បើនិយាយពីប្រភេទឡានខ្ពស់ SUV ខ្នាតធំរបស់ Mitsubishi គេតែងនឹកដល់រថយន្ដម៉ូឌែល Pajero ដែលឃើញមានប្រើនៅស្រុកខ្មែរខ្ទង់ឆ្នាំ ៩០ជាងមកម្លេស រហូតមកទល់នឹងបច្ចុប្បន្ន ក៏ឃើញវត្តមានស៊េរីឆ្នាំក្រោយៗចេញលក់ជាហូហែផងដែរ។

តែបើនិយាយពីពពួកស្លាកលេខស៊េរីឆ្នាំចុងក្រោយនេះវិញឃើញទីផ្សារដាក់លក់ច្រើនគួរសមដែរម៉ូឌែលឆ្នាំ ២០២១នឹង២០២២ ខណៈឆ្នាំលើសពីនឹងមិនទាន់ឃើញមានឡើយសម្រាប់ស្លាកលេខ។

SUV Full Size មួយនេះកាលចេញថ្មីខ្លាញ់គោតម្លៃខ្ពស់គួរសមដែរខ្ទង់ ៦ម៉ឺនដុល្លារជាងឯណោះ ខណៈបច្ចុប្បន្នប្រភេទស្លាកលេខ នៅខ្ទង់ ៣ម៉ឺនដុល្លារក្រាស់ ទៅ ៤ម៉ឺនដុល្លារបន្ដិច សម្រាប់បងប្អូនដែលចាប់អារម្មណ៌ឡាន ជប៉ុនមួយនេះ អាចរកមើលបាន។

សម្រាប់ Pajero Sport ជាប្រភេទឡានកៅអី ៣ជួរ ជាមួយភិនភាគប្រវែង ៤៨២៥ម.ម ទទឹង ១៨១៥ម.ម​ កម្ពស់ ១៨៣៥ម.ម ពីដីមកបាតឡាន ២២០ម.ម ជាមួយតម្ងន់សរុប ២តោនឯណោះ។ ដែលរូបរាងពពួកជំនាន់ថ្មីចុងក្រោយនេះ មើលទៅបែបស្ព័រ នឹងហាប់ណែន ជាងស៊េរីឆ្នាំមុនៗផងដែរ។

ចំពោះផ្នែកខាងក្នុងវិញ ទូលាយស្រឡាស់ល្អណាស់ ជាប្រភេទឡាន SUV ៧កៅអី អាចជិះបាន ៨នាក់ និងសល់ឃ្លុបក្រោយដាក់អីវ៉ាន់បានគួរសមផងដែរ។ ផ្ទៃខាងក្នុងកៅអី និងផ្នែកជាច្រើនបំពាក់ស្បែក​ អមដោយក្រូម មើលទៅប្រណិត ជាមួយកុងទ័រឌីជិថល អេក្រង់ថាច់ ៨អ៉ីងភ្ជាប់ Apple Carplay & Android Auto។

ក្រៅពីនឹងក៏មានកាម៉េរា ៣៦០ឌឺក្រេ​ DVD សម្រាប់អ្នកដំណើរ កញ្ចក់មើលក្រោយកាត់ចំណាំងផ្លាត់ ទ្វាគូទក្រោយបិតបើកអូតូបាន ៦បៀប ហ្វ្រាំងដៃអេឡិចត្រនិច Auto Hold ជាមួយនឹងប៉ូតុងសំខាន់ៗមួយចំនួនទៀត។

ផ្នែកប្លុកម៉ាស៊ីនវិញ ឃើញប្រើម៉ាស៊ីនម៉ាស៊ូត ៤ស៊ីឡាំង ២.៤លីត្រ អាចផលិតកម្លាំងបាន ១៨១សេះ កម្លាំងរមួល ៤៣០ញូតុនម៉ែត្រ រត់ដោយប្រអប់លេខ ៨វគ្គអូតូមានបន្ថែម Paddle Shift បង្វិលកង់ដោយប៉ុង២ 4WD ជំនួយដោយប្រព័ន្ធ Super Select មានដូចជា៖ 2H-4H-2HLc-4LLc អាចរត់ក្នុងល្បឿនលឿនបំផុតបាន ១៨០គីឡូម៉ែត្រម៉ោង/ ជាមួយកម្រិតស៊ីប្រេងជាធម្យម ៧លីត្រ ទៅ ៨លីត្រប៉ុណ្ណោះក្នុង១០០គីឡូម៉ែត្រ។

សម្រាប់បងប្អូនវិញយល់យ៉ាងណាដែរចំពោះ Mitsubishi Pajero ស៊េរីឆ្នាំ ២០២១នឹង២០២២ មួយនេះ? បងប្អូនដែលមានមតិយោបល់ បទពិសោធន៌ នឹងព័ត៍មានបន្ថែម អាចចែករំលែកបន្ថែមបាន៕

ដោយ៖ Bunsak 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ។

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!