នៅស្រុកខ្មែរឲ្យតែនិយាយដល់ឡានមួយទឹកពីអាមេរិក គឺតែងតែចង់បានឡានមកពីរដ្ឋកាលីហ្វញ៉ា ពិសេសបងៗអ្នកលក់ឡានក៏តែងតែ អួតប្រាប់ថាឡានរបស់ខ្លួនជាឡានកាលីដែរ។ ជារថយន្ដមួយទឹកពីសហរដ្ឋអាមេរិកដូចគ្នា តែហេតុអ្វីបានជាខ្មែរយើងនិយមនិងជឿថាឡានមកពីរដ្ឋកាលីហ្វញ៉ាល្អ?

ចុះបណ្ដារដ្ឋទាំង ៥១មួយទៀតគុណភាពឡានយ៉ាងម៉េចដែរ? ហើយធ្វើដូចម្ដេចទើបដឹងថាឡានម៉ូឌែលមួយនឹង ចេញមកពីរដ្ឋខាងណានៃសហរដ្ឋអាមេរិក? 

ថ្ងៃនេះ Advan Auto និងស្រាយចម្ងល់ដែលដក់ជាប់ក្នុងបរិបថស្រុកខ្មែរជាងមួយទសវត្សនេះ ដើម្បីឲ្យបងប្អូនយល់កាន់តែច្បាស់ជុំវិញបញ្ហាទាំងអស់នេះ ទៅលើគុណភាពឡាននៅអាមេរិក។

+ ដើម្បីងាយយល់ពីបញ្ហានេះ Admin សុំបែកចែកតំបន់នៅសហរដ្ឋអាមេរិកជាបីធំៗដូចជា៖

 ១. The West ភាគខាងលិច ដែលជាបណ្ដុំរដ្ឋដែលមានអាកាសធាតុធម្មតា មានដូចជា៖

- រដ្ឋ California (កាលីហ្វញ៉ា) 

- រដ្ឋ Texas

- រដ្ឋ New Mexico 

- រដ្ឋ Arizona

- រដ្ឋ​ Colorado 

ចំណែករដ្ឋដែលស្ថិតនៅភាគខាងលិចមួយចំនួនទៀត អាចមានអាកាសធាតុប្រែប្រួលជាងបន្ដិច។

២. The South ភាគខាងត្បូង ជាបណ្ដុំរដ្ឋដែលមានអាកាសធាតុ ត្រជាក់ស្ងូតធម្មតា មានដូចជា៖

- រដ្ឋ Florida

- រដ្ឋ Georgia

- រដ្ឋ North Carolina 

- រដ្ឋ South Carolina ជាដើម។

រដ្ឋទាំងនេះអាកាសធាតុត្រជាក់គួរសមតែមិនធ្លាក់ព្រិល ឬទឹកកក់ច្រើនឡើយ។

៣. The Midwest តំបន់កណ្ដាលភាគខាងលិច និង The North East តំបន់ខាងជើងឈៀងខាងកើត ជាបណ្ដុំរដ្ឋដែលមានអាកាសធាតុត្រជាក់ខ្លាំង និងធ្លាក់ទឹកកក មានដូចជា៖

- រដ្ឋ Lowa 

- រដ្ឋ Ohio

- រដ្ឋ​ New York 

- រដ្ឋ New Jersey 

- រដ្ឋ Rhode island 

- រដ្ឋ Massachusett និងនៅមានបណ្ដារដ្ឋជាច្រើនទៀតផងដែរ។ 

ហេតុដែលនាំឲ្យមានការបែងចែកតំបន់បែបនេះ ពីព្រោះតែធម្មតារថយន្ដដែលប្រើនៅរដ្ឋដែលមានអាកាសធាតុល្អ មិនត្រជាក់ពេក និងមិនធ្លាក់ទឹកកក វាអាចជួយឲ្យប្រព័ន្ធម៉ាសុីនដំណើរការបានធូរល្អ។ ម្យ៉ាងទៀតវាកាត់បន្ថយស្ថានភាពឡានមិនឲ្យជាប់ស្នឹម ឬច្រេះពុកផុយឡើយ។

- ក្នុងនោះដែរអ្នកជំនាញនៅក្នុងស្រុកបានណែនាំថា រថយន្ដដែលប្រើនៅតំបន់ដែលត្រជាក់ធ្លាក់ទឹកកក រយៈពេលចន្លោះពី ៨ឆ្នាំ ទៅ ១០ឆ្នាំ វានិងជួបបញ្ហាបង្កជាច្រេះនៅតាមប្លុកម៉ាស៊ីន និងជើងក្រោមនៃតួសាក់ស៊ីឡាន ឬអាចពុកផុយតែម្ដង។

