Hilux Revo ជាឡាន Pick Up ដែលល្បីនឹងពេញនិយមខ្លាំងនៅប៉ែកអាស៊ី បើនិយាយពីស្រុកខ្មែរវិញគឺថាមានស្ទើគ្រប់ស៊េរីឆ្នាំតែម្ដង ហើយល្បីថាគុណភាពប្រើតរកូនចៅតែម្ដង។

ចាប់ពីឆ្នាំ ២០១៦មក Revo ចូលដល់ជំនាន់ទី២ នឹងត្រូវបានផ្លាស់ប្ដូររាងថ្មីស្អាតប្លែកជាង Vigo ពីមុនដែល Toyota ធ្វើកំណែទម្រង់ថ្មីរូបរាងខាងក្រៅ នឹងផ្ទៃខាងក្នុង ចំណែកផ្នែកប្លុកម៉ាស៊ីនវិញសម្រាប់ឆ្នាំ ២០១៦នឹង២០១៧ ទោះបីជាទទួលបានរាងថ្មីក្ដី ប៉ុន្ដែហាក់នៅប្រើម៉ាស៊ីនចាស់របស់ Vigo ដដែល។

ទាល់តែចូលចាប់ពីឆ្នាំ ២០១៨ឡើងទៅទើប Toyota សម្រាប់ដាក់ម៉ាស៊ីនថ្មីដែលតូចជាងមុន ប៉ុន្ដែខ្លាំងជាងមុន នឹងសន្សំសំចៃជាងមុនផងដែរ។

កំពូល Pick Up មួយនេះមានប្រវែង ៥៣៤៥ម.ម ទទឹង ១៩៣៥ម.ម កម្ពស់​ ១៨១៥ម.ម ពីដីមកបាត ២៨៦ម.ម និងទម្ងន់ ២១០០គីឡូក្រាម មានសមត្ថភាពដឹកបាន ១.២តោន និងអូសសណ្ដោងបាន ៣.៥តោនឯណោះ។

គ្រាន់តែរូបរាងខាងក្រៅពពួក ២០១៦នឹង២០១៧ រាងសាមញ្ញបន្ដិចដោយប្រើចង្កៀងធម្មតាម នឹងមានរន្ធហឺយនៅលើដំបូលម៉ាស៊ីន ខណៈឆ្នាំ២០១៨ មានបន្ថែម ចង្កៀងគុជ HID អមដោយភ្លើង DRL LED នឹងបិទរន្ធហឺយចោលតែម្ដង មើលទៅរាងប្លែកជាងមុន។

ចំពោះផ្នែកប្លុកម៉ាស៊ីនវិញ Revo ២០១៦ដល់២០១៧ ប្រើម៉ាស៊ីនម៉ាស៊ូត ៤ស៊ីឡាំង ៣.០លីត្រ ជំនួយ Turbo ផលិតកម្លាំងបាន ២១២សេះ កម្លាំងរមួល ៣៦០ញ៉ូតុនម៉ែត្រ ហៅថាម៉ាស៊ីនធំ រត់ដោយប្រអប់លេខ ៦វគ្គអូតូ បង្វិលកង់ដោយប៉ុង២ 4WD មានជំនួយដោយប្រព័ន្ធ Lock ប៉ុង និងកាប់ពីតាស់ផងដែរ។

ជាមួយកម្រិតស៊ីប្រេងចន្លោះពី ៩លីត្រ ទៅ ១២លីត្រជាង ក្នុង១០០គីឡូម៉ែត្រ ឬអាចប្រែប្រួលទៅតាមការបើកបរជាក់ស្ដែង។ 

ចូលដល់តម្លៃវិញបច្ចុប្បន្នហាក់ធូរថ្លៃជាង ១ទៅ២ឆ្នាំមុន ស៊េរីឆ្នាំ ២០១៦នឹង២០១៧ ឃើញទីផ្សារដាក់លក់ខ្ទង់ ៣០,០០០ដុល្លារទៅ ៣២,០០០ដុល្លារ អាស្រ័យលើ ពណ៌ នឹងភិនភាគឡានជាក់ស្ដែង។

សម្រាប់បងប្អូនវិញយល់យ៉ាងណាដែរចំពោះ Toyota Hilux Revo 2016-2017 មួយនេះ? បងប្អូនដែលមានមតិយោបល់ បទពិសោធន៍ នឹងព័ត៍មានបន្ថែម អាចចែករំលែកបាន៕

ដោយ៖ Bunsak 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ។

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!