Camry ស៊េរីឆ្នាំ ២០០៧ សុទ្ធតែជាប្រភេទឡានពេញនិយមប្រើប្រាស់នៅស្រុកខ្មែរ មិនចាញ់ត្រកូល Camry ស៊េរីមុនៗឡើយ។ ប៉ុន្ដែបច្ចប្បន្នហាក់ស្ទើតែគ្មានសោះសម្រាប់ប្រភេទក្រដាសពន្ធ ប៉ុន្ដែពពួកមួយទឹកស្លាកលេខ នៅតែមានទីផ្សារលក់ចេញទិញចូលធម្មតា គ្រាន់តែតម្លៃពីមួយឆ្នាំ ទៅមួយឆ្នាំ កាន់តែមានតម្លៃធូរជាងមុនបន្ដិចម្ដងៗផងដែរ។

ជាក់ស្ដែងមុនរដូវកាលឆ្លងឆ្នាំសកលនេះ ទោះបីជាមានតម្រូវការចរន្ដការ លក់ចេញទិញចូល នៃរថយន្ដមួយទឹកច្រើនបន្ដិចក្ដី ប៉ុន្ដែតម្លៃទីផ្សារហាក់មិនមានការប្រែប្រួល ឬឡើងថ្លៃឡើយ។ បច្ចុប្បន្នប្រភេទ Camry LE នឹង XLE តម្លៃទីផ្សារខ្ទង់ ១៤,០០០ដុល្លារជាង ទៅ ១៧,០០០ដុល្លារ អាស្រ័យលើ ពណ៌ Trim/Option នឹងភិនភាគឡានជាក់ស្ដែង។ 

ប៉ុន្ដែក៏មានតម្លៃធូរជាងហ្នឹងច្រើនដែរ សម្រាប់ប្រភេទឡានដែលមានស្លាកលេខទាបៗ ឬការប្រើប្រាស់យូមកហើយនៅស្រុកខ្មែរ ហើយខ្លះទៀត ភិនភាគឡានមិនសូវលាសល្អ ដូចនេះតម្លៃក៏មានទាបទៅតាមហ្នឹងដែរ។

គួរបញ្ចាក់ដែរថា៖ Camry 07​ ប្រើម៉ាស៊ីន ៤ស៊ីឡាំង ២.៤ លីត្រ ផលិតកម្លាំង ១៥៨ សេះ កម្លាំងរមួល ១៦២ផោនហ្វីត រត់ដោយប្រអប់លេខ ៥ វគ្គអូតូ បង្វិលកង់ដោយប៉ុងមុខ (FWD) ជាមួយល្បឿនលឿនបំផុតខ្ទង់ ២០០គីឡូម៉ែត្រ/ម៉ោង ជាន់ស្ទុះពី ជាន់ស្ទុះពី ០ ទៅ ១០០គីឡូម៉ែត្រ ប្រើរយៈពេល ៧.៤ វិនាទី។

ចំពោះកម្រិតស៊ីសាំងវិញ បច្ចុប្បន្នខ្ទង់ ៩លីត្រ ទៅ ១២លីត្រ ក្នុង១០០គីឡូម៉ែត្រ ឬអាចលើសខ្វះតិចតួចអាស្រ័យលើស្ថានភាពជាក់ស្ដែង។

សម្រាប់បងប្អូនវិញយល់យ៉ាងណាដែរចំពោះ Toyota Camry មួយនេះ? បងប្អូនដែលមានមតិយោបល់ បទពិសោធន៍ នឹងព័ត៍មានបន្ថែម អាចចែករំលែកបាន៕

ដោយ៖ Bunsak

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ។

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!