ម្យ៉ាងទៀតក្រៅតែពីបញ្ហាច្រេះ ម៉ាស៊ីនក៏អាចធ្លាក់ចុះមួយកម្រិតដែរ ព្រោះតំបន់ទឹកកក់ឡានត្រូវធ្វើការប្រើកម្លាំងខ្លាំងជាងមុន ដើម្បីអូសទាញ និងទប់រថយន្ដពីស្ថានភាពរអិលក្នុងទឹកកក ជាពិសេសខុសលក្ខខណ្ឌក្នុងការប្រើប្រេងម៉ាស៊ីន​ នៅពេលយកមកប្រើនៅតំបន់អាកាសធាតុក្តៅ ជាហេតុនាំឲ្យម៉ាស៊ីនរត់រអាក់រអួល ។ ហើយតំបន់ទាំងនោះភាគច្រើនប្រើរថយន្ដប្រភេទប៉ុងពីរ ងាយស្រួលក្នុងការរើបម្រាស់ចេញពីស្ថានភាពលំបាកទាំងនោះ។

+ ចុះធ្វើដូចម្ដេចទើបដឹងថារថយន្ដទាំងនោះប្រើនៅរដ្ឋណាមួយក្នុងសហរដ្ឋអាមេរិក?

គ្រប់រថយន្ដទាំងអស់នៅអាមេរិក គេតែងតែកត់ចូលទៅក្នុងប្រព័ន្ធរបាយការណ៍ស្ដីអំពីការប្រើប្រាស់រថយន្ដ ដែលមានបញ្ជាក់នូវរាល់ព័ត៍មានទាំងអស់មានដូចជា៖

- ប្រវត្តិរបស់ឡាន ឈ្មោះ ម៉ូឌែល, ឆ្នាំផលិត ពណ៌, ចំនួនម្ចាស់អ្នកប្រើប្រាស់ ឆ្នាំនៃការប្រើប្រាស់, ទីតាំងតំបន់ដែលប្រើប្រាស់ជាដើម។ ក្រៅពីនេះក៏មានកត់ត្រា ភិនភាគជាក់ស្ដែងដូចជា៖ ពិន្ទុវាយតម្លៃនៃកម្រិតគុណភាពរថយន្ដ, ប្រវត្តិនៃគ្រោះថ្នាក់(ចំនួន ធ្ងន់ឬស្រាលមានទាំងរូបភាព) ចំនួនម៉ៃ ឬគីឡូម៉ែត្រ, ជាប្រភេទឡានបាត់ឬចោរលួច, ជាឡានលិចទឹកឬ ភ្លើងឆេះ និងនៅមានរបាយការណ៍ជាច្រើនទៀតលម្អិត អំពីឡានតែម្ដង។

- ហើយដើម្បីដឹងអំពីព័ត៍មានទាំងអស់នេះបាន បងប្អូនអាចចូលទៅប្រើប្រាស់បាននៅសេវាកម្ម ឆែកមើលប្រវត្តិឡាន ដោយគ្រាន់តែយកលេខ VIN ឬហៅថាលេខតួឡាន វាយចូលទៅក្នុងគេហទំព័រដូចជា៖ Auto Check និង Carfax ជាដើម ដើម្បីទទួលបាននៅព័ត៍មានលម្អិតទាំងអស់នេះ។    

+ ចូលមកដល់សំនួររសើបដែលថាឡាននៅរដ្ឋកាលីហ្វញ៉ាពិតជាល្អមែនអត់? 

ចម្លើយគឺមិនខុសទេ តែក៏មិនប្រាកដ់ថាឡានដែលមកពីកាលីសុទ្ធតែល្អទាំងអស់នោះដែរ វាមិនមានច្រេះ ដូចរដ្ឋធ្លាក់ទឹកកកមែន តែវាក៏មានបញ្ហាមួយចំនួនដែរ ។ ដែលអាស្រ័យលើការពិនិត្យអោយល្អិតល្អន់ ទាក់ទងនឹងការប្រើប្រាស់ និងភិនភាគជាក់ស្ដែងដើម្បីជៀសវៀងដូចជា៖ ឡានបុក (ធ្ងន់ឬស្រាល) ម៉ាស៊ីនមានបញ្ហា ជើងក្រោមអត់ស្រួល ឡានគ្មានប្រវត្តិច្បាស់លាស់ ឡានគេទុកចោលក្នុងព្រៃឬគំនរអេតចាយឡាន (ឡានខ្មោច) ជាដើម។ 

សរុបមកចំពោះស្រុកខ្មែរគេនិយមណាស់ឡានមកពីរដ្ឋ California នឹង Texas ព្រោះតែជាឡានដែលមិនមានច្រេះ តែក៏មិនគួរទុកចិត្តទាំងស្រុងដែរ អាស្រ័យលើមើលភិនភាគជាក់ស្ដែង។ តែយ៉ាងណាឡានដែលមិនមានច្រេះស្រួលចិត្តដែរ ព្រោះច្រេះនេះវាពិបាកជួសជុលណាស់ ហើយក៏ចំណាយច្រើនដែរ តែអ្វីដែលសំខាន់ត្រូវពឹងលើព័ត៍មាន 50% និងមើលលើភិនភាគជាក់ស្ដែង 50% ទើបអាចជឿជាក់បាន៕   

ដោយ៖ BunSak