RX 400h គីជាឡានដំណើរការដោយប្រព័ន្ធ Hybrid ដំបូងបំផុតមួយរបស់ក្រុមហ៊ុន Lexus ក្នុងប្រភេទជា Crossover SUV។ Lexus បានផលិតវាឡើងយ៉ាងសម្រិតសម្រាំងជាទីបំផុត ឲ្យស័ក្កិសមជា Luxury Car ដើម្បីនាំចូលទីផ្សារសហរដ្ឋអាមេរិ កាណាដា បែកអ៉ឺរ៉ប់ និងអាស៊ីផងដែរ។ ទោះបីជាយ៉ាងណា 400h ទាំងរូបរាង គ្រោងឆ្អឹង និងខាងក្នុង ស្ទើតែដូច RX330 ទាំងស្រុង គ្រាន់តែខុសផ្នែកខ្លះទាក់ទងនឹង Option ប្រព័ន្ធដំណើរការ និងបំពាក់នៅបច្ចេកវិទ្យាតិចតួចបន្ថែមទៀតដើម្បីកុំឲ្យថា មិនមានអ្វីប្លែកសោះតែប៉ុណ្ណឹង។

តែទីផ្សាររបស់ RX400h ទទួលបានជោគជយ័ និងពេញនិយមខ្លាំងដែលផលិតចាប់ពីឆ្នាំ២០០៦ ដល់ ២០០៩។ មិនថាតែនៅបណ្ដាប្រទេសទាំងនោះទេ សូម្បីតែនៅកម្ពុជាយើងក៏និយមវាខ្លាំងដែរ ក្នុងមានជាឡានមួយទឹកតែតម្លៃខ្ពស់។ 

-ជាក់ស្ដែងតម្លៃទីផ្សារក្នុងស្រុកបច្ចុប្បន្នចន្លោះពី ២ម៉ឺនដុល្លារក្រាស់ ទៅ៣ម៉ឺនដុល្លារស្ដើង អាស្រ័យលើឆ្នាំផលិត ពណ៌ Option និងប្រភេទស្លាកលេខ ឬក្រដាស់ពន្ធជាដើម។ 

-RX400h ប្រើម៉ាស៊ីន ៦ស៊ីឡាំង តំរៀបជាអក្សរ V ចំណុះ៣.៣ លីត្រ ផលិតកម្លាំង ២០៨សេះ បូកបន្ថែមម៉ូទ័រអគ្គិសនី ៣គ្រាប់ទៀត បង្កើនកម្លាំងបាន ២៦៨សេះ និងកម្លាំងរមួល ២១២ផោនហ្វីត រត់ដោយប្រអប់លេខ CVT ដែលចែកកម្លាំងពីម៉ូទ័រទៅបង្វិលកង់ដោយផ្ទាល់ ធ្វើឲ្យការចូលលេខស្មូតល្អ។ វាមានជម្រើសប៉ុងមួយ (FWD) និងប៉ុងពីរ(AWD) ប្រើហ្វ្រាំងឌីសគៀបមុខក្រោយ ជំនួយដោយ ABS លើកង់ទាំង៤ ធ្វើអោយរថយន្ដមួយនេះអាចបើកលឿនបំផុតបាន ២០០គីឡូម៉ែត្រ/ម៉ោង ជាន់ស្ទុះពី ០-១០០គីឡូម៉ែត្រ ប្រើពេល ៧.៦វិនាទី ប៉ុណ្ណោះ។

-កម្រិតស៊ីសាំងជាមធ្យម ៩លីត្រ សម្រាប់បើកបរក្នុងក្រុង ៨លីត្រ និងក្រៅក្រុងផ្លូវលាត ១០លីត្រក្នុង១០០គីឡូម៉ែត្រ ឬអាចលើសតិចតួចទៅតាមស្ថានភាពជាក់ស្ដែង។

-​ ជើងក្រោមដំណើរការដោយប្រព័ន្ធឯការជ្យ Independent Suspension ភ្ជាប់កង់ទាំងមួនតែម្ដង តែផ្នែកខាងមុខជំនួយដោយ បូមរឺស័រធម្មតា MacPherson Strut និងខាងក្រោយជា Multi-link។ ជើងក្រោមប្រភេទនេះ ធ្វើអោយការបើកជ្រេនៅផ្លូវកោងទប់លំនឹងបានល្អ ចំណែកឯការជិះលើផ្លូវលំបាកល្មមៗក៏វាអត់សូវរលាក់ និងជួយកាត់បន្ថយសម្លេងរំខានពីខាងក្រៅបានស្ងាត់ល្អ។

+ ទោះបីជារត់ណឹងល្អ បើកបរជាន់ស្ទុះ និងសន្សំសំចៃក៏ដោយ បើគិតមកដល់បច្ចុប្បន្ននេះអាយុកាលរាងជ្រេ

បន្ដិចហើយ។ ម្យ៉ាងទៀតមានចំណុចមិនពេញចិត្តមួយចំនួនដែលបងប្អូនអ្នកប្រើប្រាស់តែងតែអន់ចិត្តចំពោះ ឡាន Hybrid RX400h មួយនេះ ដែលចំណុចទាំងនោះរួមមាន៖

- ជាប្រភេទឡាន Hybrid ដែលមានតម្លៃថ្លៃ តែមិនមានបំពាក់ជាមួយនៅ Smart Key និង បូតុង Power Start ឡើយ។

- ឡានឆ្នាំខ្ពស់ប្រេន Lexus លំដាប់ជួរមុខដែរ មានតែកាម៉េរាក្រោយ តែអត់មានប្រព័ន្ធ Sensor ជំនួយពេលចូលចត ឬផ្លូវចង្អៀតឡើយ ដូចជាលោតសញ្ញាព្រមានពេលជិតប៉ះអ្វីមួយជាដើម។

- ទោះបីជាមានអាយុ ១៥ឆ្នាំហើយក្ដី តែតម្លៃនៅខ្ពស់ដដែល ចង់ថ្លៃជាងឡានស៊េរីថ្មីឆ្នាំ២០២២មួយចំនួនទៅទៀត។

- ទិញតម្លៃខ្ពស់ ហើយលក់វិញខាតច្រើន ព្រោះមិនសូវសម្បូរទីផ្សារ។

- គ្រឿងបន្លាស់ថ្លៃ ហើយត្រូវការថែទាំខ្ពស់ បើមានបញ្ហាប្រព័ន្ធភ្លើង ឬអាគុយ Hybrid ណាមួយ នៅពេលធ្វើដំណើរតាមខេត្ត អាចនឹងដេកផ្លូវហើយ ព្រោះពិបាករកជាងបន្ដិច ចំណែកគ្រឿងក៏មិនសូវសម្បូរដែរតាមខេត្ត។

ទាំងនេះជាចំណុចដែលបងប្អូនខ្លះគាត់តែងស្ទើរចិត្តជាមួយនិង Lexus RX400h ក្នុងរយៈពេលប៉ុន្មានឆ្នាំចុងក្រោយនេះ។ តែបើបងប្អូនដឹង និងបានត្រៀមចិត្តនៅចំណុចទាំងអស់នេះហើយ 400h នៅតែអេម ចាយរាងគ្រាន់បើ ទោះបីជាចាស់ឆ្នាំហើយក្ដី៕

ចុះបងប្អូនយល់យ៉ាងណាដែរ បើកាន់ថវិកាខ្ទង់ ៣ម៉ឺនដុល្លារជាង ហ៊ានប្រផុយជាមួយ Lexus RX400h នេះដែរអត់?

ដោយ៖ BunSak