិ

កម្ពស់ពីដីមកបាតត្រឹមតែ ១៤៤ម.ម ទាបជាងអាព្រូសទៀត បើចុះខេត្តចូលភូមិផ្លូវឡើងទួលទៀតដឹងតែយ៉ាប់បន្ដិចហើយ ចំណែកខាងក្នុងវិញចង្អៀតមិនជាទូលាយប៉ុន្មានឡើយ។ 
ម៉ាស៊ីនដល់ទៅ ៦ស៊ីឡាំង កម្រិតស៊ីសាំងក៏ច្រើនគួរសមដែរ រាងចាស់ឆ្នាំអាចហក់ដល់ ១៣លីត្រ ទៅ ១៥លីត្រអីដែរ។
គ្រឿងបន្លាស់ថ្លៃគ្រាន់បើ នៅភ្នំពេញមានគួរសម បើនៅតាមខេត្តពិបាករកណាស់ ហើយថ្លៃទៀត។
ពេលទិញរាងថ្លៃ បើចង់លក់វិញពិបាក់បន្ដិច មិនសូវមានទីផ្សារ ហើយខាតច្រើនទៀត។

តែបើគិតថា បញ្ហាទាំងអស់នេះមិនជាផលលំបាកសម្រាប់បងប្អូនដែលស្រឡាញ់ និងចង់ប្រើម៉ូឌែល IS250 នេះទេ IS250 វានៅតែអេម ទាក់ទាញទាន់សម័យ និងជិះស្រួល មិនទាន់លេចទៅណាឡើយ។ 

ចុះបងប្អូនយល់យ៉ាងណាដែរចំពោះ Is250 ឆ្នាំ២០០៦ ដល់២០០៨ នេះ? គិតថាចង់ពិចារណាអត់បើមានលុយក្បែរ ២ម៉ឺនដុល្លារ? សម្រាប់បងប្អូនដែលមានមតិយោបល និងបទពិសោធន៍អាចចែករំលែកបន្ថែមបាន៕

ដោយ៖ Bunsak