ពពួកត្រកូល RX មានប្រភព និងដើមកំណើតចេញពី RX300 ផលិតក្នុងឆ្នាំ១៩៩៩ ដល់ ២០០៣ សម្រាប់ម៉ូឌែលជំនាន់ទី១ ជាប្រភេទឡាន Crossover SUV ដំបូងបំផុតរបស់​ Lexus។ តែចូលដល់ឆ្នាំ២០០៤ ដល់ ២០០៩ ទើបមានវត្តមានជំនាន់ទី២ ដែលរូបរាងដូច RX330 មានដូចជា៖ RX330 XR400h និង RX350 នេះឯង។ 

ថ្ងៃនេះយើងមកនិយាយពីលក្ខណៈត្រួសៗខ្លះៗរបស់ RX350 ដែលមានរូបរាងស្ទើទាំងស្រុងទៅនឹង RX330 តែសម្រាប់ RX350 ឆ្នា២០០៧ឡើងទៅត្រូវបាន Lexus រក្សារាងដដែល និងចំណុចមួយចំនួនទៀតត្រូវបាន បំពាក់បន្ថែមដូចជា៖

ផ្លាស់ប្ដូរប្លុកម៉ាស៊ីនថ្មីលែងប្រើពពួកម៉ាស៊ីន V6​ 3.3L ដែលមានកូដ 3MZ-FE ដាក់ម៉ាស៊ីនថ្មីស្រឡាងជំនួសវិញគឺ V6 3.5L 2GR-FE ដែលអាចបង្កើនកម្លាំងសេះបានដល់ទៅ ២៧០សេះ ជាមួយនឹងកម្លាំងរមួល ២៥១ផោនហ្វីត រត់ដោយប្រអប់លេខ ៥វគ្គអូតូ និងបង្វិលកង់ដោយជម្រើសប៉ុង១ និងប៉ុង២ដដែល។ និយាយពីល្បឿនវិញអាចជាន់ស្ទុះពី០ ទៅ១០០គីឡូម៉ែត្រ ប្រើពេលតែ ៧វិនាទីប៉ុណ្ណោះ។

ចំពោះកម្រិតស៊ីសាំង កាលចេញពីរោងចក្រដំបូងចន្លោះពី ១១លីត្រ ទៅ១៤លីត្រ តែជាក់ស្ដែងបច្ចុប្បន្នអាចហក់ដល់ទៅ ១៣លីត្រ ទៅ ១៦លីត្រក្នុង១០០គីឡូម៉ែត្រ ឬអាចលើសខ្វះតិចតួចទៅស្រ័យលើការបើកបរជាក់ស្ដែង។

ក្រៅពីនឹង Lexus ក៏បានបំពាក់នូវប្រព័ន្ធថ្មីខុសពី RX330 និង RX400h គឺ Lexus Generation V DVD ទៅលើ RX350 ដែលត្រូវបានអាប់ដេតជាមួយនឹងក្រាហ្វិកប្រសើរឡើងជាងមុន ងាយស្រួលក្នុងការប្រើជាមួយនឹង DVD, GPS, Camera ដែលភ្លឺច្បាស់ល្អ នឹងការបញ្ចូលទិសដៅដែលគ្រប់គ្រងដោយសំឡេង និងមុខងារថ្មីមួយហៅថា bread crumbs ជាដើម។

ហើយអ្វីដែលប្លែកអាចមើលពីខាងក្រៅដឹងថាជា RX350 នោះគឺ ស៊េរីឆ្នាំ២០០៨ឡើងទៅ បំពាក់យាន់កង់ថ្មីទំហំ១៨អីញ មានកាំក្រឡាចំនួន៧ ដែលពពួក RX330 មានត្រឹម៥កាំប៉ុណ្ណោះ។ យាន់បែបនេះមើលទៅស្អាតប្លែកបែបស្ព័រជាងមុន និងងាយស្រួលក្នុងការរត់ល្បឿនផងដែរ។ 

ក្រៅពីនឹងដូចជាមិនមានអ្វីដែលថ្មីប្លែកគួរអោយចាប់អារម្មណ៍ច្រើនឡើយ ទាំងរូបរាងក្រៅនឹងខាងក្នុង ភាពទំនើប Option គឺដូចទៅនឹង RX330 ដែរ។

ចំណែកតម្លៃវិញ ដោយមានកាបំពាក់ម៉ាស៊ីនថ្មី និងចំណុចបន្ថែមមួយចំនួនផងនោះ ទើបធ្វើឲ្យ RX350 មានតម្លៃខ្ពស់ជាង RX330 ខ្ទង់២០០០ដុល្លារជាង ទៅ ជិត៣០០០ដុល្លារជាងឯណោះ។ ជាក់ស្ដែងតម្លៃទីផ្សារហាងឆេងនៅស្រុកខ្មែរយើងនេះចន្លោះពី ២៩០០០ដុល្លារ ទៅ ជិត៤០០០០ដុល្លារ អាស្រ័យលើឆ្នាំផលិត ពណ៍ Option និងភិនភាគជាក់ស្ដែងជាដើម។

សរុបមកចំពោះ RX350 ឆ្នាំ០៧ ដល់០៩នេះ អាចនិយាយបានថាមានការផ្លាស់ប្ដូរថ្មីគួរសមដែរ ម៉ាស៊ីនក៏ខ្លាំងជាងមុន ប្រព័ន្ធមុខងារក៏រាងទំនើបជាមុន និងឆ្នាំផលិតក៏ខ្ពស់គួរសម ប្រព័ន្ធភ្លឺងក៏ថ្មីខុសពី RX330 ផងដែរ។ ចុះបងប្អូនយល់យ៉ាងណាដែរចំពោះ Lexus RX350 មួយម៉ូឌែលនេះ? តម្លៃប៉ុណ្ណឹងគិតថាពិចារណាបានអត់? បើមានចំណាប់អារម្មណ៍ និងបទពិសោធន៍ ឬសំណូមពរអ្វី អាចចូលរួមនៅក្នុង Comment ខាងក្រោមនេះឲ្យ Admin បានដឹងផង៕អរគុណ!

 ដោយ៖ Bunsak